Read Mizo_Old_version Jeremia 50 Bible Online

Jeremia 50 - Mizo_Old_version bible

Jeremia 50

¹Babulon chungchâng, Kaldai mite ram chungchânga zâwlnei Jeremia kaa LALPA thusawi chu:

²“Hnam tin zîngah chuan hril ula, puang rawh u, Puanzâr khai ula, puang ula, thup suh u, ‘Babulon lâk a ni ta, Bela chu a mualpho ta, Merodaka chu a zâm zo ta, a limte chu a mualpho va, A milim chu a chhe zo ta.’

³“Hmâr aṭangin ani chu hnam pakhatin a rawn bei a, chu chuan a ram chu a tiṭiau vang a, tah chuan tu mah an chêng tawh lo vang; an tlânchhia a, an bo zo ta, mi leh sate pawh.

⁴“Chûng niahte leh chumi hunah chuan Israel fate chu an lo kal ang a, anmahni leh Juda fate nên; ṭap chungin an lo kal ang a, LALPA an Pathian chu an zawng ang,” tih hi LALPA thuchhuak a ni.

⁵“Zion lam hawiin an pênna tûr an zâwt ang a, ‘Hawh u, chatuan thuthlung theihnghilh tawh loh tûrah chuan LALPA chu rawn vuan rawh u khai,’ an ti ang.

⁶“Ka mite chu berâm bo an ni a; an vêngtute chuan an hruai bo va, tlângahte chuan an kal botîr a, tlângahte, mual dungahte an kal a, an huang an theihnghilh zo ta.

⁷A hmu apiangin an ei zêl a, an hmêlmate chuan, ‘Kan thiam loh a ni lo, LALPA, dikna khurpui, an thlahtute nghahfâk LALPA meuh chungah thil an tihsual vâng a ni,’ an ti a.

⁸Babulon chhûng ata tlân chhuak ula, Kaldaite ram ata kal chhuak ula, kêl rual zînga kêlchalte angin awm rawh u.

⁹Ngai teh u, Babulon rawn bei tûrin hmâr ram ata hnam rual ropui tak pung khâwm chu ka chawk tho vang a, amah do tûrin an insingsa ang; chuta ṭang chuan lâk an ni ang. An thalte chu râl tuk thiam tak hlawhchham ngai lo ang an ni ang.

¹⁰Tin, Kaldai chu rawk a ni ang a, a rawktute chu an tlai êm êm ang,” tih hi LALPA thuchhuak a ni.

¹¹“Lâwm mah ula, hlim mah ula, Aw ka rochan rawktute u, Hnim no zînga bâwngla tla ngelh ngelh ang leh, Sakawrpa hrâm ngher ngher ang ni mah ula,

¹²In nu chu a la zak êm êm ang a, A hringtu che u chu a la mualpho vang. Ngai rawh u, hnamte zînga hnuaihnung ber, Thlalêr ram, ram ro, ram ruak a ni ang.

¹³ LALPA thinurna avângin luahin a awm lo vang, A ram vek zâwk ang; Babulon-a kal apiang chu a râp ang a, A chhiatna zawng zawng avâng chuan an chek ang.

¹⁴Thal ngul kengtu zawng zawngte u, Babulon hual vêlin intlar ula, Kâp ula, thalte chu ren suh u, LALPA chungah an sual ta si a.

¹⁵A vêlin hawhaw ula; Amahin a inpe ta, A kulhte chu a tlu ta a, A bangte chu a chim ta, LALPA phuba lâkna a ni si a; A chungah phuba la ula, A tih ang zêlin a chungah ti rawh u.

¹⁶Babulon ata chi thehtu râwt bo ula, Buh seng laia favah chawitu nên, Hnehchhiahna khandaih hlauvin, Mahni mite lam an pan ṭheuh vang a, Mahni ram ṭheuhvah an tlân ang.

¹⁷“Israel chu berâm darhsarh a ni a; sakeibakneiten an ûm bo va; Assuria lal chuan amah a ei zet a, a tâwpah Babulon lal Nebukadnezzara chuan a ruhte a ṭhial sawm ta a.”

¹⁸Chuvângin, sipaihote LALPA, Israel Pathian chuan heti hian a ti: “Ngai rawh u, Assuria lal ka hrem ang bawkin Babulon lal leh a ram chu ka hrem ang.

¹⁹Tin, Israel chu a tlatnaah ka hruai leh ang a, Karmel leh Basan-ah chuan a tla ang a, Ephraim tlângah leh Gilead-ah chuan amah chu a tlai ang.

²⁰Chûng niahte leh chutih hunah chuan Israel khawlohnate chu an zawng ang a, hmuh tûr a awm lo vang; Juda thil tihsualte pawh hmuh tûr a awm hek lo vang; awm chhun atân ka zuahte chu ka ngaidam dâwn si a,” tih hi LALPA thuchhuak a ni.

²¹“Merathaim ram bei rawh u, A ram leh Pekod luahtute ngei chu: That ula, an kuangbâng chenin râwt bo vek ula, Thu ka pêk ang zêlin ti ang che u,” Tih hi LALPA thuchhuak a ni.

²²“Chu ramah chuan râl thâwm a awm, Chhiatna nasa tak thâwm nên.

²³Khawvêl pum pui tuboh chu a phelin, A va keh sawm nasa êm! Hnamte zîngah Babulon chu a va ram nasa ta êm!

