Read Mizo_Old_version Jeremia 51 Bible Online

Jeremia 51 - Mizo_Old_version bible

Jeremia 51

¹ LALPA chuan heti hian a ti: “Ngai teh, Babulon chungah leh Kaldai mite chungah, Tichhetu thlipui ka tîr dâwn e;

²Sisêp zâptute ka tîr dâwn, Babulon chungah, Amah zâpin a ram an zâp fai ang, Chhiatna niah chuan hualin an bei dâwn si.

³Thal ngul hmangtuin thal ngul kuai lovin, Thîr kawr hain din pawh ding suh se, A tlangvâl rual pakhat pawh zuah lovin, A sipai zawng zawng nuai bo rawh u.

⁴Kaldai ramah thahin an tlu ang a, A khawlaiahte chuan chhun tlang an ni ang.

⁵Israel leh Juda chu an Pathian, sipaihote LALPA chuan A hnuchhawn si lo va, An ram chu Israel Mi Thianghlima chunga Sualnain a khat na a.”

⁶Tlân bo ula, Babulon khaw chhûng ata, Mi tinin mahni nun chhanhim rawh se! A khawlohna boral phah suh u, LALPA phuba lâk hun chu a ni si a. Ani chuan a thungrûl ngei dâwn a ni.

⁷Babulon chu LALPA kuta rangkachak no, Lei pum tihruihna chu a ni a, Hnamten a uain chu an in a; Chuvângin, hnamte lung a mâwl zo ta.

⁸Babulon chu a tlu thut a, a boral ta. Amah chu ṭah vak vak rawh u, Tihdam theih âwm a nih chuan Thinghnai damdawi hnawih mi lâksak rawh u.

⁹Babulon chu tihdam ka tum a, A dam chuang si lo, Amah kalsanin mahni ram ṭheuhvah i kal ang u, A thiam lohnain vân a tawng a, Vân dum thlenga chawi kân a ni.

¹⁰ LALPA chuan ka dikna a puang ta; Hawh u, Zion-ah i puang ang u, LALPA kan Pathian thiltih chu.

¹¹Thalte chu tât hriam ula, phâwte chelh rawh u, Media lalte rilru chu LALPAN a chawk tho ta. A thiltum chu Babulon tihchhiat thu a ni si, Chu chu LALPA phuba lâkna a ni si a, A biak in phuba ngei chu.

¹²Babulon kulh bulah indo puanzâr târ rawh u, Vênna tichakin, râlvêngtu dah rawh u, Lambunnate siam ula, Babulon mite chungchâng thua LALPAN a sawi kha, a rêlin a tizo ta si.

¹³Aw, nang tui tam hmuna chêng mi, Sum leh pai ngah êm êmtu, I tâwpna chu a thleng ta, I nunna hrui a chat ta e.

¹⁴Sipaihote LALPA chuan mahni inchhâlin chhia a chham ta: “Khau ang maiin mihringin ka tikhat ngei ngei ang che. Nasa takin an hawhaw khum ang che.”

¹⁵A thiltihtheihnain lei a siam a, A finnain khawvêl a din a, A remhriatnain vân a tiparh a.

¹⁶A aw a chhuah chuan, Vâna tui a ri hum hum a: “Kâwlkil ata chhûm a chhohtîr a; Ruah sûr nân kâwl a phêttîr a; A ro bâwm ata thlî a tlehtîr a.”

¹⁷Mi tin an mâwl, hriatna lovin; Rangkachak chhertute chu an milem chherin a tizak a; A milim chhûn chu dâwt mai a ni si, Anmahniah thaw pawh a awm lo.

¹⁸Engmahlo mai an ni, bumna hna mai, Hrem an nih hunah an bo mai ang.

¹⁹Jakoba chanvo zawng hetiang a ni lo, Thil zawng zawng bul a ni si: Israel hi a ro luah hnam a ni a. A hming chu sipaihote LALPA a ni.

²⁰“Nang chu ka râl do hreipui leh hriamhrei i ni ṭhîn a: Nangmah hmangin hnamte chu ka tisawm a; Nangmah hmangin lalna ramte chu ka tibo va;

²¹Nangmah hmangin sakawr leh a chung chuang ka tisawm a; Nangmah hmangin tawlailîr leh a chunga chuang ka tisawm a;

²²Nangmah hmangin hmeichhia leh mipa ka tisawm a; Nangmah hmangin putar leh tleirâwl ka tisawm a; Nangmah hmangin nula leh tlangvâl ka tisawm a;

²³Nangmah hmangin berâmpu leh berâm rual ka tisawm a; Nangmah hmangin lo neitu leh bâwngpa tuak ka tisawm a; Nangmah hmangin ram awptute leh puitute ka tisawm ṭhîn a nih kha.

