Read Mizo_Old_version Ezekiela 20 Bible Online

Ezekiela 20 - Mizo_Old_version bible

Ezekiela 20

¹Tin, heti hi a ni a, kum sarihna, thla ngana, chumi thla ni sawm niah chuan Israel upa tute emaw LALPA râwn tûrin an lo kal a, ka hmaah an ṭhu a.

²Tin, LALPA thu chu ka hnênah a lo thleng a,

³“Mihring fapa, Israel upate chu bia la, an hnênah, ‘Lalpa PATHIAN chuan heti hian a ti a ni: “Mi râwn tûra lo kal em in nih? A nuna ka nun chhûng chu, nangni râwnin ka awm lo vang,” tih hi Lalpa PATHIAN thuchhuak a ni,’ ti rawh.

⁴I chachhuah dâwn lâwm ni? Mihring fapa, chachhuah ta che. An pate tenawmnate chu hriattîr rawh;

⁵tin, an hnênah, ‘Lalpa PATHIAN chuan heti hian a ti a ni: Israel-ho ka thlan nia Jakoba chhûng ka thlante hnênah kut phar meuhva Aigupta rama an hnêna ka inhriattîra, an hnêna ka kut ka phara, “Kei hi LALPA in Pathian chu ka ni e,” tia,

⁶chûng nia Aigupta ram ata hruai chhuaka, an tâna ka ram hual, hnutetui leh khawizua luang ram, ram zawng zawnga mawi bera hruai lût tûra ka kut ka phar niah chuan,

⁷an hnênah, “Mi tinin in mita hmuh thil tenawm chu paih bo ula, Aigupta rama milimte chuan intibawlhhlawh suh u, kei hi LALPA in Pathian chu ka ni e,” tiin ka sawi a.

⁸Mahse, ka chungah an hel a, min ngaihsak rêng rêng lo va, mi tinin an mita hmuh thil tenawmte pawh chu an paih bo lo va, Aigupta milimte chu an hawisan hek lo. Tah chuan an chunga ka thinurna hrithla tûrin, Aigupta ram chhûngah ngei chuan ka thinurna ka leih nâng emaw, ka ti a.

⁹Mahse, keima hming humhalh nân ka bei ta zâwk a, an awmna hnamte mit hmuhah Aigupta ram ata hruai chhuakin an hnênah ka inhriattîr a, chûng hnamte mit hmuhah chuan ka hming sawichhiata a awm loh nân.

¹⁰Chutichuan, Aigupta ram chhuahsan tûrin ka ti a, thlalêrah ka hruai lût ta a.

¹¹“ ‘Tin, ka dân siamte chu anmahni ka pe a, ka thurêlte chu ka entîr a, chu chu miin an zawm chuan an nunna tûr a ni.

¹²Chu bâkah, kei leh anmahni inkâra chhinchhiah nân ka Chawlhnite chu anmahni ka pe bawk a, kei hi LALPA, anmahni serh hrangtu ka ni tih an hriat theih nân.

¹³Mahse, Israel chhûngte chu thlalêrah khân ka chungah an hel a, ka dân siamte chu an zawh lo va, ka thurêlte miin a tiha a nunna tûr chu an paihthla a, ka Chawlhnite pawh nasa takin an bawhchhia a; tichuan, thlalêrah chuan anmahni tiboral tûrin ka thinrimna chu an chungah ka leih nâng emaw, ka ti a.

¹⁴Ka hruai chhuah lai hretute hnam ngei mit hmuhah tihchhiata a awm loh nân, ka hming humhalhin ka bei ta zâwk a ni.

¹⁵Chutichuan, thlalêrah khân ka ram pêk, hnutetui leh khawizua luang ram, ram zawng zawnga mawi berah chuan ka hruai lût lo vang, bân phar meuhvin ka ti a;

¹⁶ka thurêlte an paihthlâka, ka dân siamte an zawh lohva, ka Chawlhnite an bawhchhiat avângin; an thinlung chuan an milimte a âwn tlat si a.

