Read Mizo_Old_version ṬAH HLA 2 Bible Online

ṬAH HLA 2 - Mizo_Old_version bible

ṬAH HLA 2

¹ LALPAN a thinrimin Zion fanu chhûmin a khuh tâk chu! Vân ata leiah a paih thla e, Israel mawina chu; A ke nghahchhan a hre reng lo, a thinrim niah chuanin.

²Lalpa chuan a lem zo va, Jakob-ho chênna zawng zawng a zuah lo ve; A thinurin a nam thlu a, Juda fanu kulh nghette chu; Lei thleng rawka tichimin a titlâwm e, ram leh a hotute chu.

³Israel kî zawng zawng chu thinrim takin a tan chhum a; Hmêlma hmaan a kut ding lam a hnûk kîr e, Meialh a vêl kâng faitu angin Jakob-ho zîngah a alh chhuak e.

⁴Hmêlma angin thal ngul a kuai, hnehchhiahtu angin a kut ding lam a dintîr a; Zion fanu puan inah mit latu ṭha zawng a that zo va; Mei angin a thinur a leih bua a.

⁵Lalpa chu hmêlma ang a lo ni ta, Israel a lem zo ta; A in ropui zawng zawng a lem zo, a kulh nghette a tichhia! A tipung ta lusûn, ṭah hla, Juda fanu zîngah chuan.

⁶A bûk chu a tichim ta, huan bûk ang maiin, A kûtpuite hmun a tichhia a; LALPA chuan Zion-ah kûtpui leh Chawlhni a hlamchhiahtîr a, Lungawi lo takin lal leh puithiamte chu a hnâwl a.

⁷Lalpan a maichâm a paih bo va, a hmun thianghlim a lungten; Hmêlma kutah a pe ta e, a in ropuite kulh chu; Kûtpui ni ang maiin LALPA inah an au dur dur a.

⁸ LALPA chuan Zion fanu kulh chu tihchim a tum ta a, Tehnain a chhinchhiah a, tihchhiat nân a kut a sûm lo ve; Kulh hmatâwng leh kulhte chu lu a sûntîr a, an ngui dûn e.

⁹A kulh kawngkâte leiah an pil, a thîr tlâwn a tichhe bung rum e; A lalber leh a hotute ânpaiho zîngah an awm e, dân chu a awm ta lo; A zâwlneite lahin LALPA ata inlârna rêng an hmu lo.

¹⁰Zion fanu upate chu leiah an ṭhu, ngawi rengin; An luah vaivut an phul a, saiip puan an sin a; Jerusalem nula lei siin an kaikûn e.

¹¹Ka mit ka ṭah chhe zo va, ka kawchhûng a buai zo ta; Ka thinlung a inleih bua leiah, ka mipui fanu boral vângin; Nautê leh hnute hne laite chu khawpui tualah an chauh avângin.

¹²An nute hnênah chuan, “Khawiah nge buh leh uain?” tiin, Hliam ang maiin khawpui tualah an thidang a; An nute ângchhûngah an nun a chuai ral e.

¹³Eng nge ka hriattîr ang chia, eng nge ka tehkhin ang che, aw Jerusalem fanu? Eng ang nge i ni ka tih ang, ka han thlamuan theih nân che, aw Zion fanu thianghlim? I chhiatna hi a zau ve tuipui angin; Tu nge tidam thei ang che?

¹⁴I zâwlneiten i tân inlârna lawilo leh âtthlâk an hmu a, Din ṭha leh tûr chein i khawlohnate an tilang lo va; I tân thu lawilo leh bumnaa khat an hmu zâwk a ni.

¹⁵Kawnga veivâk zawng zawngten an kut an ben khum che a, Jerusalem fanu an sî khumin an lu an thin khum a: “He khawpui hi maw mawina famkim, lei pum pui hlimna an tih chu?” tiin.

¹⁶I hmêlma zawng zawngten an ân khum che; An sî khum a, an ha ṭhialin: “Kan lem zo ta! He ni hi kan thlîr ṭhin ngei kha a ni, Kan dawng ta a, kan hmu ta e,” an ti.

¹⁷ LALPAN a tum chu a tizo va, Hmâna a ruat angin a thu a hlen ta; A paihthla e, lainat lovin; Hmêlma chu i chungah a lâwmtîr e, Nangmah hnehchhiahtute kî chu a chawisâng ta.

¹⁸Lalpa hnênah an thinlung a au ta a! “Aw Zion fanu kulhpui! Mittui a chhûn a zânin luang zur zur rawh se; Nang châwl suh la, i mittui pawh hân suh se.

¹⁹“Tho la, zânah vên ṭan tirhan au chhuak rawh, I thinlung chu tui angin leih chhuak ang che Lalpa hmaan; Ama lamah i kut phar la, i fanau kawtthlêr tawntirh tina rilṭâma chaute nunna atân.

²⁰“En la, aw LALPA, ngai teh, hetianga i tih tâkate hi! Hmeichhiaten an rîla rah, fanau an duat laite chu an ei tûr em ni? Puithiam leh zâwlnei Lalpa hmun thianghlimah chuan thahin an awm tûr em ni?

²¹“Tleirâwl leh putar kawtthlêr laian an thal phung e, Ka nula leh vâl rual khandaih avângin an tlu; Nangin i thinrim niah chuan i that ta, I sâm buan e lainat lovin.

²²Kûtpui ni angin ka râp zâwngte kil tin ata i ko va, LALPA thinrim niah chuan tlân chhuak leh zuah rêng an awm lo ve; Ka chawi leh ka kaih tlei tâkte chu ka hmêlmain a tiboral ta.”