Read Mizo_Old_version Ezekiela 14 Bible Online

Ezekiela 14 - Mizo_Old_version bible

Ezekiela 14

¹Tichuan, Israel upa ṭhenkhatte chu ka hnênah an lo kal a, ka hmaah an ṭhu a.

²Tin, LALPA thu chu ka hnênah a lo thleng a,

³“Mihring fapa, hêng mite hian an milemte chu an thinlungah an la lût a, an hmaah an khawlohna tlûkna chu an dah a ni; kei mi râwn tûr an ni teh rêng em ni?

⁴Chuvângin, anmahni bia la, ‘Lalpa PATHIAN chuan heti hian a ti a ni: “Israel chhûngkuaa mi tin an thinlunga an milim la lûta, an hmaa an khawlohna tlûkna daha, zâwlnei hnêna lo kal apiang, kei LALPA hian an milim tamzia ang zêlin ka chhâng ang;

⁵Israel chhûngte chu an milim avânga min lo hransan tâk avângin an thinlung takah ka man theih nân.” ’

⁶“Chuvângin, Israel chhûngte hnênah chuan, ‘Lalpa PATHIAN chuan heti hian a ti a ni: “Lo kîr ula, in milimte lakah chuan lo kîr ula, in tenawmna zawng zawng chu hawisan rawh u.

⁷Israel chhûng zînga mi tu pawh emaw, mikhual Israel rama chêng ve emaw, ka laka intihranga, an thinlunga milim la lûta, an hmaa khawlohna tlûkna dah chunga an chungchânga mi râwn tûra zâwlnei hnêna kal chu, kei LALPA ngei hian ka chhâng mai ang.

⁸Chu mi chu ka hmachhawn ang a, mi mak tih atân kumkhaw tlaitluana hrilhfâk tûrin ka mite zîng ata ka tibo daih ang; tichuan, kei hi LALPA chu ka ni tih in hria ang.

⁹Tin, zâwlnei chuan buma awmin thu sawi sela, kei LALPA hian zâwlnei chu ka bum a ni a, a chungah ka kut ka lek ang a, ka mi Israel-te zîng ata ka tiboral ang.

¹⁰Tin, an khawlohna chu an phur ang; zâwlnei khawlohna chu amah râwntute khawlohna ang mai a ni ang;

¹¹Israel chhûngte chu ka laka an bo tawh lohva, an bawhchhiatnate zawng zawnga an intihbawlhhlawh tawh loh nân, ka mite an nih tawh zâwka, an Pathian ka nih theih nân,” Lalpa PATHIAN chuan a ti a ni,’ tiin sawi rawh,” a ti a.

¹²Tin, LALPA thu chu ka hnênah a lo thleng a,

¹³“Mihring fapa, ram miten bawhchhiatna thil tia, ka chunga thil tisuala, keiin ka kut ka leka, an chaw, nunna bul chu ka tihchhiata, an chunga ṭâm ka thlentîra, mi leh sate ka rawn tihbo chuan,

¹⁴hêng mi pathum - Nova, Daniela leh Joba-te meuh pawh hi lo awm ta ang sela, an felnain anmahni nunna chauh an chhanhim ang,” tih hi LALPA Pathian thuchhuak a ni.

¹⁵“Ram sakawlhte an ram ka fan chhuahtîra, ram chu an tihchhiata, a lo ṭiauva, ramsa avânga tu mah kal tlang tûr an awm loh chuan,

¹⁶hêng mi pathumte hi awm mah sela, a nuna ka nun chhûng chu,” tih hi Lalpa PATHIAN thuchhuak a ni, “An fanute, an fapate an chhanhim chuang lo vang; anmahni chauh chu chhanhimin an awm ang a, ram chu a chhe tho vang.

¹⁷“A nih leh, chu ramah chuan khandaih ka rawn leka, ‘Khandaih, che rawh,’ ka tih chuan mi leh sa chu ka râwt bo a ni ang a,

¹⁸hêng mi pathumte hi awm mah sela, a nuna ka nun chhûng chu,” tih hi Lalpa PATHIAN thuchhuak a ni a, “An fanute, an fapate an chhanhim chuang lo vang a, anmahni nunna chauh chhanhimin a awm ang.

¹⁹A nih leh, chu ramah chuan hripui ka rawn lêntîra, mi leh sa tibo tûra thisen chhuaha ka thinurna chu ram chunga ka rawn leih chuan,

²⁰Nova, Daniela leh Joba-te meuh pawh hi lo awm mah sela, a nuna ka nun chhûng chu,” tih hi Lalpa PATHIAN thuchhuak a ni, “An fanu emaw, an fapa emaw an chhanhim lo vang a, an felnain anmahni nunna ngei a chhanhim chauh vang.”

²¹Lalpa PATHIAN chuan heti hian a ti si a: “Jerusalem chunga ka rorêlna na tak pali - khandaih te, ṭâm te, ramsa kawlh te, hripui te, mi leh sa râwt bo vek tûra ka rawn thlen kim hunah chuan engtia nasa tak ni ang maw?

²²Amaherawhchu, ngai teh, chutah chuan awm chhun hruai chhuah tûrte chu hnutchhiahin an awm ang a, fanute leh fapate pawh: ngai teh u, in hnênah an lo chhuak ang a, an awm dân leh an thiltihte in hmu ang a; tin, Jerusalem chunga thil ṭha lo ka rawn thlen thu-ah chuan thlamuanin in awm ang a, a chunga ka rawn thlen tâk zawng zawng thu-ah pawh.

²³An awm dân leh an thiltihte in hmuh hunah chuan an thlamuan ang che u; a chunga ka thiltih tâk zawng zawng chu tih chhan nei lovin ka ti lo tih in hria ang, tih hi Lalpa PATHIAN thuchhuak a ni,” tiin.