¹⁷Mahse, tiboral lo tûrin ka mitin a hmuh hmaih ta a, thlalêrah pawh khân ka tiboral vek ta lo mai a ni.

¹⁸“ ‘Tin, thlalêrah chuan an fate hnênah, “In pate dân siam chu zâwm lo ula, an thurêlte zâwm lo ula, an milimte chuan intibawrhbâng hek suh u;

¹⁹kei hi LALPA in Pathian chu ka ni a, ka dân siamte zawh ula, ka thurêlte vawng ula, zâwm rawh u.

²⁰Ka Chawlhnite serh ula, kei leh nangni inkâra chhinchhiahna a ni ang a, LALPA in Pathian chu ka ni tih in hriat theihna a ni dâwn nia,” ka ti a.

²¹Mahse, an fate chu ka chungah an hel a, ka dân siamte chu an zawh lo va, ka thurêlte, miin a tiha a nunna tûr chu, zâwm tûrin an vawng hek lo; ka Chawlhnite chu an bawhchhe ta a; thlalêrah khân ka thinurna hrithla tûrin an chungah ka thinrimna ka leih nâng emaw, ka ti a.

²²Mahse, ka kut ka sûm a, ka hruai chhuah lai hretute hnam ngei mit hmuha tihchhiata an awm loh nân, ka hming humhalhin ka bei ta zâwk a ni.

²³Chu lo pawh chu, hnamte zîngah anmahni ka tidarh ang a, ram tinah ka tiṭaiṭâm ang, thlalêrah khân kut phar meuhvin ka lo ti a.

²⁴Ka thurêlte an zawm lohva, ka dân siamte an paihthlâka, ka Chawlhnite an bawhchhiata, an pate milim lam an hawi zâwk avângin.

²⁵Chu lo pawh, dân siam ṭha lo chu ka pe a, an nun lohna tûra thurêlte nên;

²⁶an thil dawn, chhûl keutu zawng zawng meia an paihnaah chuan anmahni ka tibawlhhlawh a, ka tikhawhar a, a tâwpah LALPA chu ka ni tih an hriatna tûrin.

²⁷“ ‘Chuvângin, mihring fapa, Israel-ho hnênah thu sawi la, an hnênah, Lalpa PATHIAN chuan heti hian a ti a ni: In pate chuan hêngah hian mi la sawichhe cheu a ni; ka chunga bawhchhiatna thil an tihahte hian.

²⁸Kut phar meuhva anmahni ka tiam ramah hian ka rawn hruai luhin, tlâng sâng leh thing buk lian an hmuh apiangah an inthawinate an hlân a, an thil hlan thinurthlâk tak maite chu an pe a. An rimtuite an siam a, an in tûr thilhlante chu an bun chhuak si a.

²⁹Tichuan, keiin an hnênah, “Bâwlhmun in kal fonate hi eng in tihna nge ni?” ka ti a; chutichuan, a hming atân vawiin thleng hian Bama tih a ni ta a ni e,’ ti rawh.

³⁰Tichuan, Israel chhûngte hnênah chuan sawi la, ‘Lalpa PATHIAN chuan heti hian a ti a ni: “In pate ang zêlin mahni in intibawlhhlawhin an tenawmna kawngahte chuan in hur bo a ni maw?

³¹In thil dawn in hlânin, in fate meiah in paih a, vawiin thleng hian in milim zawng zawng chuan in intibawlhhlawh a ni lâwm ni? Nangni râwn tûr em ka nih, aw Israel chhûngte u? A nuna ka nun chhûng chu nangni râwnin ka awm lo vang,” tih hi Lalpa PATHIAN thuchhuak a ni.

³²Kan vêla hnam dang awze mite anga thingbul lungbul be tûr kan ni, in rilruin in ti na a, in ni tawp lo vang.’

³³“A nuna ka nun chhûng chu, kut thahrui chak takin, bân phar chung leh thinrim chhuahin in chungah ka lal ngei ngei ang,” tih hi Lalpa PATHIAN thuchhuak a ni.

