Read Mizo_Old_version Ezekiela 24 Bible Online

Ezekiela 24 - Mizo_Old_version bible

Ezekiela 24

¹Kum kuana, thla sâwmna, chumi thla, ni sâwm niah chuan LALPA thu chu ka hnênah a lo thleng leh a,

²“Mihring fapa, ni hming, vawiin ni hming ngei hi ziak rawh; hemi ni ngei hian Babulon lal chuan Jerusalem a rawn bei ṭan a.

³Tin, hel hmang chhûng hnênah chuan tehkhin thu sawi la, an hnênah, ‘Lalpa PATHIAN chuan heti hian a ti a ni: Saso bêl chhuang la, chhuang reng la, a chhûngah tui chhûng la,

⁴sa hrangte thlâk la, a sa ṭha zawng zawng te, a bawp te, a dâr te, a ruhkawl ṭha deuh deuhtein tikhat rawh.

⁵Ran rualte zînga a ṭha ṭha la la, a hnuaiah thingfâk rawlh ṭeuh la, so bawrh bawrh se; a ni, a ruhkawlte chu mun ni rawh se.

⁶Chuvângin, Lalpa PATHIAN chuan heti hian a ti a ni: “Thisen chhuah hmang khawpui, saso bêl a chhûng kâng khir, a khir la reh ngai lo chu a chung a pik e! Thlang chuang lovin, a sa hrang khat khatin thur rawh u.

⁷A thisen chhuah chu ama chhûngah a awm si a, vaivuta vûr theih nâna leia leihbuak tâk aruangin lungpui ro chungah a leih ta zâwk a.

⁸Phuba la tûra thinurna a lo thawh theih nân vur lovin a thisen chhuah chu lungpui ro chungah ka leih a ni.”

⁹“ ‘Chuvângin, Lalpa PATHIAN chuan heti hian a ti a ni: “Thisen chhuah hmang khawpui chu a chung a pik e! Keimah ngeiin ka chhep hluah ang.

¹⁰Thing chhep ṭeuh ula, mei tuah sa ula, sa te chu chhûm hmin kawi ula, sa tui chu ngâ takin, a ruhte pawh kâng ral rawh se.

¹¹Tichuan, bêl chu a ruakin meivâm chungah chhuan ni reng sela, a lo sa ang a, a dâr chu a lo ling ang a, a bawlhhlawhna chu a lo tui ral ang a, a kâng khir chu a kan ral theih nân.

¹²Ning khawpa beih pawhin a kâng khir chu a fai chuang lo va, mei pawhin a kâng fai hek lo.

¹³I bawlhhlawhna chu hurna a ni a, ka thian chia, i fai chuan loh avângin, i chungah ka thinurna ka hrîkthlâk vek hma loh chuan, eng tikah mah i bawlhhlawhna ata chu tlen fai i ni tawh lo vang.

¹⁴Kei LALPA hian ka sawi tawh a ni, a lo thleng ngei ang, keiin ka ti dâwn si a, ka hnungtawlh lo vang a, ka zuah hek lo vang a, ka inlamlêt hek lo vang; i awm dânte leh i thiltih ang zêlin ro ka rêlsak ang che,” tih hi Lalpa PATHIAN thuchhuak a ni,’ ti rawh,” a ti a.

¹⁵Tin, LALPA thu chu ka hnênah a lo thleng leh a,

¹⁶“Mihring fapa, ngai teh, thâwklehkhatah i mit tlaina ber chu ka lâksak ang chia, i sûn tûr a ni lo va, i ṭap tûr a ni hek lo, i mittui pawh a tla tûr a ni lo.

¹⁷A rûk têin rûm la, mitthi sûnna rêng rêng chu nei suh ang che; i diar khim la, i pheikhawk bun la, i hmui hup suh la, mite chaw pawh ei suh ang che,” a ti a.

¹⁸Chutichuan, zîng lamah chuan mipuite hnênah thu ka sawi a, tlai lamah chuan ka nupui a thi ta mai a; tin, a tûk zîng lamah chuan thu mi pêk ang chuan ka ti a.

¹⁹Tin, mite chuan ka hnênah, “Hetiang i thiltihte hi kan tân eng nge a nih min hrilh dâwn lâwm ni?” an ti a.

²⁰Tichuan, kei chuan an hnênah, “LALPA thu ka hnênah a lo thleng a,

²¹Israel chhûngte hnênah chuan sawi la, ‘Lalpa PATHIAN chuan heti hian a ti a ni: Ngai rawh u, ka hmun thianghlim, in chakna chhuan ber, in mit tlaina ber, in ngainat zâwng tak chu ka tibawlhhlawh dâwn a ni; tin, in fanute, in fapate, hnung lama in kalsante chu khandaihin an tlu ang.

²²Ka tih ang chiah hian in ti ve dâwn a ni; in hmui in hup lo vang a, mite chaw in ei hek lo vang.

²³In diarte in khim ang a, in pheikhawk pawh in bun ang; in sûn lo vang a, in ṭap hek lo vang; in khawlohnaahte chuan in thâmral ang a, in inṭah tawn ang.

²⁴Hetiangin Ezekiela hi in tân entîrna a ni ang a, a tih zia ang zêlin in ti tûr a ni; hei hi a lo thlen hunah chuan Lalpa PATHIAN chu ka ni tih in hria ang,’ a ti a ni,” ka ti a.

²⁵“ ‘Tin, LALPA chuan, “Nang mihring fapa, an hnên ata an chakna te, an ropui lâwmna te, an mit tlaina ber te, an lungkham ber te, an fanu leh an fapate ka lâk bosak niah chuan,

²⁶chumi ni ngeiah chuan a tlân chhuak chu i hnênah a lo kal ang a, a rawn hriattîr dâwn lo che em ni?

²⁷Chumi niah chuan tlân chhuak hnênah thu i sawi ang a, i ngawi bo mai lo vang a; tichuan, an tân entîrna i ni ang a; tin, LALPA chu ka ni tih an hria ang,” ’ ” a ti a.