Read Mizo_Old_version Jeremia 8 Bible Online

Jeremia 8 - Mizo_Old_version bible

Jeremia 8

¹“Chumi hunah chuan Juda lalho ruhte, a hotute ruhte, puithiamho ruhte, zâwlneiho ruhte, Jerusalem-a chêngho ruhte chu an thlân ata an la chhuak ang a,

²ni te, thla te, vâna awm zawng zawng - an hmangaiha, a rawng an bâwla, an zuia, an zawna, chibai an bûkate hmaah chuan an pho chhuak ang. Lâk khâwm an ni tawh lo vang a, phûm an ni hek lo vang; lei chunga êkdûr mai tûr an ni ang.

³Hemi chhûngkaw sual tak la awm chhun zawng zawng, ka hnawh darhna hmuna la châmbângte chuan nun aiin thih an thlang zâwk ang,” tih hi sipaihote LALPA thuchhuak a ni.

⁴“Chu lo pawh chu an hnênah heti hian i sawi tûr a ni: LALPA chuan heti hian a ti: Mi an tlûkin an tho leh lo vang em ni? Mi a pên bovin a lo kîr leh lo vang em ni?

⁵Engati nge he Jerusalem mite hi, Kumkhuaa hnungtawlh tûra an tawlhthlûk tâk le? Bumna an vuan tlat, kîr leh an duh lo.

⁶Ka beng chhiin ka ngaithla a, Tu mân thu dik an sawi lo. Tu mân, ‘Eng nge ka tih tâk?’ tiin an suahsualna an sim hek lo; Mi tinin mahni kawng an hawi ta ṭheuh va, Indona hmuna sakawr lîm buan buan ang maiin.

⁷A ni, vâna vacha chuan a hunbite a hria a, ṭhuro te, vamûr te, kânghlai te chu a hun takah an lo thleng ṭhîn a. Ka mite erawh chuan LALPA thuruat an hre lo.

⁸Engtin nge, ‘Mi fing kan ni, LALPA dân chu kan hnênah a awm,’ in tih ni? Ngai teh u, lehkhaziaktute kawlawm dawthei chuan, Dâwtah an chantîr zâwk a ni.

⁹Mi fingte chu an zakin an zâm ang a, Manin an awm ang. Ngai teh u, LALPA thu chu an paihthla a, Anmahniah eng finna nge awm le?

¹⁰Chuvângin, an nupuite chu mi dangte hnênah ka pe ang a, An lote pawh a la neitu tûrte hnênah; Mi tin, a tê ber aṭanga a ropui ber thlengin Awh hmang an ni a. Zâwlnei aṭanga puithiam thleng pawhin, Mi tinin bum an hmang si.

¹¹Ka fanu, ka mite hliam chu ngaihsam takin, ‘A ṭha alâwm, a ṭha alâwm!’ tiin an thawi a, A ṭha hauh si lo va.

¹²Thil tenawm an tih hi an zak em le? Hnai lo ve! An zak hauh lo va, an hmêl pawh a sen hek lo. Chuvangin, tlute zîngah an tlu ve ang a, Anmahni hrem hunah chuan paihthlâkin an awm ang,” Tih hi LALPA thuchhuak a ni.

¹³“Anmahni ka tiboral vek ang,” Tih hi LALPA thuchhuak a ni: “Grêp hruite a rah lo vang a, Theipui kûngte a rah hek lo vang; A hnah pawh a vuai ang a, Anmahni chîm botu tûrte ka ruat tawh a ni.”

¹⁴“Engati nge kan la ṭhut reng le? Pung khâwm ula, khawpui kulh neiahte lût ula, Chutah chuan i boral dial ang u. LALPA chunga kan sual tâk avângin LALPA kan Pathian chuan tûr tui min intîrin, Boralnaah min dah a ni.

¹⁵Muanna kan zawng a, ṭhatna eng mah a lo thleng lo; Tihdamna hun tûr pawh, ngai teh, thlaphânna mai!

¹⁶An sakawr hnâr tum ri chu Dan aṭangin hriat a ni a, An sakawr chak hrâm thâwmah chuan ram pum pui chu a khûr a; An lo thleng a, a chhûnga awm zawng, An ei zo vek ta, khawpui leh a chhûnga chêngte nên.”

¹⁷“Ngai teh u, in zîngah rûlpui ka tîr ang a, Rûl tûr nei, khawi ngam rual lohte chu, Chûng chuan a chû ang che u,” Tih hi LALPA thuchhuak a ni.

¹⁸Aw lungngaihnaah hian inthlamuan thei tak ila aw! Chhûngrilah chuan ka thinlung a chau zo ta.

¹⁹Ngai teh u, ram hla tak ata, Ka fanu, ka mite ṭap thâwm chu: “Zion-ah chuan LALPA a awm lâwm ni? A chhûngah a LALPA a awm na nge?” “A milim siam chawpte leh hnam dang milemtein, Engah nge mi tihthinur ni?”

²⁰“Buh seng hun a liam ta, Nipui a tâwp ta, chhandamin kan la awm lo!”

²¹Ka mite, ka fanu natnaah chuan ka na ve si, Ka sûn a, thlaphânnain mi vuan ta.

²²Gilead-ah thinghnai damdawi a awm lâwm ni le? Chutah chuan tidamtu a awm na nge? Engati nge ka mite, ka fanu a hrisêl theih loh?