Read Mizo_Old_version Ezekiela 2 Bible Online

Ezekiela 2 - Mizo_Old_version bible

Ezekiela 2

¹Tin, ka hnênah, “Mihring fapa, i kein ding rawh, i hnênah thu ka sawi dâwn e,” a ti a.

²Tin, ka hnêna thu a sawi lai chuan thlarau chu keimahah a lo lût a, ka kein mi dintîr a; tin, mi betu chu ka ngaithla ta a.

³Tin, ka hnênah, “Mihring fapa, Israel fate hnênah, hel hmang hnam, ka chunga hel ṭhînte hnênah chuan ka tîr a che: anmahni leh an thlahtute pawhin vawiin thleng hian ka chungah an bawhchhe ṭhîn a ni.

⁴Chhuan luhlul leh tihmawhte an ni a, an hnênah ka tirh che hi; tin, an hnênah chuan, ‘Lalpa PATHIAN chuan heti hian a ti,’ i ti tûr a ni.

⁵Tin, annin an ngaithla emaw, an ngaithla lo emaw (hel hmang an ni si a), an zîngah zâwlnei a awm tih an hre reng tûr a ni.

⁶Tin, nang, mihring fapa, anmahni hlau suh la, an thu-ah pawh zâm hek suh, i hnênah chuan lênhlîng leh hnimhlîngneite awmin, khawmualkaikuang zînga chêng ni mah la; hel hmang mi ni mah sela, an thu chu hlau suh la, an lan dânah zâm hek suh.

⁷Tin, an ngaithla emaw, ngaithla lo emaw, an hnênah ka thu i sawi tûr a ni; hel hmang tak an ni si a.

⁸Amaherawhchu, nang mihring fapa, i hnêna ka sawi hi ngaithla rawh; mi hel hmangte angin hel hmang ni ve suh, i kâ âng la, ka pêk che chu ei rawh,” a ti a.

⁹Tin, ka han en a, ngai teh, kutin mi rawn ban a; tin, ngai teh, kutah chuan lehkhabu zial a awm a.

¹⁰Ka hmaah a han pharh a, a chhûng lam leh a pâwn lama ziak a ni a; ṭahna te, lusûnna te, chungpikna te ziakin a awm a.