Read Mizo_Old_version Ezekiela 10 Bible Online

Ezekiela 10 - Mizo_Old_version bible

Ezekiela 10

¹Tichuan, ka han en a, ngai teh, cherub-ho lu chunga vân dum awmah khian sapphir lung ni âwm tak, lalṭhutthlêng ang taka lang hi a lo lang a.

²Tin, ani chuan puanzaisîn sin hnênah khân, “Cherub hnuaia tawlailîr virte keah sâwn va lût la, cherub-ho inkâra meivâm saw i kut khinghnih khatin va lâwk la, khawpui chungah theh darh rawh,” a ti a. Tin, ka hmuh lai ngeiin a kal ta a.

³Tin, mi a luh lai khân cherub-ho chu in pui ding lampangah an ding a; tin, hung chhûngnung chu chhûmin a khat ta a.

⁴Tin, LALPA ropuina chu cherub-ho aṭang chuan a chho va, biak in kawngka chungah chuan a han ding ta a, in chu chhûmin a khat a, hung chhûng chu LALPA ropuina êng chuan a khat ta a.

⁵Tin, cherub-ho thla zâp ri te chu hung chhûng pâwnta zâwkah te pawh chuan Pathian Engkimtitheian mi a biak laia a aw ang maiin a hriat a.

⁶Tin, heti hi a ni a, puanzaisîn sin hnêna, “Cherub-ho inkâra tawlailîr vir kâr ata mei va la rawh,” tia thu a pêkin, ani chu a va lut a, tawlaitîr ke bulah chuan a ding ta a.

⁷Tin, cherub chuan cherub-ho inkâr aṭang chuan cherub-ho inkâra mei awm chu a han ban a, a la a, puanzaisîn sin kutah chuan a pe a, ani chuan a lo la a, a chhuak ta a.

⁸Tin, cherub-ho thla hnuaiah chuan mihring kut ang mai hi a lo lang a.

⁹Tin, ka han en a, ngai teh, cherub-ho sîrah chuan tawlailîr ke pali, cherub pakhat kiangah tawlailîr ke pakhat, cherub dang kiangah tawlailîr ke dang ka hmu a; tin, tawlailîr ke lan dân chu Tarsis lung zia ang hi a ni a.

¹⁰Tin, an lanziaah chuan an paliin angkhat an ni a, tawlailîr ke pakhat chhûnga tawlailîr ke dang awm ang mai hi a ni a.

¹¹An kal chuan sîr liah an kal thei a, an kal pawhin an her ngai lo; amaherawhchu, a hmasa hawi lam apiang an zui a ni, an kalin an her chuang lo.

¹²Tin, an taksa pum chu, an hnung te, an kut te, an thlate leh tawlailîr kete pawh kha, a vêlin mitin a khat a, an palia tawlailîr kete pawh kha.

¹³A tawlailîr kete kha chu ka beng hriat ngeiah, “Tawlailîr ke vir” tih a ni.

¹⁴Tin, mi tinin hmêl pali ṭheuh an nei a, hmêl pakhat chu cherub hmêl a ni a, pahnihna chu mihring hmêl a ni a, pathumna chu sakeibaknei hmêl, palina chu mupui hmêl a ni a.

¹⁵Tin, cherub-ho chu an chho ta a; hei hi Kebar lui kama thil nung ka hmuh chu a ni.

¹⁶Tin, cherub-ho an kal chuan tawlailîr kête chu an kiangah a kal ve a; tin, cherub-ho khân lei ata chho tûra an thlate an zâr chuan tawlailîr kête chuan a hransan ngai lo va.

¹⁷An din chuan hêngte hi an ding ve a, an chhoh chuan hêngte hi an chho ve ṭhîn a, thil nung thlarau chu anmahniah a awm si a.

¹⁸Tin, LALPA ropuina chu in pui kawngka chung aṭang chuan a chhuak a, cherub-ho chungah chuan a ding ta a.

¹⁹Tin, cherub-ho chuan an thla an zâr a, an chhuahin ka mit hmuh ngeiah lei ata an chho va, tawlailîr kete chu an kiangah a awm zêl a; tin, LALPA in luhna chhak lam kawngkhâr bulah chuan an ding ta a, Israel Pathian ropuina chu an chungah a awm a.

²⁰Hei hi Kebar luia Israel Pathian hnuaia ka thil nung hmuh chu a ni; cherub-ho an ni tih ka hria.

²¹Mi tinin hmêl hrang pali leh thla pali an nei ṭheuh va, an thla hnuaiah chuan mihring kut ang mai hi a awm a.

²²Tin, an hmêl lam thu-ah chuan Kebar luia ka hmuh hmêlte ang bawk kha an lan dân leh anmahni ngeite pawh an ni a; tin, an hmazâwng zêlin an kal ṭheuh va.