Read Mizo_Old_version ṬAH HLA 4 Bible Online

ṬAH HLA 4 - Mizo_Old_version bible

ṬAH HLA 4

¹Rangkachak chu a va thîm ta êm! Rangkachak thianghlim ber chu a va danglam êm! Hmun thianghlim lungte chu kawtthlêr tawntirh tinah paih darh a ni ta.

²Zion fapa hlu tak, rangkachak ṭha mi nêna tehkhin theihte chu Hlum bêl, bêlvawtu kutchhuak ang maia ngaih lah ni ta!

³Sihalte mahin an notê an hnutê an pe, an hnêktîr a; Ka mipui fanu erawh chu a nun a lo chhia, thlalêra vanghâwngsei ang maiin.

⁴Nau hnute hne lai lei chu tuihâl vângin a dangah a bet a; Naupangte chuan chaw an ngên a, tu mah rêngin an pe lo.

⁵Chaw ṭha ei ṭhînte chu kawtthlêrah an boral a; Puan senduk sina sei liante chuan êk dûrte an kuah a.

⁶Ka mipui fanu khawlohna chu Sodom sualna aiin a nasa a, Kut rêng pawha khawih lohva mit khap kâr lova tihchhiata kha.

⁷A mi liante chu vûr aia thianghlim an ni a, hnutetui aia vâr an ni; Taksaah chuan rubi aiin an sâr zâwk a, an mawizia chu sapphir ang a ni.

⁸An lan dân chu lungalhthei aiin a dum zâwk a, kawtthlêrahte chuan hriat an ni lo; An vun chu an ruhahte a bet a, hmawlh angin a ro va.

⁹An ṭha zâwk e khandaiha thi, rilṭâma thi ai zawngin, An râwp ral a, lova thlai tharte tlachhamin.

¹⁰Lainattu hmeichhiate kut chuan mahni fate an chhûm a; Ka mipui fanu tihchhiatnaah chuan an chawah an chang ta e.

¹¹ LALPAN a thinur a hlen ta, a thinrim hlauhawm a leih chhuak; Zion-ah mei a tialh a, lungphûmte lamin a kâng zo.

¹²Lei lalte chuan an ring lo va, khawvêla chêng zawng zawng pawhin; Hnehchhiahtu leh hmêlma Jerusalem kulh kawngkaa an luh theih tûr chu.

¹³Hei hi a zâwlneite thil tihsual leh a puithiamte khawloh vâng a ni, A chhûnga mi dik thisen chhuahtu chu.

¹⁴Mitdelin kawtthlêrahte an vâkvai a, thisenin an bawlhhlawh a; Miten an silhfênte an khawih theih loh hial khawpin.

¹⁵“Kal bo rawh u, thianghlim lote u! Kal bo rawh u, kal bo rawh u! Dek suh u!” tiin miten an au va, Tlânchhia leh vâkvai an lo ni ta a, Miten hnamte zîngah, “Hetah an chêng tawh lo vang,” an ti a.

¹⁶ LALPA ngei chuan a theh darh a, a ngaihsak tawh lo vang; Puithiamten zah an hlawh lo va, upaten duhsak an hlawh hek lo.

¹⁷Ṭanpuina thlâwn thlîrin kan mit a vai zo va; Chhandam thei lo hnam chu nghah zawng kan nghâk a ni.

¹⁸Miin kan hnu an chhui, khawlai kan lêng thei lo ve; Kan tâwp a hnai, kan ni a kim; kan tâwpna a thleng ta si.

¹⁹Min ûmtute chu vân mupuite aiin an chak zâwk; Tlângahte chuan min ûm a, thlalêrahte chuan min châng a,

²⁰Kan hnâra thâw, LALPA hriak thiha chu an khurah manin a awm ta; “Hnamte zîngah a zâr hnuaiah kan chêng ve ang,” kan tih ṭhina kha.

²¹Aw Edom fanu, Uz rama chêng chu hlimin lâwm rawh se. No chu i hnên pawh a lo thleng ang a, i rui ang a, Saruakin i insiam ang.

²²Aw Zion fanu, i khawlohna hremna chu a kim ta e; Salah a hrêng tawh lo vang che, Aw Edom fanu, i khawlohna chu a rawn hrem dâwn a; I sualte chu a hmuchhuak ang!