Read Mizo_Old_version Ezekiela 16 Bible Online

Ezekiela 16 - Mizo_Old_version bible

Ezekiela 16

¹ LALPA thu chu ka hnênah a lo thleng leh a,

²“Mihring fapa, Jerusalem chu a tenawmnate hriat chhuahtîr la, a hnênah,

³‘Lalpa PATHIAN chuan Jerusalem hnênah chuan heti hian a ti a ni: I chhuahna ram leh i pianna ram chu Kanaan mite ram a ni a, i pa chu Amor mi a ni a, i nu chu Hit mi a ni.

⁴Tin, i pianna thu-ah chuan i pian niin i laihrui ah a ni lo va, tifai tûr chein tuia bual i ni hek lo; chi hnawih i tâwk lo va, tuam lum i ni hek lo.

⁵Lainat tûr chea i chunga hêng hi ti tûrin tu mit mahin a khawngaih lo che a; tâmlakah paih chhuah i ni ta zâwk a, i pian ni ata kha lungten i ni si a.

⁶“ ‘Tin, i kianga ka lo kalin thisena tâlin ka hmu chia, i hnênah chuan, “Thisenah awm mah la, nung rawh,” ka ti chia, a ni, ka ti che a ni, “Thisenah awm mah la, nung rawh.”

⁷Ram thil kuhmûm angin ka tiṭhang lian chia; tin, i ṭhang lian a, khua i mawi ta; i hnute a lo um a, i sam a lo ṭha a; ruak leh saruak mai i la ni tho va.

⁸Tin, i kianga ka lo kala ka en chein, ngaih la tham i lo ni ta a, ka puan ka zâwn chia, i saruak chu ka khuh tawh a che. A ni, i hnênah chhia ka chham a, thuthlungah ka luhpui ta chia, ka ta i ni ta e,’ tih hi Lalpa PATHIAN thuchhuak a ni.

⁹“Tichuan, tuiin ka bual tawh chia, a ni, i thisen chu ka sil faisak var chia, hriak ka hnawih ta che a ni.

¹⁰Puan cheiin ka thuam chia, savun ṭha mi pheikhawk ka buntîr chia, puanzaisînin ka tuam chia, maimaw puan ka khumtîr che a ni.

¹¹Cheimawinain ka chei chia, i kutah bânbun te, i nghâwngah rangkachak khaidiat te,

¹²i hnârah hnârvuah te, i bengah bengbeh te, i luah lallukhum mawi tak tein ka chei chia.

¹³Tichuan, rangkachak leh tangkaruaa cheimawi i ni ta a, i silhfênte chu puan zai sîn tak leh maimaw puan leh puan ṭhui mawi a ni a; i ei chu chhangphut dip leh khawizû leh hriak a ni. I mawi êm mai, lalnu pawh i tling ta.

¹⁴I mawina chu hnamte zîngah a thang chhuak a, ka ropuinaa thuamin i famkim ta, tih hi Lalpa PATHIAN thuchhuak a ni.

¹⁵“Mahse, i mawina chu i ring lutuk a, i hmingthanna chu i hur phah a, mi veivâk nazawng hnênah i hurna chu i tlângphal a, a tua pawh.

¹⁶I silhfênte hlîpin bâwlhmunte i cheimawi a, tah chuan i inphalrai a, hetiang hi a awm leh tawh ngai lo vang.

¹⁷Ka rangkachak leh ka tangkaraw bungbêl mawi tak tak ka pêk che kha i la a, mipa lem siam nân i hmang a, i hurpui ta a.

¹⁸I silhfên ṭhui mawite chu i la a, anmahni i tuam a, ka hriakte leh ka rimtuite chu an hmaah i hûng a.

¹⁹Ka chhang pêk che pawh kha chhangphut ṭha leh hriak leh khawizû, ka châwmna ṭhinte che kha rimtui atân an hmaah i hlui a; heti hi a lo ni ta, tih hi Lalpa PATHIAN thuchhuak a ni.

²⁰Chu lovah pawh i fanu i fapa, mi hrinsakte chu an hnênah inthawi nâna hman ral atân i pe a. I hurna hi thil namên a ni em ni?

²¹Ka fate i that a, meipuia paih lûta an hnêna i hlante hi?

²²I tenawmna leh i hurna zawng zawngah chuan, i naupan laia saruaka i awm leh i thisena i tâl mai mai laite kha i hre ta lo va.