²⁴“Nangma mit hmuh ngeiah Zion chunga an thil ṭha lo tih zawng zawng chu, Babulon leh Kaldai mite chungah ka thungrûl ang,” tih hi LALPA thuchhuak a ni.

²⁵“Ngai rawh, lei pum pui tichhetu, Aw, tichhetu tlâng lian, ka do che a ni,” Tih hi LALPA thuchhuak a ni. “I chungah ka kut ka lek ang a, Khâm sâng ata ka lum thla ang che, Tlâng kâng rêm tawhah ka siam ang che.

²⁶I hnên ata a kila lung tûr leh lungphum tûr Lâk chhuah a ni tawh lo vang; Kumkhuain i ṭiau zâwk ang,” Tih hi LALPA thuchhuak a ni.

²⁷Chumi ramah indo puanzâr târ ula, Hnamte zîngah tawtawrâwt hâm rawh u! Amah do tûr hnamte buatsaih ula: Ararat te, Minni te, Askenaz ram te, Amah bei tûrin ko khâwm rawh u. Amah bei tûrin sipai hotu ruat ula, Khau puang ang maiin sakawrte pun khâwm rawh u.

²⁸Amah do tûr hnamte buatsaih ru, Media lalte, awptute, leh a puitute, A thuneihna ram zawng zawng nên.

²⁹Chu ram chu na tuarin a khûr a, Babulon ram, luahtu awm lova tiṭiau tûrin, Babulon chunga LALPA thiltum chu a ding reng a ni.

³⁰Babulon râl tu mite chu an ralbâng ta, An kulhpuiah an tawm reng e; An pachanna a dai a, hmeichhia ang mai an lo ni ta; An chênna hmunte a kâng zo va, A daidanna thîr tlâwn a tliak.

³¹Zualko tlân chuan mi dang pawh a tâwk a, Mi tirh chuan mi dang a tâwk bawk a, Babulon lal hnênah a khawpui chu Kil tinan an man ta tih hrilh tûrin;

³²Lui kainate chu an man a, Phairuangte an hâl fai a, Indo mite pawh an zâm zo ta.

³³Sipaihote LALPA, Israel Pathian chuan heti hian a ti: “Babulon fanu chu hruihzâwl rah bel lai ang a ni a, Rei lo teah buh chîl hun a chungah a lo thleng ang.”

³⁴“Mi ei zo ta, Babulon lal Nebukadnezzaran, Mi ṭhial sawm a, bêl ruak maiah mi siam ta; Rûlpui angin mi dawlh ta, Ka sa tui tuiin a pum a tikhat a, Mi paih chhuak leh ta a.

³⁵Kei leh ka tisa chunga pâwngnêk thiltih hi, Babulon chungah awm rawh se,” Zion-a chêngten an ti ang; “Ka thisen chu Kaldai mite chungah awm rawh se!” Jerusalem-in a ti ang.

³⁶Chuvângin, LALPAN heti hian a ti: “Ngai rawh, i lamah ka ṭang ang a, I phuba ka lâksak ang che. A tuipui ka tikang ang a, A tuikhur pawh ka tirochâr ang.

³⁷Tin, Babulon chu chhe vawm khâwm mai, Sihal chênna hmun, Mak tih huai huai leh chek khum, Luahtu awm lo hmun a lo ni ang.

³⁸Sakeibaknei vânglai angin an hûk dum dum ang a, Sakeibakneino angin an hrâm tuar tuar ang.

³⁹An ruih lungpuam hunin ruai ka ṭhehsak ang a; Ka tirui ang, nikhaw hre lo dêrin, ṭhangharh lo tawp tûra an mut hlen theih nân,” Tih hi LALPA thuchhuak a ni.

⁴⁰Ka hruai thla ang, berâmno talh tûr angin, Berâmpate, kêlpate ang maiin.

⁴¹“Sesak chu lâk a nih tâk chu! Lei pum pui chawimawi ṭhin chu manin a awm tâk hi! Hnamte zînga Babulon a ṭiau tâk chu!

⁴²Babulon chu tuipuiin a chîm ta; A fâwn nasa tak chuan a khuh zo ta.

⁴³A khawpuite chu a ṭiau zo va, Ram ro thlalêr, mihring rêng chên lohna, Mihring fa tu ma tlawh loh ram a lo chang ta.

⁴⁴Babulon-a Bela chu ka hrem ang, A lem tawh hnu chu a kâ ata ka phawrh chhuak ang; Hnamte chu a hnênah an inhâwr khâwm tawh lo vang. A ni, Babulon kulhpui chu a chim ang.

