Read Mizo_Old_version Ezekiela 17 Bible Online

Ezekiela 17 - Mizo_Old_version bible

Ezekiela 17

¹Tin, LALPA thu chu ka hnênah a lo thleng a,

²“Mihring fapa, Israel chhûngte hnênah chuan thu kherkhiap siam chhuak la, tehkhin thuin sawi rawh.

³‘Lalpa PATHIAN chuan heti hian a ti a ni, ti rawh: “Mupui lian tak, thla hlai pui, thla ki sei tak, ṭial buai, hmul bit tak Lebanon tlângah a thlâwk a, sidar thing zîk a la a,

⁴a ṭang zîk no ber chu a thliak a, mi veivahna ramah a thlawhpui a, sumdâwnna khawpuiah chuan a phun ta a.

⁵Chumi ram thlai chi chu a la bawk a, lei ṭhaah chuan a kui ṭiak a, tui tam tak kamah chuan a phun ta a, tuipuisuthlah angin a phun a.

⁶Tin, a ṭhang a, grêp hrui ṭawi tak a lo ni ta a; a zârte chu a lo zâm lêt a, a zungte chu a hnuaiah a awm a; tichuan, grêp kûng a lo ni a, pêngte a rawn chhuah a, a ṭang chu a lo chawr ta a.

⁷“ ‘ “Mupui lian tak dang a awm bawk a, thla hlai pui leh hmul bit tak a nei ve a; tin, ngai rawh, he grêp kûng hi ama lamah khân a zung a zâm a; a phunna hmun aṭang khân ama lamah pêngte a chawr chhuak ta a, amah chu tuiin a châwm theih nân.

⁸Pêngte a chhuaha, grêp ṭha tak a nih theih nân tui tam tak kama lei ṭhaa phun a ni.” ’

⁹Lalpa PATHIAN chuan heti hian a ti a ni: ‘A puitling hlen dâwn em? A vuai mai theih nân a rahte sât thlain, a zung chawpin a pawt chhuak dâwn lâwm ni? A hnah chawr thar zawng zawng pawhin a vuai phah ang; a zung chawpa pawt chhuak tûrin thiltihtheihna nasa tak emaw, mipui tam tak emaw a ngai chuang dâwn em ni?

¹⁰A ni, ngai rawh, phun mah ni sela, a puitling hlen dâwn em ni? Khawchhak thlîin a rawn nuai hunah chuan a vuai zo mai dâwn lâwm ni? A ṭona hmun ngeiah chuan a vuai mai ang,’ ti rawh,” a ti a.

¹¹Tin, LALPA thu chu ka hnênah a lo thleng leh a,

¹²“Hel hmang chhûngte hnênah chuan sawi rawh: he thil awmzia hi an hre lo vem ni? Hrilh rawh, ‘Ngai rawh u, Babulon lal chu Jerusalem-ah a lo kal a, an lal leh hotute chu a man a, ama hnênah Babulon-ah a hruai a,

¹³an lal thlah pakhat a man a, thuthlung a siampui a, thu a tiam luihtîr a, rama mi liante chu a hruai bo vek a;

¹⁴a lalna ram a tlâwma, amaha a din chhuah theih tawh loh nân, a thuthlung vuan chung chauhva a din theihna tûrin.

¹⁵Mahse, sakawrte leh mi tam tak rawn tîr tûra dîl tûrin Aigupta ramah palai tîrin a chungah a hel ta a. A hlawhtling ang em? Chutiang titu chu a inchhanchhuak ang em? Thuthlung chu bawhchhe siin a chhuak tho vang em?

¹⁶A nuna ka nun chhûng chu,’ tih hi Lalpa PATHIAN thuchhuak a ni; ‘Lalber, lala siamtu chênna ngeiah chuan - a chhechhamte hmusit leha, a thuthlungte bawhchhetu chu, ama hnên ngeiah Babulon-ah chuan a thi ang.

¹⁷Indonaa mi tam tak tihhlum tûra mual pâwngte leh kulhte an siam hunah pawh, Pharaoa sipai rual leh pâwl ropui tak pawhin eng mah an tihsak thei lo vang.

¹⁸Thuthlung bawhchhiain chhechham chu an hmusit ta si a; thu a intiam hnuah hêng thil zawng zawng hi a ti leh ta si a le, a chhuak awzâwng lo vang.’ ”

¹⁹Chuvângin, Lalpa PATHIAN chuan heti hian a ti a ni: “Ka chhechham a hmusit a, ka thuthlung a bawhchhia a, a nuna ka nun chhûng chu, ama chungah ka ṭuan ngei ngei ang.

²⁰Lênin ka khuh ang a, ka thangah chuan a âwk ang a, Babulon-ah ka rawn hruai ang a, tah chuan a bawhchhiatna, ka chung ngeia a bawhchhiatnate avâng chuan amah ka bei ang.

²¹Tin, a pâwl zawng zawnga tlânchheho zawng zawng chu khandaihin an thi ang a, a la bângte chu kâwlkil tinah an darh ang; tin, kei LALPA hian ka sawi tawh tih in hre chhuak ang.”

²²Lalpa PATHIAN chuan heti hian a ti a ni: “Sidar sâng tak zîk chu kei hian ka la ang a, ka phun ang; A ziding bera zîk no chu ka thliak ang a, Tlâng sâng langsâr takah ka phun ang.

²³Israel sânna tlângah chuan ka phun ang a, Zârte a rawn chhuah ang a, a lo rah ang a, Sidar ropui tak a ni ang; A hnuaiah chuan chunglêng sava chi tinrêng an chêng ang a. A zâr hlimah te chuan an awm ang.

²⁴Tin, ram thing zawng zawngte chuan, Kei LALPA hian thing sângte ka tihniam a, Thing hniamte chu ka tisâng a, Thing hringte ka tiro va, Thing rote ka tiduah a ni, tih an hria ang; Kei LALPA hian ka sawi tawh a, ka ti tawh bawk a ni,” a ti a.