Read Mizo_Old_version Ezekiela 23 Bible Online

Ezekiela 23 - Mizo_Old_version bible

Ezekiela 23

¹Tin, LALPA thu chu ka hnênah a lo thleng a,

²“Mihring fapa, hmeichhe pahnih, nu pakhat fa an awm a.

³Aigupta ramah an hur bo va, an tleirâwl têta hur an ni a; chutah chuan an hnute an dek a, an tleirâwl hnute chu an hmehsak hrep a.

⁴Pakhat a upa zâwk hming chu Oholai a ni a, a laizâwn chu Oholibai a ni a; ka ta an lo ni ta a, fapate, fanute an hring a. Tin, an hmingah chuan Oholai chu Samaria a ni a, Oholibai chu Jerusalem a ni.

⁵Tin, Oholai chu ka ta a nih hnuin a hur bo leh ta a, a ngaihzâwng, a ṭhenawm, Assuria chu a hak hiam a;

⁶awptute, rorêltute, tlangvâl îtawm tak hlîr, sakawr chung chuang mi, puansenduka inthuamte chu.

⁷Hêng Assuria tlangvâl ṭhate zawng zawng lakah hian an inphalrai a; tin, a hak hiamate milim zawng zawng chuan a intibawlhhlawh leh ta nghâl a.

⁸A tleirâwl têt ata a hnutê an dehsak ṭhin leh, an mutpui ṭhin avângin Aigupta aṭang khân a hur a bâng chuang hek lo, anni pawhin an hurna chu a chungah an tlingtla a.

⁹A ngaihzâwngte, Assuria, a hak hiamte kut ngeiah ka mantîr a ni.

¹⁰Hêngte hian a saruakna chu an hlîm lansak a, a fanu leh a fapate an lâksak a, ani pawh chu khandaihin an that a, hmeichhiate zîngah insawiṭhaihna ber a lo ni ta, a chunga rêl ang chu an hlen ta.

¹¹“Tin, a laizâwn Oholibai chuan hei hi a hmu a; mahse, a u ai mahin a ngaihzâwng haknaah chuan a zual zâwkin, a hurna pawh chu a u hurna aiin a zual sauh bawk a.

¹²Assuria mi, a ṭhenawm ram awptu leh rorêltu tlangvâl îtawm tak hlîr, sakawr chung chuang mi, mawi taka incheite chu a hak hiam a.

¹³Tihbawlhhlawhin a awm tih ka hmu a, an pahnihin kawng thuhmun an zawh mai a ni.

¹⁴Tin, a hurnate chu a tizualkai a, mipa lem banga chuang, Kaldai mite thla, senlâr taka chei,

¹⁵a kâwnga kâwnghrên hrêng, diar mawi tak khim, an vaia lal hmêl pu tak, Kaldai ram, an pianna rama Babulon mite ang takte chu a hmuh avângin.

¹⁶Tin, anmahni a hmuh veleh a hak hiam a, an hnênah Kaldai thlengin mi a tîr a.

¹⁷Tin, Babulon mite chu a hnênah, inngaihna khumah an lo kal a, an hurnain an tibawlhhlawh a, an intitenawm zo ta a, anmahni chu a ngei êm êm a.

¹⁸Chutichuan, a hurna a tilang a, a saruak a hlîm lang a, a laizâwnnuin mi ngei ang maiin ani pawh chuan mi ngei ta a.

¹⁹Mahse, a tleirâwl laia Aigupta rama a hur lai a hriat reng avângin a hur zual ta deuh deuh va.

²⁰Tin, a uirêtu, a tîsa sabengtung tîsa ang mai, a thil chhuak sakawrte thil chhuak ang mai chu a hak êm êm a.

²¹Hetiang hian i tleirâwl lai hurna, Aigupta miten i tleirâwl lai hnutê an dehsak hrep lai che kha i hre chhuak leh ta a ni.

²²“Chuvângin, aw Oholiba, hetiang hian Lalpa PATHIAN chuan a ti a ni: ‘Ngai rawh, a ngaitu che, i rilruin a ngei hle tawhte kha ka pun ang a, kil tin ata ka hruai khâwm ang.

²³Babulon mite leh Kaldai mi zawng zawngte, Pekod te, Soa te, Koa te leh an hnêna Assuria mi zawng zawng nên; tlangvâl îtawm tak takte, awptute, rorêltute, an zain mi liante leh hmingthangte, an zain sakawr chung chuangin an lo kal ang.

²⁴Tin, hriamhreite, indona tawlailîrte, tawlailîrte leh mipui pung khâwmin an rawn bei ang che; phaw lian leh phaw tê, dâr lukhumte nên i vêlin an hual ang che; tin, an hnênah rorêlna ka kawltîr ang a, an thurêl ang zêlin i chungah an hlen ang.

²⁵Tin, i chungah ka thîkthu ka thlen ang a, thinrim takin an bei ang che, i hnârte leh i bengte an hlep ang a, a la damte chu khandaihin an thi ang a, i fanu leh i fapate an lâksak ang chia, a la damte chu meiin a kâng hlum ang.

