Read Mizo_Old_version Ezekiela 13 Bible Online

Ezekiela 13 - Mizo_Old_version bible

Ezekiela 13

¹Tin, LALPA thu chu ka hnênah a lo thleng leh a,

²“Mihring fapa, Israel zâwlnei, mahni thinlung mai ata sawi hmangte chungah chuan thu sawi la, ‘LALPA thu chu ngai rawh u!’ ”

³Lalpa PATHIAN chuan heti hian a ti a ni: “Zawlnei â, mahni ngaih dân zuia eng mah hmu si lote chu an chung a pik e!

⁴Aw Israel, i zâwlneite chu khaw ram sihal ang chauh an ni ta.

⁵LALPA nia indonaa ding zo tûrin a râlṭi lai in tâwn ngam lo va, Israel chhûngte humhalhnaah in ṭangkai hek lo.

⁶‘LALPA thuchhuak a ni!’ titu chuan engmahlo mai leh sawi lâwkna lem mai an chang a, LALPA tirh an ni lo rêng rêng a ni; an thu chu ni ngei tûr angin mite an rintîr a.

⁷Inlârna lothlâwn mai in hmuin thu sawi lâwk dik lo in sawi a ni lâwm ni? ‘LALPA thuchhuak a ni,’ in la ti lehnghâl si a, kei chuan ka sawi tawp si lo va.”

⁸Chuvângin, Lalpa PATHIAN chuan heti hian a ti a ni: “Engmahlo mai in sawia, dâwt mai in hmuh avângin, ngai rawh u, ka dodâl che u a ni, tih hi LALPA thuchhuak a ni.

⁹Tin, ka kut hian engmahlo hmutute leh dâwt sawi lâwktute a dodâl ang a, ka mite inrâwn khâwmnaah an tel lo vang a, Israel chhûngte hming ziaknaah ziakin an awm hek lo vang; tichuan, Lalpa PATHIAN chu ka ni tih in hria ang.

¹⁰“Muanna awm si lova, ‘A muanawm e!’ tia ka mite an hruai bo avâng leh, mi bang siama hawlrivâp an hnawih mai avângin,

¹¹hawlrivâp hnawihtute hnênah chuan, ‘A tla leh mai ang, ruahpui a lo sûr ang a, nangni rial lian puite u, in lo tla ang a, thli nasa takin a tichhia ang,’ ti rawh.

¹²Tin, ngai rawh u, bang chu a chim hnu chuan, ‘In hawlrivâp hnawih chu khawiah nge?’ an ti dâwn lo che u em ni?”

¹³Chuvângin, Lalpa PATHIAN chuan heti hian a ti a ni: “Ka thinurin thlipui nasa takin ka tichhe vek ang, ka thinurin ruahpui a lo sûr ang a, ka thinurin rial nasa tak a tiral tûrin a lo tla ang.

¹⁴Tichuan, hawlrivâp in hnawih vâr bang kha ka tichim ang a, lei thlengin a sawp ang a; chutichuan, a lungphûmte pawh a lang hial ang; a chim ang a, bang chimah chuan tihboralin in awm ang; tichuan, LALPA ka ni tih in hria ang.

¹⁵Hetiang hian bang chungah leh hawlrivâp hnawihtute chungah ka thinur ka hrithla ang; tin, ‘Bang chu a awm tawh lo va, a beltute pawh an awm tawh hek lo,’ ka la ti ang che u.

¹⁶Chu chu Israel zâwlnei, Jerusalem chung thu sawia, muanna awm si lova muanna hmuhsaktute ngei kha, an awm ta lo,” tih hi Lalpa PATHIAN thuchhuak a ni.

¹⁷“Tin, nang mihring fapa, i mite fanute, an thinlung maia sawitute chu hmachhawn la, anmahni kalhin thu sawi rawh,

¹⁸‘Lalpa PATHIAN chuan heti hian a ti a ni: “Hmeichhia, mite bâna thil buntîr leh, mi nunnate man beh nâna mi lian mite lu khuhna ṭhuitute chu an chung a pik e! Mahni nunna tûrin ka mite nunna in man ang maw?

¹⁹Barli tlêm tê leh chhang them hmu tûra thi lo tûr tithi tûr leh, nung lo tûr tinung tûrin in dâwt sawi ka miten an awih avângin, ka mite zîngah ka hming in tibawrhbâng a ni.”

²⁰Chuvângin, Lalpa PATHIAN chuan heti hian a ti a ni: “Ngai rawh u, mi nunna sava anga man tûra in thil buntîrte chu ka hua a ni; in bânte chu ka pawt chhum vek ang a, in mi man tûrate nunna chu ka chhuah vek ang; sava anga in man tûrate nunna ngei chu.

²¹In lu khuhnate pawh chu ka pawt thlêr ang a, ka mite chu in kut ata ka chhuah ang a, in man theih tûrin in kutah an awm tawh lo vang; tichuan, LALPA chu ka ni tih in hria ang.

²²Ka tihlungngaih ni lovin, mi fel thinlung chu dâwtin in tina a; mi suaksual chu nungdama a awmna tûra a sualna kawng ata a inlamlêt lohna tûrin a kut in tichak a;

²³chuvângin, engmahlo mai, thusawi lâwk dik lo emaw chu in hmu tawh rêng rêng lo vang; tin, ka mite chu in kut ata ka chhanchhuak ang a, LALPA chu ka ni tih in hria ang,” a ti,’ tiin sawi rawh,” a ti a.