²⁴Aw Babulon, i tân thang ka kam e, Hre lovin i âwk ta a nih hi; Hmuh chhuah leh manin i awm ta, LALPA i beih avângin.

²⁵ LALPA chuan a râlthuam bâwm a hawng ta, A thinurna hriamhreite chu a la chhuak ta, LALPA, sipaihote LALPA chuan Kaldaite ramah tih tûr a nei.

²⁶Ramri tâwpkhâwk aṭangin rawn bei ula, A thil dah khâwmna inte chu hawng vek ula, Theh khâwm ula, tichhe vek rawh u, A eng mah rêng zuah lovin.

²⁷A bâwngpatuaite chu tihlum vek ula, Talhin awm vek rawh se. An chung a va pik êm! An ni a lo thleng ta si, Anmahni hremna ni ngei chu.

²⁸“LALPA kan Pathian phuba lâk, a biak in phuba lâkna ngei chu, Zion-a hril tûra Babulon aṭanga tlân chhuak leh tlân bote thâwm chu!

²⁹“Babulon bei tûrin thal kah thiam, thal ngul hmangtu zawng zawng chu ko khâwm rawh u; a vêlin bûk khuar ula, tu mah chhuak suh se. A thiltih ang zêlin thungrûl rawh u, a tih tâk ang zawng zawng chu a chungah ti rawh u; LALPA, Israel Mi Thianghlima chu a cho ngam si a.

³⁰Chuvângin, a tlangvâlte chu a khawlaiahte an tlu ang a, râl tu mi zawng zawng chu chumi niah chuan an boral ang,” tih hi LALPA thuchhuak a ni.

³¹“Ngai rawh, nang mi chapo, ka do che a ni!” LALPA, sipaihote LALPA chuan a ti. “I ni a lo thleng ta, i hremna tûr ni chu.

³²Tin, mi chapo chu a petekin a tlu ang a, Tu mân an kai tho lo vang, Tin, a khawpuiahte chuan mei ka chhuah ang a, A vêla awm zawng zawngte chu a kâng fai vek ang.”

³³Sipaihote LALPA chuan heti hian a ti: “Israel fate leh Juda fate chu hnehchhiahin an awm ta a; sala hruaitute zawng zawng chuan an vuan tlat a, an chhuah duh hauh lo.

³⁴An tlantu erawh chu a chak a ni; a hming chu sipaihote LALPA a ni. Ani chu an lamah a ṭang ang a, Babulon-a chêngte chu tibuaiin, khawvêlah muanna a thlen theih nân.

³⁵“Kaldai mite chungah khandaih a lêng e, Babulon-a chêngte, a hotute leh a mi fingte chungah pawh,” Tih hi LALPA thuchhuak a ni.

³⁶“Mi dawtheite chungah khandaih, Mi â an lo chang ang! A râl tu mi chungah khandaih, An zâm zo vang.

³⁷An sakawrte leh tawlailîrte chungah khandaih, A chhûnga mi inpawlhsawp zawng zawng chungah pawh, Hmeichhia ang mai an lo ni ang. A ro thil chungah khandaih, Rawkin an awm mai ang.

³⁸A tuite kangin a ro zo va. Milimte ram a ni si a, Milimte chu an âtchilh a.

³⁹“Chuvângin, thlalêr ram sakawlhte, chinghniate nên chutah chuan an chêng ang a, vanghâwngseite pawh chutah chuan an chêng ang; luahin a awm ngai tawh lo vang; chhuan zawng zawng thleng pawhin luahin a awm lo vang.

⁴⁰Pathianin Sodom leh Gomorra leh a khaw ṭhenawmte a tihchhiat ang hrim khân; tah chuan tu mah an chêng tawh lo vang a, mihring fa tu mahin an tlawh tawh lo vang,” LALPA thuchhuak chuan a ti.

⁴¹“Ngai rawh u, hmâr lam ram ata mite an lo kal e. Lei hmun tâwp ata hnam ropui tak leh lal tam tak an lo thawk e.

⁴²Thal ngul leh fei an keng a, Nunrâwng tak, zahngaihna rêng rêng nei lo an ni. An thâwm chu tuipui ri hum hum ang a ni a; Sakawr chungah te an chuang a, Mi tin râl tu mi anga inthuamin, Aw, Babulon fanu, an rawn bei dâwn che.

⁴³An thâwm hriain Babulon lal kut a zâwi ta; Hmeichhe nau vei lai natna ang, Natna nasa takin a vuan ta.

⁴⁴“Ngai rawh u, Jordan ramngaw aṭanga sakeibaknei, ran thlahna hmuna lo chho angin a lo chho vang a; a lak aṭangin anmahni ka tlân botîr nghâl ang a; a chunga thunei tûrin ka duh apiang ka ruat ang. Keimah ang hi tu nge awm ni? Tuin nge hunbi mi thliahsak ang? Berâmpu tu nge ka hmaa ding tûr?

⁴⁵Chuvângin, Babulon chungah LALPA thurâwn, Kaldai mite chunga a thil ruat chu ngaithla rawh u. Ran rual note ngei chu hnuh bovin an awm ang a, ran thlahna hmuna mite a râp ang.

⁴⁶Babulon lâk thâwmah lei a nghîng a, a ṭap thâwm chu hnamte zîngah hriat a ni ang.”