Read Mizo_Old_version Ezekiela 18 Bible Online

Ezekiela 18 - Mizo_Old_version bible

Ezekiela 18

¹Tin, LALPA thu chu ka hnênah a lo thleng leh a,

²“Israel ram chungchângah he thufing tawi an hman hi eng tihna nge, ‘Paten grêp thûr an ei a, an fate ha a ṭim e,’ tih hi?

³A nuna ka nun chhûng chu, Israel-ah he thufing tawi hi hman leh tih in nei tawh lo vang,” tih hi Lalpa PATHIAN thuchhuak a ni.

⁴“Ngai rawh u, nunna zawng zawng ka ta vek a ni, pa nunna ka ta a ni ang bawkin fapa nunna pawh ka ta a ni; thil tisualtu apiang an thi ang.

⁵Mahse, mi chu a fela, thiang leh dik chauh a tiha,

⁶bâwlhmunahte ei lova, Israel chhûngte milim lam hawi hek lova, a ṭhenawm nupui chunga thil tenawm ti hek lova, hmeichhe fel lo lai hnaih hek lova,

⁷tu ma chunga thil tisual lova, leibatu thil dahkham pe kîr zâwka, tu mah rawk lova, riltâm hnêna ei tûr pea, saruak puan silhtîra,

⁸a pung ûm tûra pûktîr lova, a pung pawh la hek lova, thil sual ti tûra a kut sûma, mi leh mi inkâra rorêlna dik taka titlua,

⁹ka dân siamte zawha, dik taka tia, ka rorêlnate a vawn chuan - mi fel a ni a, a nung ngei ang!” tih hi Lalpa PATHIAN thuchhuak a ni.

¹⁰Mahse, fapa rûk hmang a hrina, thisen chhuahtu a niha, hetiang rêng rêng hi a tiha,

¹¹a tih tûr zâwk chu a tih lohva, bâwlhmunahte a ei zâwka, a ṭhenawm nupui a tihbawrhbâna,

¹²rethei leh tlachhamte a tihduhdaha, a rawka, a dahkham a pêk kîr lohva, milimte lam a hawia, thil tenawm a tiha,

¹³a pung ûma a pêka, a pung a lâk bawk chuan - a nung ang em? A nung tawp lo vang! Hêng thil tenawm zawng zawng hi a ti miau si a, a thi ngei ngei ang, ama thisen mawh chu a phur tûr a ni.

¹⁴“Tin, ngai rawh, fapa lo hring ve sela, a pa thil sual tih tawh zawng zawng kha a hmuha, a hlauhva, chutiang a tih ve lohva,

¹⁵bâwlhmuna a ei lohva, Israel chhûngte milim lam hawi lova, a ṭhenawm nupui a tihbawrhbân lohva,

¹⁶tu ma chunga thil a tihsual lohva, dahkham eng mah la lova, tu mah rawk lova, riltâmte ei tûr pe zâwka, saruakte puan a silhtîra,

¹⁷rethei laka a kut a sûma, a no leh a pung la lova, ka thupêkte hmanga ka dân siamte zawhtu a nih chuan, a pa khawlohna avângin a thi lo vang a, a nung ngei zâwk tûr a ni.

¹⁸A pa erawh zawng râwng taka mi a hnehchhiaha, a unaupa rawkrâla beia, a mite zînga thil ṭha lo chu a tih avângin, ngai rawh, a khawlohna avângin a thi tûr a ni.

¹⁹Mahse, ‘Engah nge fapa chuan a pa khawlohna a tuar loh vang?’ in ti ṭhîn. Fapa chuan dân chu zâwma thil fel a tiha, ka dân siamte zawng zawng chu a vawna, a tih bawk chuan a nung ngei tûr alâwm.

²⁰Thil tisualtu chu a thi tûr a ni. Fapa chuan a pa khawlohna chu a tuar lo vang a, pa pawhin fapa khawlohna chu a tuar hek lo vang; mi fel felna chu amahin a têl ang a, mi sual sualna chu amahin a phur ang.

²¹Amaherawhchu, mi sual chuan a thil sual tih zawng zawngte a hawisana, ka dân siamte a vawna, dân chu zâwma thil fel a tih chuan a nung ngei ang, a thi lo vang.

²²Bawhchhiatna a lo tih tawh rêng rêng kha chu hriatsak reng a ni tawh lo vang; a lo tih tawh a felna avângin a nung ang.

²³“Mi sual thihnaah hian lâwmna rêng ka nei em ni? A kawngte chu a hawisana, a nunna zâwk lo chu?” tih hi Lalpa PATHIAN thuchhuak a ni.

²⁴Amaherawhchu, mi fel chuan a felna kawng a hawisana, khawlohnate a tiha, mi sualte tih ang zêla thil tenawmte a tihin a nung dâwn em ni? A thil fel tih eng mah kha hriat reng a ni tawh lo vang a, a bawhchhiatna a bawhchhiatah leh thil sual a tihnaah khân, chumi ngeiah chuan a thi ang.

²⁵“Mahse, ‘Lalpa tih dân hi a inang fo lo ve,’ in ti ṭhîn a. Israel chhûngte u, ngai rawh u khai, ka tih dân a inang fo lo vem ni? In tih dân chu a inang lo fo zâwk a ni lâwm ni?

²⁶Mi fel chuan a felnate a hawisana, khawlohnate a tih chuan, tah chuan a thi ang a, khawlohna a tihah chuan a thi ang.

²⁷Chu lo pawh chu, mi sualin a sualna a lo tih tawhte chu a hawisana, dân chu a zawma, thil fel a tih chuan a nunna a chhanhim ang.

²⁸A inngaihtuaha, a bawhchhiatna a lo tih tawh zawng zawng chu a hawisan avângin a nung ngei ang, a thi lo vang.

²⁹Mahse, Israel chhûngte chuan, ‘Lalpa tih dân chu a inang fo lo ve,’ an ti a. Aw Israel chhûngte u, ka tih dânte hi a inang fo a ni zâwk lâwm ni? Nangni tih dânte erawh chu a inang lo fo zâwk a ni lâwm ni?

³⁰Chuvângin, aw Israel chhûngte u, mi tin, nangmahni tih dân ang zêlin ro ka rêl ang che u,” tih hi Lalpa PATHIAN thuchhuak a ni. “Inlamlêt ula, in bawhchhiatna zawng zawngte chu hawisan rawh u; tichuan, khawlohna chu in tlûkchhiatna a ni dâwn lo nia.

³¹In bawhchhiatna zawng zawng, in lo bawhchhiat tawhte chu paih bo vek ula, thinlung thar leh rilru thar insiam rawh u. Engah nge in thih ang le, aw Israel chhûngte u?

³²Mî thihnaah chuan lâwmna ka nei hauh si lo va,” tih hi Lalpa PATHIAN thuchhuak a ni. “Chuvângin, inlamlêt ula, nung rawh u.”