²³“Tin, hêng i suahsualna zawng zawng hnuah pawh heti hi a lo ni a (‘I chung a pik e! A pik e!’ Lalpa PATHIAN chuan a ti a ni),

²⁴hmun langsârte i insiam a, kawtthlêr tinah hmun sângte chu i tân i sa a.

²⁵Kawtthlêr lû apiangah hmun langsârte chu i sa a, i mawina chu tenawmnaah i siam a, veivâk apiang hnênah i inhlîm lang a, i hurna chu a zual ṭhîn a ni.

²⁶Aigupta mi, i ṭhenawm, mi râwva tak mai nên chuan inngaihna sual i ti ta bawk a; mi tithinur tûrin i hurna chu a tizual ta a ni.

²⁷“Chuvângin, ngai rawh, i chungah ka kut ka lek a, i chaw pângngai chu ka tikiam a, nangmah hawtu Philistia fanu, i hur dân zahpui êm êm ṭhîntu hnênah chuan duh duha a tihah ka pe tawh che a.

²⁸Assuria mite hnênah pawh i hur bo va, tâwk tih lêm nei hek lo che; a ni, an hnênah i inphalrai a, i la kham chuang hek lo.

²⁹Kanaan ramah, Kaldai mite hnêna i hurna i la tizual ta cheu va, i la kham chuang lo fo.

³⁰“I thinlung chu a khawlo ta mang e - i chêtziaah hmeichhe luhlul sual tak mai thil i ti a, tih hi Lalpa PATHIAN thuchhuak a ni.

³¹Kawtthlêr lû apianga chânna bûk i siamah te, kawtthlêr tina hmun langsâr i siamah te hian hlawh i ûm loh avângin nawhchizuar mai pawh i ni lo ve.

³²Nupui uirê, pasalte aia mi hrante duh zâwktunu!

³³Nawhchizuar hnênah chuan thil an pe ṭhîn a, nang erawh chuan i pe zâwk ṭhîn - a duhtu che hnênah, ram tin ata an lo kala, an mutpui theih nân che i tlawn zâwk ṭhîn a ni.

³⁴Tin, i hur thua tu mân an pan lo che hi mi hur dang laka i danglamna chu a ni; nangmahin a man i pe zâwk a, tu mahin man an pêk loh che hi i danglamna chu a ni.

³⁵“Chuvângin, aw mi hurnu, LALPA thu chu ngai rawh!

³⁶Lalpa PATHIAN chuan heti hian a ti a ni: ‘I tenawmna leih chhuah a niha, i ngaihte nên in inpâwlna lama i saruakna tihlan a nih avâng leh, i tenawmna milim zawng zawng avâng leh, an hnêna i pêk i fate thisen avângin,

³⁷ngai rawh, nangmah ngaitu i nuamtâwlpuite zawng zawng leh, i lo ngaih tâk zawng zawngte leh i huat zâwng zawng zawngte chu ka ko khâwm ang; i vêlah ka hruai khâwm ang a, i saruakna zawng zawng an hmuh theih nân an hnênah i saruakna chu ka tilang ang.

³⁸Tin, hmeichhia, pasal ṭhena mahni fa thisen chhuah chung thu an rêl angin i chung thu ka rêl ang che; thinurna leh thîkna chu i chungah ka rawn thlen ang.

³⁹An kutah ka pe ang chia, i hmun langsârte chu an titlu ang a, i hmun sângte an tisawp ang; i silhfênte an hlîp ang a, i lunghlute an chhuhsak ang chia, saruak leh ruakin an kalsan ang che.

⁴⁰“ ‘I lakah vântlâng an pun ang a, lungin an dêng ang chia, khandaihin an chhun tlang ang che.

⁴¹I inte chu meiin an hâl ang a, hmeichhe tam tak mit hmuhah i chungah rorêlna an hlen ang; i hur hi ka tireh ang a, hlawh pawh i pe tawh lo vang.

⁴²Tichuan, ka thinurna i chungah ka hrithla zo vang a, ka thîkna che chu a reh tawh ang a, ka ngawi hle hle ang a, ka thinur tawh ngai lo vang.

⁴³I tleirâwl lai nite chu i hriat reng lohva, hêng thilahte hian mi tihvui tâk zâwk avângin ngai rawh, i chêtzia ang angin i chungah ka thlen ang,’ tih hi Lalpa PATHIAN thuchhuak a ni; tin, i tenawmna zawng zawng belhchhahin he hurna hi i ti tawh lo vang.

