Read Mizo_Old_version Ezekiela 11 Bible Online

Ezekiela 11 - Mizo_Old_version bible

Ezekiela 11

¹Tin, thlarauvin mi chawi kâng a, LALPA in chhak lam luhna, khawchhak chhawngah chuan mi thlen a; tin, ngai teh, luhna kawngkhâr bulah chuan mi sawmhnih leh panga an lo awm a; an zîngah chuan Azura fapa Jaazania leh Benaia fapa Pelatia, mipui hotute chu ka hmu a.

²Tin, ani chuan ka hnênah “Mihring fapa, hêng hi khawlohna phiar chhuaktute an ni a, he khawpuiah hian sual rawt chhuaktute an ni;

³‘In sak hun a la ni lo ve; he khawpui hi saso bêl a ni a, keini hi sa chu kan ni,’ titute chu.

⁴Chuvângin, thu sawi la, aw mihring fapa, an chungah thu sawi rawh,” a ti a.

⁵Tin, LALPA thlarau chu ka chungah a lo thleng a, ani chuan ka hnênah, “Sawi rawh, ‘LALPA chuan heti hian a ti e: “Hetiangin in ti ṭhîn a, aw Israel chhûngte u, in rilrua thil lo thlengte chu ka hre fai vek si a.

⁶He khawpuiah hian in thlahte chu in tipung tulh tulh a, a kawtthlêrte chu in mi thahin in tikhat ta a.”

⁷“ ‘Chuvângin, Lalpa PATHIAN chuan heti hian a ti a ni: “I mi thah, a laia in dahte chu a sa chu a ni a; he khawpui hi a saso bêl chu a ni; mahse, a lai ata sawn chhuahin in awm ang.

⁸Khandaih chu in hlau va, in chungah khandaih ka rawn thlen ang,” Lalpa PATHIAN chuan a ti a ni:

⁹“A lai ata ka tichhuak ang che u a, hnam dangte kutah ka mantîr ang che u a, in chung thu an rêl ang.

¹⁰Khandaihin in thi ang a, Israel ramri lamah chuan in chung thu ka rêl ang; tichuan, kei hi LALPA chu ka ni tih in hre tawh ang.

¹¹He khawpui hi in saso bêl a ni lo vang a, nangni lah a chhûnga sa in ni hek lo vang; Israel ramri lamah chuan in chung thu ka rêl ang a,

¹²LALPA chu ka ni tih in hre tawh ang; ka dân siam chu in zawh lo va, ka thuchhuak pawh in zâwm hek lo; in vêla hnamte tih dân chu in zâwm ta zâwk a,” a ti e,’ ” tiin.

¹³Tin, heti hi a ni a, thu ka han sawi chuan Benaia fapa Pelatia chu a lo thi ta mai a. Tichuan, ka tlu bawkkhup a, aw ring takin ka au va, “A, Lalpa PATHIAN! Israel awm chhunte chimihna i siam dâwn em ni?” ka ti a.

¹⁴Tin, LALPA thu chu ka hnênah a lo thleng a,

¹⁵“Mihring fapa, i unaute, i chi leh kuangte ngei leh Israel chhûngte zawng zawng, an zain, Jerusalem luahtuten, ‘LALPA lak ata kal daih rawh u, he ram hi kan ta tûra pêk a ni tawh e,’ an tihate kha an ni a.

¹⁶Chuvângin, ‘Lalpa PATHIAN chuan heti hian a ti a ni: “Hla takah hnamte zîngah ka sawn bo va, ram tam takah ka tidarh na a, rei lo te chhûngin an lo thlenna ramah chuan an tân hmun thianghlim ka ni ang,” ’ a ti a.

¹⁷Chuvângin, ‘LALPA chuan heti hian a ti a ni: Hnam dangte lak ata chu ka hruai khâwm leh ang che u a, in darhna ram ata ka khâwm chhuak leh ang che u a, Israel ram chu ka pe ang che u.’

¹⁸Tin, chutah chuan an lo kal ang a, thil bawlhhlawh zawng zawng leh thil tenawm zawng zawngte chu chuta ta chu an la bo vang.

¹⁹Tin, thinlung hmun khat ka siamsak ang che u a, rilru thar ka pe ang che u. Tin, an tîsa ata thinlung sak chu ka la bo vang a, thinlung nêm an hnênah ka pe ang;

²⁰ka dân siamte an zawma, ka thuruatte an vawna, an tih theih nân. Tichuan, ka mite an ni ang a, kei pawh an Pathian ka ni ang.

²¹An bawlhhlawhna leh an tenawmna rilru, thinlunga la zâwmte erawh chu, an sual mawh chu a bûrin ka khumtîr ang,” LALPAN a ti.

²²Tichuan, cherub-ho chuan an thlate an zâr a, an kiangah chuan tawlailîr kête a awm a; tin, Israel-te Pathian ropuina chu an chungah a awm a.

²³Tin, LALPA ropuina chu khawpui lai aṭangin a chho va, khawpui chhak lampanga tlâng sângah chuan a han ding ta a.

²⁴Tin, thlarau chuan mi chawi kâng ta a, inlârnaah chuan Pathian thlarauvin Kaldai rama sal tângte hnênah chuan mi thlen a. Chutichuan, ka inlârna hmuh chuan mi chhohsan ta a.

²⁵Tichuan, sal tângteho hnênah chuan LALPA thil mi entîr zawng zawng chu ka sawi ta a.