Read Mizo_Old_version Jeremia 9 Bible Online

Jeremia 9 - Mizo_Old_version bible

Jeremia 9

¹Ka lu hi tui ni se, ka mit hi mittui hnâr ni teh se aw! Ka mi, ka fanu thahte tân chhûn zânin ka ṭap tûr!

²Thlalêrah khualbûk nei thei ila aw! Ka mite kalsanin, awm bosan teh ila; Uire hmang mi an ni vek si a, Bum hmang awm khâwm mai an ni.

³“An lei chu thal ngul angin dâwtah an hmang a. Ramah an ṭhang lian, thutakah ṭhang lovin. Sual lamah an ṭhang zêl a, kei mi hre lovin,” Tih hi LALPA thuchhuak a ni.

⁴“Mahni ṭhenawm lakah fîmkhur ṭheuh ula, In unaute rêng ring suh u; Unaute chu bum hmang an ni si; ṭhenawmte pawh rêl hmang an ni.

⁵Mahni ṭhenawm ṭheuh an bum ang, Thu dik lah an sawi lo vang; An lei dâwt sawi an zirtîr a, Khawlohna thawkin an hah ṭhîn.

⁶Bum hmang zîngah i chêng a, An bumna avângin kei min hre duh lo,” Tih hi LALPA thuchhuak a ni.

⁷Chuvângin, sipaihote LALPAN heti hian a ti: “Ngai teh u, anni chu ka titui ang a, ka fiah ang; Ka mi, ka fanu avâng chuan eng dang nge ka tih tâk ang le?

⁸An lei chu thihna thal a ni a, bum thu a sawi ṭhîn; Miin kâin a ṭhenawm hnênah rem thu sawi mah se, A thinlungah amah chu a châng khiau ṭhîn.

⁹Hêng thiltihte avâng hian ka hrem lo vang em ni?” Tih hi LALPA thuchhuak a ni. “Hnam hetiang lakah hian phuba ka la lo vang maw?

¹⁰Tlângte tân ka ṭap ang a, ka chiau vawng vawng ang, Thlalêr hlobet hmunte ka sûn ang a, Tu ma kal tawh lohna tûra a kan zawh tâk avângin, Ran thâwm miten an hre tawh lo vang a, Chunglêng savate leh ramsate pawh an tlânchhia a, an kal bo tawh.

¹¹Tin, Jerusalem chu thil chhe awm khâwm maiah ka siam dâwn, Sihalte chênna hmun a ni ang; Juda khawpuite chu luahtu awm lovin ka tiram ang.”

¹²Hei hi hre thiam tûr mi fing chu tu nge ni? Puang tûra LALPA thusawi lo dawngtu chu tu nge ni? Eng vângin nge ram chu a chhiat zawha, tu ma kal lohna tûra thlalêr anga a kan tâk ni?

¹³Tin, LALPA chuan, “Ka dân, an hmaa ka dah, an kalsan a, ka ṭawngka chhuak an awih lo va, an zâwm hek lo va,

¹⁴an thinlung khauh zâwma, an thlahtuten an zirtîr Baala-te chu an zui tâk zâwk avângin,” a ti a;

¹⁵sipaihote LALPA, Israel Pathian chuan heti hian a ti: “Ngai teh u, anni, hêng mite ngei hi saiin ka hrai ang a, tui khâ ka intîr bawk ang.

¹⁶Hnam, anmahni leh an thlahtute pawhin an hriat ngai lohte zîngah ka tidarh ang. Ka tihboral vek hma chu khandaih ka ûmtîr ang.”

¹⁷Sipaihote LALPA chuan heti hian a ti: “Ngaihtuah ula, hmeichhe ṭap mite lo kal tûrin ko rawh u; Hmeichhe themthiamte chu lo kal tûrin ko bawk rawh u.

¹⁸Rawn hmanhmawh sela, min rawn ṭah khum teh se, Kan mittui a luana, kan mitahte tui a puh theih nân.

¹⁹Zion ata ṭap thâwm hriat a ni si a: ‘Kan chhiat nasatzia tak chu! Kan hrilhhai êm êm a, Kan ram kan kalsan avâng leh, Kan chênnate an paihthlâk tâk avângin.’”

²⁰Aw nangni hmeichhiate u, LALPA thu chu ngaithla ula, A kamchhuak thu in bengah lût sela; In fanute ṭah zirtîr ula, Mi tinin a ṭhenawmnu hnênah sûnna hla.

²¹Kan tukverhahte thihna lâwn lûtin, Kan lal inahte a lût tawh si a; Pâwn aṭangin naupang tibo tûr leh, Khawlai ata tlangvâl tibo tûrin.

²²“LALPA thuchhuak chuan heti hian a ti: ‘Mi ruangte chu tâmlakah êkdûr angin an tlu ang a, Buh sengtu buh hmaih ang maiin; Tu mân an khâwm tawh lo vang,’” ti rawh.

²³ LALPA chuan heti hian a ti: “Mi fing chuan a finna chhuang suh sela, mi chak chuan a chakna chhuang hek suh sela, mi hausa chuan a sum leh pai chhuang hek suh se.

²⁴A chhuang apiang erawh chuan hei hi chhuang rawh se, kei LALPA hi, ngilneihna te, rêl dikna te, felna te he leia hmang ṭhîntu chu ka ni tih mi hriata, a hriat thiamna chu. Hêng thilte hi ka lâwm zâwng a ni si,” tih hi LALPA thuchhuak a ni.

²⁵“Ngai teh u, nite chu a lo thleng e,” tih hi LALPA thuchhuak a ni, “Serh tan ni si, tan loh ang maite chu ka hrem ang;

²⁶Aigupta te, Juda te, Edom te, Amon fate leh Moab te leh thlalêra chêng, baksam ziat kâwnghote; hnam zawng zawng chu serh tan lohte an ni si a, Israel chhûngte zawng zawng pawh thinlunga serh tan loh an ni.”