⁴⁵Ka mite u, a chhûng ata lo chhuak ula, LALPA thinur hlauhawm tak ata, Mi tin mahni inchhanhim rawh u.

⁴⁶In thinlung chau suh sela, Chu rama thuthang chu hlau hek suh u; Kum khatah thuthang a lo thleng ang a, Kum dangah thuthang a lo thleng leh dâwn si a, Lal leh lal inbeiin ramah pâwngnêkna a awm ang.

⁴⁷Chuvângin, ngai rawh u, nite a lo thleng e, Babulon milem chher chawpte chunga Ro ka rêla, a ram pum pui a zahna tûr ni chu; Tin, a chhûngah a mi thahte chu an tlu ang.

⁴⁸Hmâr lam ata rûntute an lo thlena, Babulon chu an rawn tihchhiat hunah, Lei leh vân leh a chhûnga awm zawng zawng chu hlimin an zai ang,” Tih hi LALPA thuchhuak a ni.

⁴⁹Babulon chuan Israel mi thahte a tlûktîr angin, Babulon-ah chuan ram tina mi thahte an tlu ang.

⁵⁰Nangni khandaih pumpelhtute u, kal ula, ding mai mai suh u! Hla tak aṭangin LALPA hre reng ula, In rilruah chuan Jerusalem lût rawh se.

⁵¹Sawichhiatna thu kan hriat avângin kan zak a, Kan hmuihmai a lo buai zo ta, LALPA ina hmun thianghlimahte chuan Awze mite an lo lût ta si a.

⁵²“Chuvângin, ngai rawh u, nite a lo thleng e,” Tih hi LALPA thuchhuak a ni, “An milem chher chawpte chunga Ro ka rêlna tûr leh, A ram pum pui chunga mi hliamte rûmna ni tûr chu.

⁵³Babulon chu vân tawngin sâng mah se, A kulh sângte chu tinghet mah se, A chungah ka hnên ata tichhetute chu an lo thleng tho vang,” Tih hi LALPA thuchhuak a ni.

⁵⁴Babulon aṭanga ṭap thâwm leh Kaldai ram aṭanga chhiatna nasa tak thâwm chu.

⁵⁵ LALPAN Babulon chu a rûn a, An thâwm nasa tak mai chu a tihrehsak a. An che vêl thâwm chu tui tam tak ri hum hum ang a ni, An hawhaw dur dur a.

⁵⁶A chungah rûntu a lo thleng, Babulon ngei chungah, a mi chakte manin an awm a, An thal ngulte a tliak sawm ta; LALPA chu thungrûltu Pathian a ni si a, A thungrûl ngei ngei ang.

⁵⁷“Tin, a hotute leh a mi fingte, A awptute leh a puitute Leh mi chakte chu ka tirui ang; An mu hlen ang a, an ṭhangharh lo vang,” Tih hi Lalber, a hming sipaihote LALPA thuchhuak chu a ni.

⁵⁸Sipaihote LALPA chuan heti hian a ti: “Babulon lal kulh bang chhah takte chu a chim vek ang a, A kawngka sâng takte chu a kâng vek ang; A mite chuan a thlâwnin an thawk a, Hnamte chu mei atân mai an intihah a lo ni.”

⁵⁹Juda lal Zedekia lal kum linaa Babulon-a a kal laia a hnêna kal ve Seraia, Maaseia fapa Neria fapa hnêna zâwlnei Jeremia thupêk chu. Seraia chu lal in chhûng hotu ber a ni a.

⁶⁰Tin, Jeremia chuan Babulon chunga chhiatna lo thleng tûr zawng zawng, Babulon chungchânga hêng thuziak zawng zawng hi lehkhabuah a ziak a.

⁶¹Tin, Jeremia chuan Seraia hnênah, “Babulon i thlen hunah chuan hêng thu zawng zawng hi chhiar ngei la,

⁶²‘Aw LALPA, he hmun chungchângah hian tu mah, mi leh sa pawh, chên lohna tûra râwt bova awmin, kumkhuaa ram zâwk tûrin thu i sawi tawh a,’ ti ang che.

⁶³Tin, heti hi a lo ni ang a, he lehkhabu hi i chhiar zawhah lung nên ṭâwn belhbawmin Euphrates luiah paih lût la,

⁶⁴‘Babulon chu hetiang mai hian a pil ang, a chunga chhiatna ka rawn thlen tûr avângin a tho leh tawh lo vang; an chau êm êm ang,’ tiin i sawi tûr a ni,” a ti a. Heti zawng hi Jeremia thu chu a ni.