⁴⁴“Ngai rawh, thufing tawi hmang apiangin he thufing tawi hi an hmang ang, ‘A fanuin a nu a chhûn,’ tih hi.

⁴⁵I nu, mahni pasal leh fate lungtentu fanu kha i ni a, inlaizâwnna lamah chuan, mahni pasal leh fate lungtentute laizâwn i ni; i nu chu Hit mi a ni a, i pa lah Amor mi a ni.

⁴⁶I laizâwn, i u chu Samaria, i vei lama chêng ṭhîn kha amah leh a fanute nên an ni; i laizâwn, i nau lah chu, i ding lama chêng ṭhîn kha Sodom leh a fanute an ni.

⁴⁷Mahse, anmahni awm dân chu i zawh lo va, an tenawmna ang i ti lo na a, i awm dân zawng zawnga i khawloh zâwkzia ngaihtuahin chûng chu eng mah tham a ni lo.

⁴⁸A nuna ka nun chhûng chu,” tih hi Lalpa PATHIAN thuchhuak a ni, “Nang leh i faten an tih ang hi i laizâwn Sodom leh a fanute pawhin an ti hauh lo.

⁴⁹I laizâwn Sodom khawlohna chu hêng hi a ni: chapona te, ei puar lutuk te, amah leh a fanute nuamtâwlna mai mai te a ni a, mi retheite leh tlachhamte chu a pui chuang hek lo.

⁵⁰Tin, mi chapo tak an ni a, ka hmaa thil tenawm ti tawh an ni; tichuan, ṭha ka tih angin ka tibo hlawm tawh a ni.

⁵¹Samaria lah chuan i sual chanve pawh a ti lo; anmahni aia thil tenawm i tih nasat zâwk avângin i laizâwnte chu i tilang fel ta zâwk a ni.

⁵²I laizâwnte dik zâwka i lantîr avângin nang ngeiin i mualphona chu i phur tûr a ni; anmahni aiin thil tenawm nasa zâwk te i ti a, i sualnate avângin anni chu nang aiin an fel zâwk a ni; a ni, i laizâwnte fel zâwka i lantîrnaah hian nang chuan kimkîin mualphona i chang tûr a ni.

⁵³Tin, an awm dân, Sodom leh a fanu awm dân te, Samaria leh a fanu awm dân te, anmahni rualin nangma awm dân ngei pawh ka let ang;

⁵⁴an tân thlamuanna i lo nih ṭhinnaa i thiltih tâk zawng zawng avânga i zah theih nân.

⁵⁵Tin, i laizâwn, Sodom leh a fanute, Samaria leh a fanute chu an awm dân hmasa angin an awm leh ang a; nang leh i fanute pawh in awm dân hmasa angin in awm leh ang.

⁵⁶I suahsualna hmuhchhuah a nih hmaa i intihropui niahte khân, i laizâwn Sodom chu i kamchhe tleuhna a ni ṭhîn lo vem ni?

⁵⁷Tûnah zawng Suria fanu leh a vêla mi zawng zawng, Philistia fanute i vêla tinawmnahtu che khân an sawichhiat tâk vak che hi.

⁵⁸I hurna leh i tenawmna i pu zêl a ni,” tih hi LALPA thuchhuak a ni.

⁵⁹Tichuan, Lalpa PATHIAN chuan heti hian a ti: “Thuthlung bawhchhiain thutiam i pawisak lohzia ang zêlin i chungah ka ti ve dâwn a ni.

⁶⁰Nimahsela, i naupan laia i hnêna ka thuthlung chu ka hre reng ang a, i hnênah kumkhaw thuthlung ka siam ang.

⁶¹Tichuan, i laizâwnte, i u leh i naute i pawm hunah chuan i awm dân te i lo hre chhuak ang a, i inzahpui ang; anni chu i fanu atân ka pe chia, i thuthlung avâng erawh chuan ni lovin.

⁶²I hnênah ka thuthlung ka tinghet ang a, LALPA ka ni tih in hre tawh ang.

⁶³I thiltih zawng zawngte ka ngaihdam vek hunah che chuan, i hriat renga i zah avânga kimkia i kâ i ân ngai tawh loh nân,” tih hi Lalpa PATHIAN thuchhuak a ni.