Read Mizo_Old_version Ezekiela 22 Bible Online

Ezekiela 22 - Mizo_Old_version bible

Ezekiela 22

¹Tin, LALPA thu chu ka hnênah a lo thleng a,

²“Tin, nang, mihring fapa, thisen chhuah hmang khawpui chu i khing dâwn em? I khing dâwn em? A tenawmna zawng zawng chu hriattîr rawh khai!

³Tin, an hnênah chuan, ‘LALPA PATHIAN chuan heti hian a ti a ni: Khawpui, a hun lo thlenna tûra ama chhûnga thisen chhuahtu leh, mahni intibawlhhlawh tûra milim siamtu chu!

⁴I thisen chhuahnaah khân thiam loh i phur a, i milim siamah khân i intibawlhhlawh a ni; i hunte i tihnai a, i kumte a thleng ṭêp a; chuvângin, hnamte hnênah chuan sawichhiatah leh ram zawng zawng chêksawlh atân ka siam che a ni.

⁵I bula mi leh i hlata mite chuan an chêksawlh ang che, nang, hmingchhiat phur leh buainaa khat mi!

⁶Ngai rawh, Israel hotute mi tinin an thiltihtheihna ang zêla thisen chhuah mai tûrin mangmahah an awm a ni.

⁷Nangmahah chuan miin nu leh pate an hmusit a, nangmahah chuan mikhualte an hnehchhiah a, nangmahah chuan fahrahte leh hmeithaite an hnuaichhiah a.

⁸Ka thil serhte i hmusit a, ka Chawlhnite i bawhchhia a.

⁹“ ‘Nangmahah chuan thisen chhuah tûra mi hêk hmangte an awm a, nangmahah chuan bâwlhmuna eite an awm a, nangmahah chuan hurna an chîng a.

¹⁰Nangmahah chuan an pate saruakna hlîmsak an awm a, nangmahah chuan hmeichhe fel lo lai mutpui an awm a.

¹¹Tin, miin a ṭhenawm nupui chungah thil tenawm a ti a, mi dangin hur takin a mo a tibawlhhlawh a, mi dangin nangmahah chuan a farnu, a pa fanu ngei a tlâwm a.

¹²Nangmahah chuan thisen chhuah tûrin thamna an la a, a no leh a pung i la a; i ṭhenawm chu hnehchhiahin duhâm takin i hlêprûksak ṭhîn a; kei ngei pawh hi mi theihnghilh a, tih hi Lalpa PATHIAN thuchhuak a ni.

¹³“ ‘Chuvângin, ngai rawh, i lo hlêprûkna thu-ah te, nangmaha thisen chhuak thu-ah te kut ka ben khum ang che.

¹⁴Nangmah ka beih niah che chuan i thinlungin a tuar zovin i kut a chak thei dâwn em ni? Kei LALPA ngei hian ka sawi tawh a, ka ti bawk ang.

¹⁵Tin, hnam tin zîngah chuan ka tidarh ang chia, ram tinah ka tiṭaiṭâm ang che; nangmah aṭangin i bawlhhlawhnate ka tiral vek ang.

¹⁶Hnamte mit hmuhah chuan mahni intibawlhhlawh i ni ang; tin, LALPA chu ka ni tih i lo hria ang, a ti,’ ti rawh,” a ti a.

¹⁷Tin, LALPA thu chu ka hnênah a lo thleng a,

¹⁸“Mihring fapa, Israel chhûngte chu ka tân êkchhia mai an lo ni ta a; an zain rawh tuina mei laiah chuan dâr te, rângva te, thîr te, suan te an ni a, tangkaraw êkchhia mai a ni ta.

¹⁹Chuvângin, Lalpa PATHIAN chuan heti hian a ti a ni: ‘Ekchhia mai in lo nih tâk avângin, ngai rawh u, Jerusalem laiah ka khâwm che u a ni.

²⁰Tangkarua te, dâr te, thîr te, suan te, rângva te rawh tuina meia an dah khâwma, titui tûra a chunga mei an chhêm angin ka thinurna leh ka thinrimnaah chuan ka khâwm ang che u a, tah chuan ka dah ang che u a, ka titui ang che u.

²¹A ni, ka khâwm ang che u a, in chungah ka thinurna mei ka chhêm ang a, a laiah chuan in tui zo vang.

²²Rawh tuina mei laiah tangkarua a tui angin nangni pawh, chumi laiah chuan in tui zo vang a, kei LALPA hian in chungah ka thinurna ka leih a ni tih in hre tawh ang,’ ” a ti a.

²³Tin, LALPA thu chu ka hnênah a lo thleng a,

²⁴“Mihring fapa, a hnênah chuan sawi la, ‘Ram tlen fai loh i ni e, thinurna nia ruahtui chang lo.

²⁵Sakeibakneiin rûmin a sa seh a zawng ang maiin nangmahah chuan zâwlnei phiarnate a awm a ni; mi nunnate an ei zo va, rote leh thil hlute an lâksak a, a laiah chuan hmeithai tam tak an siam a.

²⁶A puithiamte pawhin nasa takin ka dân an bawhchhia a, ka thil serhte an tibawlhhlawh a ni, thil serh leh thil narân rêng rêng an thlei lo va, mite lah thil thianghlim leh thianghlim lo an thleitîr chuang hek lo; ka Chawlhnite chu an haider a, chu vâng chuan, an zîngah chuan tihhmingchhiatin ka awm a.

²⁷A laia hotute chu chinghne koham ei tûr zawng ang mai an ni a, thisen chhuaha mi nunnate tiboralin hlemhle taka an hlêp theih nân.

²⁸Tin, a zâwlneite chuan hawlrivâpin bang an bel a, inlârna dawha mai mai an hmu a, dâwtin ai an ensak a, LALPAN eng mah a sawi lo chung pawhin, “Lalpa PATHIAN chuan heti hian a ti,” an ti ṭhîn a.

²⁹Rama mipuite chuan hnehchhiah an hmang a, rawk an chîng a, a ni, mi rethei leh tlachhamte chu an hnuaichhiah a, dik lo takin mikhualte an hnehchhiah ṭhîn.

³⁰Ram chu ka tihchhiat loh nân an zîng ata dai theu tûr leh, ram chhana ka hmaa ṭang tûr mi ka zawng a, ka hmu si lo va.

³¹Chuvângin, an chungah ka thinrimna chu ka leihbaw ta a, ka thinurnain meiin ka hâl ral ta hlawm a ni; an awm dân ngei chu an chungah ka rawn thlen a ni, tih hi Lalpa PATHIAN thuchhuak a ni,’ ti rawh,” a ti a.