²⁶I silhfênte an hlihsak bawk ang chia, i incheina mawi tak takte chu an la bo vang.

²⁷I hurna leh Aigupta ram aṭanga i nawhchizawrhna chu an tihbânsak ang chia; chutichuan, an lamah i mit i lên tawh lo vang a, Aigupta ram chu i hre reng tawh hek lo vang.’

²⁸Lalpa PATHIAN chuan heti hian a ti si a: ‘Ngai rawh, i huat tak, i rilrua i mi ngeizâwng takte kut ngeiah chuan ka mantîr ang che.

²⁹Huat tak têin an hua ang chia, i thawh rim rah zawng zawng an lâksak ang chia, saruakin, a lâwng maiin an hnutchhiah ang che; i nawhchizawrh saruakna, i hurna leh i nawhchizawrhna ngei chu tihlanin a awm ang.

³⁰Hêng thilte hi i chungah a lo thleng ang, hnam dangte ûma i hur bova, an milimtea i intihbawlhhlawh avângin.

³¹I laizâwnnu kawng i zawh ve a; chuvângin, a no chu i kutah ka pe ang che.’

³²“Lalpa PATHIAN chuan heti hian a ti a ni: ‘I laizâwnnu no tung lian pui mai chu i in ang a, Nuihsan leh chêksawlhin i awm ang; a dawng hnem nasa a ni!

³³Ruihna leh lungngaihnain i khat ang a, Mak tihna leh chhiatna no, I laizâwnnu Samaria no nên chuan i in fai kêlh ang a;

³⁴I in ang a, a no pawh chu i fâwp fai vek ang, I hnutête i ham thlêr ang; Keiin ka sawi tawh si a,’ tih hi, Lalpa PATHIAN thuchhuak a ni.

³⁵“Chuvângin, Lalpa PATHIAN chuan heti hian a ti a ni: ‘Mi theihnghilha mi hnuchhawn avângin i hurna leh i nawhchizawrhna mawh chu i phur mai tûr a ni.’ ”

³⁶Chu lo pawh chu LALPAN ka hnênah a sawi leh a: “Mihring fapa, Oholai leh Oholibai chu i khing dâwn em? An tenawmnate chu an hnênah puang ang the.

³⁷An uire ta si a, thisen chu an kutah a kai a, an milim hnênah chuan an uire ta a ni; an fapate ka tâna an hrin chu an hnêna kâng ral tûrin meiah an paih a.

³⁸Chu lovah pawh chuan, ka hnênah hei hi an ti a ni; anni vêkin ka hmun thianghlim chu an tibawlhhlawh a, ka Chawlhnite pawh an bawhchhia a ni.

³⁹An milimte tâna an fate an thah hnuah, anni vêk chu ka hmun thianghlim tibawlhhlawh tûrin an lût si ṭhîn a; tin, ngai rawh, hetiang hian ka in chhûngah ngei an ti ṭhîn a ni.

⁴⁰Tin, chu lo pawh chu, hla taka mi lo kal tûrin in chah a, mi in tîr a, ngai rawh, an lo kal a, anmahni elin i inbual fai a, i mit i hnawih a, cheimawina dangte i inbel a.

⁴¹Khum ropui takah i lo ṭhu a, a hmaah dawhkân i buatsaih a, ka rimtui leh ka hriakte tah chuan i hlui ṭhîn a ni.

⁴²“Tin, tah chuan mipui nuamtâwl thâwm hriat a ni a, mi narân chang lo pawh thlalêr aṭangin zu ruite an rawn hruai a, an pahnihin bânbunte an bun a, lukhum mawite an khum a.

⁴³Tin, kei chuan, ‘Uire tar hnu hi an pâwl duh dâwnin anin a peih dâwn em ni aw?’ ka ti a.

⁴⁴Tin, nawhchizuar hnêna an kalin a hnênah an lût ta tho va; tichuan, hmeichhe hur Oholai leh Oholibai hnênah chuan an lût ta a ni.

⁴⁵Mahse, mi felte chuan uirenute leh thisen chhuah chîng hmeichhiate ro an rêl angin an rêlsak ang, uirenute an niha, an kutahte thisen a kai avângin.

⁴⁶Lalpa PATHIAN chuan hetiangin a ti si a: An chungah mipui ka pun ang a, ka rawktîr ang a, ka sawisaktîr hrep ang.

⁴⁷Pung khâwmho chuan lungin an dêng ang a, an khandaihin an sât hlum ang a, an fanute, an fapate an that ang a, an inte an hâlsak ang.

⁴⁸Hetiang hian hurna chu ram ata ka tibo vang a, hmeichhia zawng zawngin in hurna hi chîn tawp loh tûr a ni tih in hriat nân.

⁴⁹Tin, in chungah in hurna chu an thungrûl ang a, in milim sualnate chu in tuar ang; tin, kei hi Lalpa PATHIAN ka ni tih in hria ang,” a ti a.