Read Mizo_Old_version Ezekiela 1 Bible Online

Ezekiela 1 - Mizo_Old_version bible

Ezekiela 1

¹Kum sawmthumna, thla lina, ni nganaah chuan, kei Ezekiela, puithiam Buzia fapa chu Babulon rama Kebar lui kama Juda sal tângte zîngah ka awm a, vân a lo inhawng a, Pathian inlârna ka hmu a.

²Lal Jehoiakina sala a tân kum ngana a ni.

³Babulon rama Kebar lui kamah chuan LALPA thusawi ka hria a, a thiltihtheihna chuan mi tuam a.

⁴Tin, ka han en a, hmâr lam ata thlipui nasa tak lo thawk ka hmu a. Chhûmpui nasa tak aṭang hian kâwl hi a lo phe zawr zawr a, a kiang vêlte chu a êng pup mai a. Kâwl a phêtnaah chuan êng eng emaw, dâr tle mi ang hi a awm a.

⁵Thlipui lai takah chuan thil nung pali ang, mihring ruangâm pu ka hmu a,

⁶hmai pali leh thla pali an nei ṭheuh va.

⁷An ke an thluang a, bâwng tin ang an nei a, dâr tle mi angin an êng a.

⁸Hmai pali leh thla pali bâkah chuan mihring kut ang pali an nei ṭheuh va, an thla hnuaiah zêl a awm a.

⁹Thil nungte chuan an thla pahnih an zâr pharh ṭheuh chuan an thla hmâwrte chu a intawk pha a. Kil li neiin an ding a, an chêt sawn pawhin an zain an taksa her chuang lovin an che sawn ṭhîn a ni.

¹⁰Thil nung palite chuan hmai pali an nei ṭheuh va, an hma lamah mihring hmêl an pu a; ding lamah sakeibaknei hmêl ang, vei lamah bâwngpa hmêl ang, hnung lamah mupui hmêl ang.

¹¹Thil nung paliten an thla pahnih ṭheuh chu a hmâwr intawk phain an zâr ṭheuh va, a dangte chu an taksa hrûlah an khup a.

¹²Thil nungte chuan khawi lam pawh an hawi sa vek a ni, inher lovin thlarauvin a duhna lam apiangah an kal ho thei.

¹³Thil nungte zîngah chuan, êng eng emaw, meichher alh deuh ang mai hi a awm a, eng lai pawhin a che a. Mei chu a alh êng pup a, kâwlphe angin a êng chhuak zuai zuai a.

¹⁴Thil nungte chu kâwlphe angin an vir tawn zawk zawk a.

¹⁵Thil nung palite chu ka en reng lai chuan, tawlailîr ke pali thil nung pali zâwn ṭheuhva awm, leia innghat ka hmu bawk a.

¹⁶Tawlailîr ke palite chu inang vek a ni a, lunghlu angin an êng ṭheuh va, tawlailîr ke pakhat chhûnga tawlailîr ke dang awm ang a ni.

¹⁷Inher lovin khawi lam hawi pawhin an che sawn thei a ni.

¹⁸Tawlailîr ke bial tlângte chu kual kung mai, râpthlâk tak a ni a, mitin a khat a.

¹⁹Thil nungte chu an kal sawn apiangin tawlailîrte pawh chuan an zui ve zêl a.

²⁰Thil nungte chu thlarau duhna lam lamah an kal a, tawlailîrte pawhin thil nungte tih ang chiahin an ti ve a, thil nungte thlarau chu tawlailîr keahte a awm si a.

²¹Tichuan, thil nungte chu an kalin emaw, an dinin emaw, boruaka chawikân an nihin emaw, tawlailîrte pawh chutiang bawk chuan an awm ṭhîn, thil nungte thlarau chu tawlailîr keahte chuan a awm si a.

²²Tin, thil nungte lu chung chu thil eng emaw, krustal lung tle mia siam ang hian a khuh kulh mai a.

²³Chu thil awm kulh hnuaiah chuan thil nungte chu an ding a; an dawta mite lamah chuan an thla pahnih an zâr a, an thla pahnih dangin an taksa an khuh a.

²⁴An thlawh laia an thla zâp ri chu ka hria a, tuifinriat fâwn ri ang leh sipai rual thâwm anga mipui ri mur mur thâwm leh Engkimtithei Pathian aw ang a ni. An thlawh loh chuan an thlate an khup a.

²⁵An thlawh loh lai pawhin an lu chung zâwn chung lama thil awm aṭang khân thil ri hum hum a awm tho va.

²⁶Tin, an lu chunga vân dum chungah khân lalṭhutthlêng ang tak, sapphir lung ang maia lang hi a awm a; tin, lalṭhutthlêng ang tak chungah chuan mihring ang taka lang hi a awm a.

²⁷Tin, a kâwng achin chung lam chu ṭhihna puak sur ang maiin ka hmu a, a kâwng ni âwm achin hnuai lam chu mei ang mai hi niin ka hmu a, a êng vêl pup mai a.

²⁸Ruah sûr nia chhûm chunga chhimbâl lan dân ang mai hi a vêla êng lan dân chu a ni a. Hei hi LALPA ropuina lan dân chu a ni. Tin, ka hmuhin bawkkhupin ka tlu a, thusawitu aw chu ka hria a.