Read Mizo_Old_version ṬAH HLA 3 Bible Online

ṬAH HLA 3 - Mizo_Old_version bible

ṬAH HLA 3

¹A thinurna talhtum hnuaia tihhrehawmna hretu ka ni a.

²Thimah mi khalh lûtin mi kaltîr a, êngah ni lovin;

³Keima chungah nilêngin a kut a thlâk a thlâk ngei mai.

⁴Ka tîsa leh vun a tisâwng a, ka ruhte a titliak a.

⁵Ka lakah dai a theu va, khâkna leh hrehawmnain mi hung;

⁶Hmun thimah mi chêntîr a, thi daih tawhte angin.

⁷Ka chhuah theih loh nân mi hung vêl a; ka khaidiat a tirit a.

⁸A ni, ṭanpui ka ngena ka au pawhin ka dîlna a khâr hnan a.

⁹Lungchherin ka kalkawngte a hnawh a, ka kawngte a tikawi a.

¹⁰Ka lakah savawm mî châng ang, sakeibaknei tawm ru khiau ang mai a ni.

¹¹Ka kawngte mi hruai kawisak a, mi pawt sawm a, khawhar takin mi siam a.

¹²A thal ngul a kuai a, a kah tumah mi dah a.

¹³A bâwma thalfungte chu ka kawchhûngah a kâp lût a.

¹⁴Ka mite zawng zawng tân nuihzatbûr ka lo ni ta, nilênga an hla nên.

¹⁵Ani chuan thil khâin mi tikhat a, saiin mi tihnê a.

¹⁶Lung ṭhîlah ka hâte mi tauh baltîr a, vaivutah mi vahtîr a.

¹⁷Nangin muanna ata ka nunna i sawn daih a, thawvenna chu eng a nih pawh ka hre ta lo.

¹⁸Tin, “Ka ropuina leh LALPA laka ka beisei chu a bo zo ta,” ka ti ta a ni.

¹⁹Ka tuarna leh ka vahvaihna, sai leh mît khâte chu hre reng ang che.

²⁰Ka nunna hian chûngte chu a hre reng zêl a, ka chhûngah hian a kun reng a ni.

²¹Hei hi ka han hre chhuak leh ta a, chu vâng chuan beiseina ka nei ta.

²²Tihborala ka awm lo hi LALPA zahngaihna a lo ni, A lainatnate chu a kang ngai loh avângin.

²³A thar zêl ṭhîn tûk tinin, i rinawmna a ropui e.

²⁴“LALPA chu ka chanpual a ni,” ka nunnain a ti a, “Chuvângin, amah chu ka beisei ang!”

²⁵ LALPA chu amah nghâktute tân a ṭha a, amah zawngtu tân chuan.

²⁶ LALPA chhandamna beiseia nghah veng veng chu a ṭha a ni.

²⁷Mi, a tleirâwl laia nghâwngkawl bah chu a ṭha a ni.

²⁸A bahtîr tawh avângin amahin ṭhu sela, ngawi reng rawh se.

²⁹A kâ vaivutah dah sela, beisei a la awm dah law maw.

³⁰A bêngtu hnênah a biang dawh sela, sawichhiatin khat rawh se.

³¹Lalpa chuan kumkhuain a paih bo dâwn si lo va;

³²Tilungngai mah sela, a zahngaihna nasa tak avângin a la khawngaih dâwn a ni.

³³Mihring fate tihhrehawm leh tihvui hi a duh zâwng a ni si lo.

³⁴Lei sal tâng zawng zawng rah beh te,

³⁵Chungnungbera hmaihmaa mi dikna hnâwl te,

³⁶Mi thu tihkhawlohsak te hi Lalpa remtih zâwng a ni lo.

³⁷Lalpan thu a pêk loh chuan thusawi tithleng theitu chu tu a ni nge?

³⁸Thil ṭha leh ṭha lo hi Chungnungbera kâ aṭanga chhuak a ni lo vem ni?

³⁹A sual hremnaah engati nge mi nung a phunnawi reng?

⁴⁰Kan kawngte chu fiahin en ngun ila, LALPA lam i hawi ang u.

⁴¹Kan thinlung chu kan kutte nên vâna Pathian lamah chuan i chawikâng ang u.

⁴²Kan bawhchhia a, kan hel a, nangin min ngaidam lo ve.

⁴³Thinrimnain in inkhuh a, min ûm a, khawngaih lovin i that a.

⁴⁴Chhûmin i inkhuh a; chutichuan, ṭawngṭaina a kal tlang thei lo.

⁴⁵Mipuite zîngah hian bawlhhlawh leh hnâwmhnawkah min siam ta a.

⁴⁶Kan hmêlmate zawng zawng chuan kan chungah an kâ an âng zau va.

⁴⁷Hlauhna leh khuarkhurumin mi nang a, chhiatna leh boralna nên.

⁴⁸Ka mipui fanu boral avângin ka mit chu lui tui angin a luang ta e.

⁴⁹Ka mit chu chhum lo chat lovin, hân chuang lovin a luang chhuak ang a,

⁵⁰ LALPAN vân aṭanga mi zuk ena mi hmuh thlengin;

⁵¹Ka khawpui fanute zawng zawng avângin ka mitin ka rilru a tilungngai e.

⁵²Chhan awm lova mi dotute chuan sava angin mi ûm a;

⁵³Nung chungin khuarkhurumah mi theh thla ta a, Ka chungah lung an thlâk a.

⁵⁴Tuiin mi chîm pil a, “Ka boral ta!” ka ti a.

⁵⁵Khuarkhurum hnuaihnung ber aṭang chuan, aw LALPA, i hming ka lam a.

⁵⁶Ka aw chu nangin i hria a, ka thâwk laa ka au thâwmah i beng hup suh ang che.

⁵⁷Nang ka auh che niah khân i lo hnai a, “Hlau suh!” i ti a.

⁵⁸Aw Lalpa, ka thiamna thu mi sawisak a, ka nunna i tlan a.

⁵⁹Aw LALPA, ka chunga thil dik lote hi i hmu a, ka thu mi rêlsak ang che.

⁶⁰An phuba lâkna zawng zawng leh an mi phiarna zawng zawngte chu i hmu a.

⁶¹Aw LALPA, an mi sawichhiatna leh mi phiarna zawng zawngte chu i hria e.

⁶²Mi beitute hmui leh ngaihtuahnate chu nilêngin ka chungah a awm a.

⁶³An ṭhu leh an dingte hi en teh; an hla ka ni mai.

⁶⁴Aw LALPA, an kut hnathawhte ang zêlin nang chuan i thungrûl ang.

⁶⁵Thinlung sak i neihtîr ang a, i ânchhia an chungah a tla ang.

⁶⁶Thinrimin i ûm ang a, LALPA vân hnuai ata chu i tiboral ang.