Read Mizo_Old_version Ezekiela 21 Bible Online

Ezekiela 21 - Mizo_Old_version bible

Ezekiela 21

¹Tin, LALPA thu chu ka hnênah a lo thleng a,

²“Mihring fapa, Jerusalem hmachhawn la, a hmun serhte lam hawiin i thu thlah la, Israel ram chungah thu sawi ang che;

³Israel ram hnênah chuan, ‘Heti hian LALPA chuan a ti a ni: “Ngai teh, ka do che a ni, ka khandaih chu a pai ata ka phawi ang a, in zînga mi fel leh fel lo angkhatin ka râwt ang.

⁴Tichuan, in zînga mi fel leh fel lo ka râwt dâwn avâng chuan ka khandaih chu a pai ata a chhuak ang a, chhim lam ata hmâr lam thlengin mihring zawng zawng a râwt ang.

⁵Tin, mi zawng zawngin, kei LALPA hian ka khandaih a pai ata ka phawi a ni tih an hria ang a, a inkhung leh tawh ngai lo vang.” ’

⁶Chuvângin, nang mihring fapa, rûm vawng vawng la, lungchhe takin an mit hmuhah rûm rawh.

⁷Tin, ‘Engati nge i rûm?’ an tih che chuan, ‘Thu eng emaw avângin a lo thleng dâwn si a; tin, thinlung tinrêng a tuiral ang a, kut zawng zawng a zâwi ang a, rilru tinrêng a chau vang a, khûp zawng zawng chu tui angin a zâwi ang a, ngai rawh, a lo thleng e, a hlen ang, tih hi Lalpa PATHIAN thuchhuak a ni,’ ti rawh,” a ti a.

⁸Tin, LALPA thu chu ka hnênah a lo thleng leh a,

⁹“Mihring fapa, thu sawi la, ‘Hetiang hian LALPA chuan a ti a ni: “ ‘Khandaih, khandaih, tah hriam a ni ta a, Tihtlêt a ni ta!

¹⁰Mi sah nân tah hriam a ni ta, Tihtlêt a ni, kâwlphe angin! Kan la hlim cheu dâwn em ni? Ka faa tiangin a chhîng zo ve, thing tin.

¹¹Tihtlêt a ni, vai vêl atân, A ni, khandaih tah hriam tihtlêt a ni, Thattu kuta chuang tûrin.

¹²Mihring fapa, ṭap la, chiau vawng vawng rawh, ka mite chunga thleng tûr a ni si; Israel mi lian zawng zawng chungah ngei chuan. Pêk an ni e, ka mite nên, chemsen hnuaiah; Chuvângin, mangang rawh, i mal bêngin.

¹³Fiahna a awm si a, engtin nge ni ang - Mi dang chhîngtu tiang chu awm suh sela?’ ” Tih hi Lalpa PATHIAN thuchhuak a ni e.

¹⁴“Chuvângin, nang, mihring fapa, kut bêng hialin thu sawi rawh; Thih theihna chemsen lên zual la, a lêt thumin, A hual vêl e, mi ropui, thahna chemsen chuan.

¹⁵Thinlung tuiral, an tlûkna a pun nân e, Chemsen tle tak kawngka tinah ka riah e, A! Kâwlphe iangin a tle, thihna chemsen.

¹⁶Invilikin che vak ang che, ding lamah, Invilikin vei lamah pawh vai zêl la, I hma zâwn apiangah pawh.

¹⁷Kei pawhin kut ka lo bêng ang a, Ka hlen ngei ang, ka thinurna, Kei LALPAN hei hi ka sawi tawh e, a ti, ti rawh,” a ti a.

¹⁸Tin, LALPA thu chu ka hnênah a lo thleng leh a,

¹⁹“Mihring fapa, Babulon lal khandaih lo thlen theihna tûrin kawng pahnih lo siam rawh; chûng kawng hnihte chu ram pakhat aṭangin a lo chhuak tûr a ni. Kawng kawhhmuhna siam la, khawpui luhna kawtchhuahah chuan siam rawh.

²⁰Kawng chu Amon mite khua Raba-a khandaih lo thlenna tûrin ruat la, Judai ram laia Jerusalem kulhah pawh.

²¹Aien tûrin Babulon lal chu kawng pêngah chuan a ding a, kawng hnih infinna takah chuan; thalte chu a thing rawk rawk a, teraphim a râwn a, sa thin chu a en a.

²²A aiennaah chuan a kut ding lamah Jerusalem a lo chuang ta a, kulh sut chhiatna te, râl bei hawhawa au te, kawngka zâwna kulh sut chhiatna te, mual pâwng chhûn te, kulh siamte nên.

²³Aien thlâwn mai ang a ni a; mahse, mana an awmna tûra an khawlohna hriat chhuahna tûr chauh a ni.

²⁴“Chuvângin, Lalpa PATHIAN chuan heti hian a ti a ni: ‘In khawlohna hriat rengna tûra in siam tâk avângin in bawhchhiatnate a lang a; tichuan, in thiltih zawng zawngah in sualnate a lang reng a, hriat chhuah in lo nih tâk avângin kuta man in la ni ang.

²⁵Tin, nang Israel hotu, mi sual thi tûra hliam pa, i sualna hremna tâwpkhâwk ni a lo thleng e;

²⁶Lalpa PATHIAN chuan heti hian a ti: “Hotu lukhum chu paihsak ula, lallukhum chu paihsak rawh u; hei hi a ngaiin a awm lo vang. Mi tlâwmte chawisâng ula, mi liante chu titlâwm rawh u.

²⁷Ka letling ang, ka letling ang, ka letling ang. Hei pawh hi a ngaiin a awm lo vang, a neitu tak tûr a lo kal hma zawng amah chu ka pe ang.” ’

²⁸“Tin, nang mihring fapa, thu hril la, heti hian ti rawh: ‘Lalpa PATHIAN chuan Amon fate chungchângah leh an sawichhiatna thu-ah heti hian a ti: “Khandaih, khandaih phawi a ni ta, mi thah nân leh tihral nân kâwlphe anga tihtlêt a ni ta.

²⁹Inlârna der an hmuhsak chia, dâwtin ai an ensak chia, khandaih chu mi sual thi tûra hliam, an sualna ni tâwpkhâwk lo thleng tûrte nghâwngah i rawlh dâwn, an tihah che hian an daw a ni.

³⁰A paiah khung rawh, i pian i mûrna ram ngeiah i thu ka rêl ang.

³¹I chungah ka thinurna ka leih ang a, ka thinrimna mei i chungah ka chhêm ang, mi nun chhe tak, tihboral thiam tak kutah ka mantîr ang che.

³²Meia tuah tûr i ni ang a, ram laiah chuan i thisen a bua ang a, hriat reng i ni tawh lo vang, kei LALPA hian ka sawi tawh si a,” a ti,’ ti rawh,” a ti a.