Read Mizo_Old_version ṬAH HLA 5 Bible Online

ṬAH HLA 5 - Mizo_Old_version bible

ṬAH HLA 5

¹Aw LALPA, kan chunga lo thleng chu hre reng ang che; Ngai la, kan mualphona hi en teh!

²Kan ro luahte chu hnam dang mite hnêna pêk a ni zo ta a, Kan inte chu hmêlhriat loh mite hnênah.

³Fahrahte leh pa nei lote kan ni ta a, Kan nute chu hmeithai ang mai an ni ta.

⁴Kan tuisik te man neiin kan in ta a, Kan thingtuahte pawh kan hnênah hralh a ni ta.

⁵Nghâwnga manin kan awm a; kan chau va, chawlh rêng kan nei lo.

⁶Aigupta leh Assuria hnênah kut kan dawh a; Khamkhawp chaw hmu tûrin.

⁷Kan pate zawng an sual a, an awm ta lo va; An khawlohnate kan phur a ni.

⁸Bawihte chu kan chungah an lal a; An kut ata min chhanchhuak tûr tu mah an awm lo.

⁹Nun chân hlauhawm khawpin kan chaw kan ei ṭhîn; Thlalêra khandaih avâng chuan.

¹⁰Kan vunte chu thuk ang maiin a sa a; ṭâm kâng sâ avângin.

¹¹Zion-ah hmeichhiate chu an pâwngsual a, nulate chu Juda khawpuiahte.

¹²Lal fate an kutin an khai a, upate hmêl an zah lo.

¹³Tlângvâlte buh her khâwl an hertîr a; Naupangte thingtuah têl hnuaiah an pai chawn chawn a.

¹⁴Upaten kulh kawngka an kalsan a, tlangvâlten an hla sak.

¹⁵Kan thinlung hlimna a chuai ta; kan lâm lusûnah a chang ta.

¹⁶Kan lu ata lallukhum a tla ta; Kan chung a pik e, kan tisual ta si.

¹⁷Hemi avâng hian kan thinlung a chau va, Hêng avâng hian kan mit a thim;

¹⁸Zion tlâng chu a ṭiau tâk avângin, Sihalte a chhûngah an lêng.

¹⁹Nang chu LALPA, kumkhuain i lal a; I lalṭhutthlêng chu chhuan zawng zawng thlengin.

²⁰Eng vângin nge kumkhuaa min theihnghilha, Chu leh chen min kalsan le?

²¹Aw LALPA, nangin i lam min hawitîr la; tichuan, kan lo hawi ang; Hmasâng angin kan nite tithar ang che,

²²Nangin min paih thla dêra, Kan chungah i thin a ur nasa hle a nih loh chuan!