Read Mizo_Old_version Ezekiela 12 Bible Online

Ezekiela 12 - Mizo_Old_version bible

Ezekiela 12

¹ LALPA thu chu ka hnênah a lo thleng leh a,

²“Mihring fapa, hel hmang chhûng, hmuhna tûr mit neia hmu si lo, hriatna tûr beng neia hre si lo zîngah i awm a ni, hel hmang chhûng an ni rêng si a.

³Chuvângin, nang mihring fapa, sal tânnaa kal tûr angin i bungruate têl fel la, chhûn êngah an mit hmuh ngeiah kal chhuak rawh; an hmuh ngeiah i hmun ata hmun dangah i kal chhuak tûr a ni. Hel hmang chhûng an ni na a, an inngaihtuah phah mahna.

⁴Tin, i bungrua chu chhûn êngah an mit hmuh ngeiah sal tâng kal tûr bungraw lâkin i la chhuak ang a, nangmah ngei pawh an mit hmuhah ram danga thawn bo tûr kalin i kal tûr a ni.

⁵An mit hmuh ngeiah kulh bang chu tipawp la, tah chuan la chhuak rawh.

⁶An mit hmuh ngeiah i kovah i pu ang a, thimah i kal chhuak tûr a ni; lei i hmuh loh nân i hmai i khuh tûr a ni; Israel chhûngte tân entîr lâwknaah ka siam che a ni si a,” a ti a.

⁷Tin, thu mi pêk ang chuan ka ti a; ka bungrua chu sal tâng tûr bungrua angin chhûn êngah ka la chhuak a, ka kutin bang chu tlaiah ka tipawp a, thimah ka la chhuak a, an mit hmuh ngeiah ka pu a.

⁸Tin, zîngah chuan LALPA thu ka hnênah a lo thleng a,

⁹“Mihring fapa, Israel chhûng, hel hmang chhûngte chuan i hnênah, ‘Eng nge i tih le?’ an ti che a ni lo vem ni?

¹⁰An hnênah chuan, ‘Lalpa PATHIAN chuan heti hian a ti: “He thupuan hi Jerusalem hotute leh Israel chhûngkaw pum pui an awmna mite chung thu tûr a ni.”

¹¹In tân entîr lâwkna ka nih hi. Ka tih ang tak hian an chungah tih a ni ang; thawn bovin, sal tâng tûrin an la kal ang,’ ti rawh.

¹²Tin, an zînga hotu awm chuan thim hnuaiah a kovin a pu ang a, a kal chhuak ang. An lâk chhuah nân bang chu an tipawp ang a, a mitin ram chu a hmuh tawh loh avângin a hmai a khuh tûr a ni.

¹³Amah chu ka lênin ka khuh ang a, ka thanga âwk a ni ang. Kaldai rama Babulon-ah chuan ka rawn hruai ang a, tah chuan a thi dâwn na a, hmuh chu a hmu lo vang.

¹⁴Amah pui tûra a kianga awm ṭhînte leh a vêngtute zawng zawng chu ram tinah ka tidarh ang a, khandaih phawiin ka ûm ang.

¹⁵Tin, hnamte zînga ka hnawh darha, ram tina ka tihdarh hunah chuan LALPA chu ka ni tih an hria ang.

¹⁶Amaherawhchu, khandaih te, ṭâm te, hripui te lakah chuan mi tlêm tê ka zuah ang; chûngte chuan an lo kalna rama hnamte hnênah chuan an tenawmna zawng zawng chu an puan nân; tin, kei hi LALPA chu ka ni tih an hria ang,” a ti a.

¹⁷Tin, LALPA thu chu ka hnênah a lo thleng leh a,

¹⁸“Mihring fapa, i chaw chu khûr hlawk hlawk chungin ei la, i tui chu manganga khûr chungin in rawh;

¹⁹tin, rama mite hnênah chuan, ‘Lalpa PATHIAN chuan, Jerusalem-a chêngte chungchângah leh Israel ram chungchângah chuan heti hian a ti a ni: “An chawte chu ren takin an ei ang a, an tui chu mangang takin an in ang a, a ram chu a chhûnga chêngte pâwngnêkna avângin a chhûnga thil awm zawng zawng lakah chuan tihramin a awm dâwn si a.

²⁰Tin, mi chênna khawpuite chu a ram ang a, a ram chu thlalêrah a chang ang; tichuan, LALPA chu ka ni tih an hria ang,” ’ tiin sawi rawh,” a ti a.

²¹Tin, LALPA thu chu ka hnênah a lo thleng a,

²²“Mihring fapa, Israel rama he thufing tawi in neih hi eng tihna nge ni - ‘Nikhua a lo reiin inlârna apiang a thlâwn leh mai ṭhîn,’ in tih hi?

²³Chuvângin, ‘Lalpa PATHIAN chuan heti hian a ti a ni: “He thufing tawi hi ka tibâng ang a, Israel ramah thufing tawiah an hmang tawh ngai lo vang; ni chu a hnai tawh a, inlârna tin thlen dik ni tûr chu,” tiin an hnênah sawi zâwk rawh.

²⁴Israel chhûngte zîngah inlârna lothlâwn rêng rêng leh, ṭhumvâwr ṭha lama sawisak derna rêng rêng a awm tawh lo vang.

²⁵LALPA chu ka ni si a, ka sawi ang a, ka thusawi chu hlen nghâl a ni ang a, khêk a ni lo vang. Aw hel hmang chhûngte u, in dam lai ngei hian thu ka sawi dâwn a, ka hlen dâwn si a,’ tih hi Lalpa PATHIAN thuchhuak a ni,” a ti a.

²⁶ LALPA thu chu ka hnênah a lo thleng leh a,

²⁷“Mihring fapa, ngai rawh, Israel chhûngtea mi chuan, ‘Inlârna a hmuhte chu nakina mi tûr a ni a, a sawi lâwkte pawh hla taka mi tûr a ni,’ an ti a ni.

²⁸Chuvângin, an hnênah chuan, ‘Lalpa PATHIAN chuan heti hian a ti a ni: “Ka thu eng mah hi khêk a ni lo vang a, ka thusawi apiang chu hlenin a awm zêl zâwk ang,” tih hi Lalpa PATHIAN thuchhuak a ni,’ tiin hrilh rawh,” a ti a.