Read Mizo_Old_version Jeremia 6 Bible Online

Jeremia 6 - Mizo_Old_version bible

Jeremia 6

¹“Benjamina fate u, Jerusalem chhûng ata In himna tûrin tlân bo ula; Tekoa-ah tawtawrâwt hâm ula Beth-hakkerem-ah hriattîrna chhuah rawh u. Hmâr lam ata chhiatna a lo thawk e, Tihchhiatna nasa tak mai chu.

²Zion fanu hmelṭha tak leh no tak chu Ka tibo vang.

³Berâmpute, an berâm rualte nên a hnên an lo thleng ang a, A vêlah an puan inte an kaih ang a, Mahni hmun ṭheuhvah an tla ang.”

⁴“Amah do tûrin inpuahchah rawh u, Tho ula, chhûn laiah i bei ang u, Kan tân a va pawi em! Ni a lo her ta a, Tlai lam hlim a lo sâng ta.

⁵Tho ula, zânah i bei mai ang u khai! A in ṭha ṭhate i tichhia ang u.”

⁶Sipaihote LALPA chuan heti hian a ti: “A thingte kit ula, Jerusalem beih nân mual pâwng siam rawh u, Khawpui hrem tûr chu hei hi a ni. A chhûngah chuan hnehchhiahna hlîr a ni.

⁷Tuichhunchhuahin tui a tichhuak ang maiin A suahsualna chu a tichhuak ṭhîn, A chhûngah chuan pâwngnêkna leh inrawkna a awm tih hriat a ni a, Ka hmaah chuan natna leh inhliamnate a awm reng.

⁸Ka rilruin a hransan daih hma che hian Aw Jerusalem, fîmkhur hle rawh, Chuti lo chuan, luahtu nei lo rama siam chein, Thlalêrah ka siam hlauh dah ang che.”

⁹Sipaihote LALPA chuan heti hian a ti: “Israel awm chhunte chu grêp angin lo fai vek ula, Grêp lotu angin a zârte chu vai nawn rawh u.”

¹⁰An ngaihthlâk theih nân tu nge ka biak anga, Tu nge ka hriattîr ang? Ngai teh, beng lam serh tan loh an ni a, an ngaithla thei lo; Ngai teh, LALPA thu chu an tân thil hmuhsitawm a ni a, Lâwmna rêng an nei ta lo.

¹¹Chu vâng chuan LALPA thinurnain ka khat a, Insûm hi ka ning ta. “Khawlaia naupang chungah hrithla la, Tlangvâl awm khâwmte chungah pawh, A nupui rualin pasal pawh lâk a ni ang a, Upate leh tarchhiate pawh.

¹²An inte chu mi dang hnênah pêk a ni ang a, An thlawhhmate leh an nupuite nên; Chumi rama chêngte chungah chuan ka kut ka lek dâwn si a,” Tih hi LALPA thuchhuak a ni.

¹³“A tê ber aṭangin a lian ber thleng pawhin, Mi tin duhâmnain an khat si a; Zâwlneite leh puithiamte meuh pawh, Mi tin dik lo takin an che a ni.

¹⁴Ka mite hliamte chu ngaihsam takin, ‘A ṭha alâwm, a ṭha alâwm!’ tiin an thawi a, A ṭha hauh si lo va.

¹⁵Thil tenawm an tih pawhin an zak em ni? Hnai lo ve! An zak tawp lo va, an hmai pawh a sen hek lo. Chuvângin, tlute zîngah chuan an tlu ve ang; Anni ka hrem hunah chuan paihthlâkin an awm ang,” LALPAN a ti.

¹⁶ LALPA chuan heti hian a ti: “Kalkawngahte ding ula, en rawh u, Kawng ṭha awmna kawng hlunte chu zâwt rawh u, Tah chuan kal ula, In thlarau tân chawlhna in hmu ang. Anni erawh chuan, ‘Tah chuan kan kal lo vang,’ an ti a.

¹⁷Tin, in tân râlvêngtute ka ruat a, ‘Tawtawrâwt ri chu ngaithla rawh u,’ tiin. Anni erawh chuan, ‘Kan ngaithla lo vang,’ an ti a.

¹⁸Chuvângin, aw, hnamte u, ngaithla ula, Aw, pung khâwmhote u, an chunga lo thleng tûr chu hre rawh u.

¹⁹Aw, leilung, ngaithla rawh! Ngai teh, he mite chungah hian chhiatna ka rawn thlen dâwn - An ngaihtuahna rahte ngei chu; Ka thute an ngaihthlâk loh avângin; Ka dânte lah chu an paihthla dêr a.

²⁰Eng atân nge Seba ata beraw te, Ram hla tak ata fu te ka hnên a lo thlen ṭhin le? In hâlral inthawinate chu lawm tlâk a ni lo va, In inthawinate chuan mi tilâwm hek lo.”

²¹Chuvângin, LALPAN heti hian a ti: “Hêng mite hnênah hian tlûknate ka dah ang a, Tah chuan pate chu an fapate nên an tlu za ang a, ṭhenawm leh a ṭhian pawh an boral ang.”

²²Tin, LALPA chuan heti hian a ti: “Ngai rawh u, hmâr lam ram ata mite an lo kal e, Lei hmun tâwp ata hnam ropui tak mai an lo thawk chhuak e.

²³Thal ngul leh fei an keng a, Nunrâwng tak, zahngaihna rêng rêng nei lo an ni, An thâwm chu tuipui ri hum hum ang a ni a; Sakawr chungahte an chuang a, Mi tin râl tu mi anga inthuamin, Aw, Zion fanu, an rawn bei dâwn a che.”

²⁴An thangva kan hria a, kan kutte a zâwi zo ta, Nâ chuan min man ta, Hmeichhe nau vei nâ ang mai chu.

²⁵Ramah kal chhuak suh ula, Kalkawngah pawh kal hek suh u, Tah chuan hmêlma khandaih a awm si a, Kil tinah râl a ṭi e.

²⁶Aw, ka mi, ka fanu, saiip puan fêng la, Vut zîngah tâl rawh; Fapa mal sûn angin sûn la, ṭap vak vak teh, Tichhetu kan chungah a lo thleng thut dâwn si.

²⁷“Ka mite zîngah chhintuah leh fiahtuah ka siam chia, An awm dân i hriata, i fiah theih nân.

²⁸An zain hel hmang, luhlul tak, Sawichhiat hmanga vâk vêl, Dâr leh thîr ang an ni a, Chhe takin an che a.

²⁹Pûmin a chhêm huau huau va, Meiah chuan suan chu a tui ral a, Tihthianghlim tumna chu a thlâwn mai a ni, Mi sualte paih bo an ni si lo.

³⁰Mite chuan tangkaraw êkchhia an vuah ang, LALPAN anmahni a hnâwl avângin.”