Read Mizo_Old_version Jeremia 7 Bible Online

Jeremia 7 - Mizo_Old_version bible

Jeremia 7

¹ LALPA hnên ata Jeremia hnêna thu lo thleng chu:

²“LALPA in kawngkâah chuan ding la, chutah chuan he thu hi puang la, heti hian ti rawh: ‘Nangni Juda mi zawng zawng, LALPA be tûra hêng kawngkâa lûtte chuan LALPA thu hi ngaithla rawh u!’”

³Sipaihote LALPA, Israel Pathian chuan heti hian a ti: “In awm dân leh in thiltihte chu siam ṭha ula, he hmunah hian ka chêntîr ang che u.

⁴‘Hei hi LALPA in, LALPA in, LALPA in a nih hi,’ tih dâwt thute hi ring suh u.

⁵“In awm dân leh in thiltihte chu in siam ṭhat takmeuhva, mi leh a ṭhenawm kâra thu dik taka in rêlsaka,

⁶hnam dang mite, pa nei lote, hmeithaite in hnehchhiah lohva, he hmunah hian mi fel thisen in chhuah lohva, in ṭhat lohna tûra pathian dangte in zui hek loh chuan,

⁷he ram, hmasâng ata in thlahtute hnêna ka pêkah hian kumkhuain ka chêntîr ang che u.

⁸Ngai rawh u, dâwt thu, sâwtna awm hlei lo chu in ring zâwk a.

⁹Rûkruin, tualthatin, uirêin, dâwta chhia chhamin Baala hnênah rimtui hâlin, pathian dang, in hriat ngai lohte zuiin,

¹⁰he in, keima hming ngei vuahah hian ka hmaah lo dingin, hêng thil tenawm zawng zawngte hi ti zêl chungin, ‘Chhanchhuah ka ni ta,’ in ti dâwn em ni?

¹¹He in, ka hming ngei vuah hi, in mit hmuhah suam hmangte pûk ang em ni? Ngai teh u, kei, keimah ngei hian ka hmu alâwm,” tih hi LALPA thuchhuak a ni.

¹²“A tîra ka hming ka chêntîrna, ka hmun Silo-ah chuan kal teh u, ka mi Israel-te suahsualna avânga ka thiltih chu va en rawh u.

¹³Tûnah hian hêng thil zawng zawngte hi in tiha, zîng tak taka thova in hnêna thu ka sawi ka sawite hi in ngaihthlâk lohva, ka lam che ua in chhân loh avâng hian,

¹⁴Silo chunga ka tih ang khân he in, ka hming vuah, nangmahni leh in thlahtute hnêna ka hmun pêk, in rin ṭhin chungah hian ka ti dâwn a ni.

¹⁵In unau zawng zawng, Ephraim chi pum pui meuh pawh ka paih chhuak ang khân, ka mit hmuh ata ka paih chhuak ang che u,” tih hi LALPA thuchhuak a ni.

¹⁶“Chuvângin, hêng mite tân hian ṭawngṭai suh la, au chhuakin ṭawngṭai suh la, ka hnênah dîlsak hek suh; ka ngaithla dâwn si lo che a.

¹⁷Juda khawpuiahte leh Jerusalem kawtlaiahte an thiltih chu i hmu lo vem ni?

¹⁸Naupangten thing an fawm a, an paten mei an chhêm a, hmeichhiaten vân lalnu hnêna hlan tûr chhang an hmet a, pathian dangte tân in tûr thilhlan an hûng chhuak a, mi tihthinrimna mai tûrin.

¹⁹Keimah em ni mi tihthinrim? Anmahni zahna tûrin anmahni a ni zâwk lâwm ni?” tih hi LALPA thuchhuak a ni.

²⁰Chuvângin, Lalpa PATHIAN chuan heti hian a ti: “Ngai teh u, he hmun chungah te, mi leh sa chungah te, rama thing leh lei rah chungah te ka thinrimna leh thinurna chu ka hrithla ang; a kâng ang a, a mit lo vang.”

²¹Sipaihote LALPA, Israel Pathian chuan heti hian a ti: “In inthawinaahte chuan hâlral inthawinate belh ula, sa ei rawh u.

²²Hâlral thilhlante emaw, inthawinate emaw chungchângah chuan in thlahtute hnênah thu ka sawi lo va, Aigupta ram ata ka hruai chhuah lai pawh khân thu ka pe hek lo.

²³‘Ka aw ngaithla ula, in Pathian ka ni ang a, nangni pawh ka mite in ni ang; in ṭhat theihna tûrin in awm dân tûr ka hrilh zawng zawng che u hi zâwm rawh u,’ tiin thu ka pe zâwk a ni.

²⁴Mahse, an ngaithla lo va, beng an dawh hek lo; an thinlung sual chhu chhêtin anmahni thu thuin an awm ta zâwk a, hma lam pan aiin an hnungtawlh ta zâwk a ni.

²⁵In thlahtute Aigupta ram ata an chhuah ni aṭanga vawiin ni thleng hian ka rawngbâwltu, zâwlnei zawng zawngte zîng tak taka thovin in hnênah ka tîr ni tin ṭhîn a.

²⁶Mahse, mi ngaithla chuang lo va, beng an dawh hek lo. An rilru an tikhauh va, an thlahtute aiin an sual ta zâwk a.

²⁷“Tin, hêng thu zawng zawngte hi an hnênah i sawi tûr a ni; mahse, an ngaithla lo vang che. Anmahni i ko vang a, an chhâng lo vang che.

²⁸An hnênah, ‘He hnam hi LALPA an Pathian aw ngaithla lova, thununna dawng lo hnam an nih hi,’ i ti ang a. Thu dik a boral ta, an kâ ata paih bo a ni ta.

²⁹‘I sam tan la, paih bo la, hmun sâng kawlhahte ṭap chhuak rawh; LALPAN a thinurna dawngtu chhuanhote chu paihthlain a hnuchhawn ta si a.’

³⁰“Juda fate chuan ka mit hmuhah thil sual an ti si a,” tih hi LALPA thuchhuak a ni. “Ka hming vuah inah chuan tibawlhhlawh tûrin an thil tenawmte chu an dah ta.

³¹An fanute, an fapate hâl tûrin Ben-hinom ruamah chuan Topheth bâwlhmunte an siam a; chûng chu ka thupêk a ni lo va, ka rilruah pawh a lût ngai hek lo.

³²Chuvângin, ngai teh u, nite chu a lo thleng dâwn,” tih hi LALPA thuchhuak a ni. “Chu ruam chu ‘Topheth’ vuah a ni tawh lo vang a, ‘Ben-hinom ruam’ vuah a ni hek lo vang; ‘Insâmna ruam’ vuah a ni tawh zâwk ang; Topheth-ah chuan an phûm ang a, phûmna tûr hmun dang a awm tawh loh avângin.

³³Mite ruang chu chunglêng savate leh ramsate chaw a ni ang. Tu mân an hnawt bo lo vang.

³⁴Tin, Juda khawpuiahte leh Jerusalem khawlaiahte chuan hlim thâwmte leh lâwm rite, moneitu awte, mo awte pawh ka tireh ang. Ram chu tihchhiat a ni dâwn si a.