³⁴“Hnamte zîng ata ka hruai chhuak ang che u a, tihdarha in awmna ram ata chu kut chak tak leh bân phar leh thinrim chhuahin ka hruai khâwm ang che u.

³⁵Awze mite thlalêr ramah chuan ka hruai lût ang che u a, inhmachhawnin kan inbei ang.

³⁶Aigupta ram thlalêra in pate ka beih ang takin nangni pawh ka bei ang che u,” tih hi Lalpa PATHIAN thuchhuak a ni.

³⁷“Tin, tiang hnuaiah ka luhtîr ang che u a, thuthlung khuahkhirhna hnuaiah ka hruai lût ang che u;

³⁸tin, in zîng ata mi helte leh ka chunga bawhchhetute chu ka thian fai ang a, an awmna ram aṭangin ka hruai chhuak ang a; mahse, Israel ramah chuan an lût tawp lo vang. Tichuan, LALPA chu ka ni tih an hria ang.

³⁹“Nangni pawhin, aw Israel chhûngte u,” Lalpa PATHIAN chuan heti hian a ti a ni: “Ka thu in ngaihthlâk dâwn loh chuan tûn hnuah pawh in milim rawng chu bâwl ṭheuh mai ta che u; mahse, ka hming thianghlim chu in thilpêkte leh in milimtein in tibawlhhlawh tawh lo vang.

⁴⁰Ka tlâng thianghlim, Israel sânna tlângah chuan, tah chuan Israel chhûngte zawng zawng chuan an zavaiin, chu ramah chuan ka rawng an bâwl ang; tah chuan anmahni ka lâwm tawh ang a, tah chuan in thilhlante, in thilpêk ṭha ṭhate, in thil serh zawng zawngte ka duh tawh ang.

⁴¹Hnamte zîng ata ka lâk chhuah hun che u leh, ram tina in darhna ata ka hruai khâwm hunah che u chuan, rimtui atân ka pawm tawh ang che u a, hnamte mit hmuhah chuan nangmahniah hian ka thianghlimzia a lang tawh ang,” Lalpa PATHIAN chuan a ti a ni.

⁴²“Tin, Israel ram, kut phar meuhva in pate pêk ka tiam ramah ka hruai luh hunah che u chuan LALPA ka ni tih in hria ang.

⁴³Tin, tah chuan in awm dânte leh in thiltih, in intihbawlhhlawhna zawng zawngte chu in hre tawh ang a; tichuan, in thil ṭha lo tih zawng zawngte avâng khân nangmahni mit hmuh ngeiah in inten tawh ang.

⁴⁴Tin, in awm dân ṭha lote ang ni lova, in thiltih khawlote ang ni hek lova, ka hming humhalh tûra ka tihpuitlin che u hunah chuan, aw Israel chhûngte u, LALPA chu ka ni tih in hre tawh ang, tih hi Lalpa PATHIAN thuchhuak a ni,” tiin.

⁴⁵Tin, LALPA thu chu ka hnênah a lo thleng a,

⁴⁶“Mihring fapa, chhim lam hmachhawn la, chhim lam hawiin i thu thlah la, chhim lam ngawpui lamah thu sawi la,

⁴⁷chhim lam ngawpui hnênah chuan, ‘LALPA thu hi ngai rawh, Lalpa PATHIAN chuan heti hian a ti a ni: “Ngai rawh, nangmahah mei ka chhêm ang a, nangmaha thing hring zawng zawng chu a kâng zo vang a, thing ro apiang pawh; meialh hluah hluah chu a rêm lo vang a, chhim aṭanga hmâr thlengin, eptu zawng zawngte chu a ût ang.

⁴⁸Tin, mi zawng zawngin kei LALPA hi mei chhuahtu ka ni tih an hmu ang a, a mit lo vang,” a ti e,’ ti rawh,” a ti a.

⁴⁹Tichuan, kei chuan, “A! Lalpa PATHIAN, ‘Tehkhin thu sawitu mai alâwm,’ mi ti ang asin,” ka ti a.