Read Mizo_Old_version ṬAH HLA 1 Bible Online

ṬAH HLA 1 - Mizo_Old_version bible

ṬAH HLA 1

¹Mipuia khat ṭhîn khawpui kha khawhara a ṭhut tâk chu! Hnamte zînga ropui ṭhîn kha, hmeithai ang a lo ni ta a! Ram bialte zînga lian ber ṭhîn kha, chhiah khua a lo chang ta a.

²Zânah lungchhe vânkaiin a ṭap a, a biangah mittui a luang e; A nei nêm maw, thlamuantu tûr, a ngainatu zawng zîngah; A ṭhiante zawng zawngin an bum a, a hmêlma an chang zo ve.

³Juda chu sal tân khur a lût ta a, hrehawm leh sala chhawr tuarin; A chêng ta e ânpai zîngah, chawlhna rêng a tawng lo ve; A ûmtu zawngten an nangchîng, a chêp lai takin.

⁴Zion khawpui kawngte chu a ngui ruai, kûtpui urhsûn kal awm loh vângin; A kulh kawngka zawng zawng a ram zo, a puithiamte an rûm a. A nulaten an tuar a, ani lahin na a ti êm êm.

⁵A hnehchhiahtute chu hotuah an chang zo ve, a hmêlmate an hlawhtling, LALPAN a tuartîr tâk hi, a bawhchhiat tam avângin; Hnehchhiahtu hmaah a hraichawite sal tân khur an lût ta e.

⁶Tin, Zion fanu chu a mawina zawngin a bosan ta e, A hotute zukchal tlat hmun nei lo ang an chang zo ta; Umtu hmaan an tlân e, tha leh zungzâm rêng nei lovin.

⁷A hrehawm mangan niah Jerusalem chuan a hre reng a, A hmasâng thil hlu zawng zawngte; Hnehchhiahtu kuta a mite an tlûk laiin ani chu tu mah rêngin an pui lo, Hnehchhiahtuten an en a, a chim chu an diriam a.

⁸Jerusalem a sual ta êm, chu vâng chuan thil thianghlim lo a lo chang ta; A zahtu zawngten an hmusit, a saruak an hmuh vângin; A ni, lungngaiin a ni a rûm a, lehlam a hawi.

⁹A puan hmâwrah bawlhhlawh a kai; a hun tâwp tûr a ngaihtuah lo; Chu vâng chuan mak takin a tlâwm, thlamuantu rêng a nei lo ve. “En teh, aw LALPA, ka hrehawmna hi, hmêlma a intiropui si!”

¹⁰Hnehchhiahtu chuan a kut a lek a, a thil hlu zawng zawng chungah chuan; A hmun thianghlimah chuan ânpaiho an lût a hmu e, Inkhâwmna hmuna luh i khapteho kha.

¹¹A mite zawng zawng an rûm e, ei tûr zawngin; An thil hlu zawng zawng an pe zo, nun tihharhna chaw atân. “Aw LALPA, ngai la, en teh, hmuhsitawm ka nih tâk hi.”

¹²“In tân engmahlo mai em ni, kawnga veivâk zawng zawngte u? Ngai ula, en teh mah u, ka chunga thleng ka lungngaihna ang lungngaihna a awm em ni? A thinrim nasat nia LALPAN min tihhrehawmna hi.

¹³Chung lam ata mei a tîr a, ka ruh chhûngah a luhtîr a; Ka ke tân lên a zâr a, mi tikîr a; Rilru bo rum rumin chau takin mi siam a.

¹⁴“Ka bawhchhiatna hi phurrit atân têl khâwm a ni a, Ama kut ngeia têl khâwm a ni; Mi phurhtîr ta a, ka tha a tichau zo ta; Ka do zawh lohte kutah min pe a, Lalpa ngei chuan.

¹⁵“Lalpan ka mi chakte chu engmahlovan a siam, kan zîngah; Keima chungah pung khâwm a ko ve, ka vâl rual tiral tûrin; Grêp sâwrna khur iangin Lalpan a chîl, Juda fanu thianghlim chu.

¹⁶“Hêng vâng hian ka ṭap a, ka chhîngmit tui ang luang e; Thlamuantu, min tiharhtu tûr awmna kâr hlat vângin; Ka hraichawite awmkhua a har ngei, hmêlmain a hneh vângin.”

¹⁷Zion-in a kut a phar vêl, thlamuantu tûr awm lo ve; LALPAN Jakob-ho chungchângah a vêla awm zawng zawng hnehchhiahtu ni tûrin a rêl ta; Jerusalem chu an zîngah thil thianghlim lo a lo chang e.

¹⁸“LALPA chu a fel a ni e, a thupêk chungah ka hel si; Mipui zawng zawngte u, ngaithla ula, ka lungngaihna hi en teh u; Ka nula thianghlim leh vâl rual sal tân khur an lût ta e.

¹⁹Mi ngainatute ka ko va, anni chuan mi bum ta zâwk a; Ka puithiam leh ka upate khawpuiah an boral ta; An nun tihharhna tûr chaw an zawn laiin.

²⁰“Aw LALPA, ngai teh, ka hrehawmzia mai hi, ka kawchhûng a buai zo ta; Ka thinlung a vai, ka chhûngah, sual takin ka hel ta si. Kawtthlêrah khandaihin a sûntîr a, in chhûngah pawh thihna ang a ni.

²¹“Ka rûm an hria, mi thlamuan tûr rêng an awm lo ve. Ka hmêlma zawngten ka buaina hi an hria e, I thiltih tâk hi an lâwm a ni. Ni i ruat tawh chu i thlentîr a, anni chu keimah ang ni ve rawh se.

²²“An sualna zawng zawng i hmaah lo thleng rawh se; Ka bawhchhiatnate avânga ka chunga i tih ang hian an chungah ti ve ang che; Ka rûmna a tam ta si a, ka thinlung a chau ta.”