Read Mizo_Old_version Ezekiela 25 Bible Online

Ezekiela 25 - Mizo_Old_version bible

Ezekiela 25

¹Tin, LALPA thu chu ka hnênah a lo thleng a,

²“Mihring fapa, Amon fate chu hmachhawn la, an chungchâng thu sawi rawh.

³Tin, Amon fate hnênah chuan, ‘Lalpa PATHIAN thu hi ngaithla rawh u, Lalpa PATHIAN chuan heti hian a ti a ni: Ka hmun thianghlim chu tihbawlhhlawha a awma, Israel ram tihchhiata a awma, Juda chhûngte chu sala hruaia an awm lai khân, “Ihi!” i lo tih avângin,

⁴ngai rawh, khawchhak lam mite hnênah an neih atân ka pe dâwn che a ni; nangmahah chuan bûk an sual ang a, bu an khuar ang; i thei rahte an ei ang a, i hnutetuite an in ang.

⁵Raba khua chu sanghâwngsei inah ka siam ang a, Amon fate hmun chu ran rual bawh hmunah ka siam ang; tichuan, LALPA chu ka ni tih an hria ang.

⁶Lalpa PATHIAN chuan heti hian a ti si a: Israel ram chungah i kut i bena, i ke i pera, rilru zawng zawnga a chhiatna chunga i lâwm avângin,

⁷ngai rawh, i chungah ka kut ka lek a, hnamte hnênah râllâk atân ka mantîr dâwn che a ni; mite lak ata ka râwt ang chia, chûng ram ata chu ka tiboral daih ang che, ka tichhia ang chia; tichuan, LALPA chu ka ni tih i hria ang,’ tiin.

⁸“Lalpa PATHIAN chuan heti hian a ti a ni: Moab leh Seir chuan, ‘Ngai rawh, Juda chhûngte chu hnam dang ang mai an ni e,’ an tih avângin,

⁹Moab ramri vênna khawpuite chu râl ka beihtîr a, khawpui ropui ber Beth-jesimoth te, Baal-meon te, Kiriathaim te pawh,

¹⁰khawchhak lam fate neih atân Amon fate nên ka pe ang a, Amon fate chu hnamte zînga hriat reng an nih tawh loh nân.

¹¹Moab ram chungah thurêl chu ka hlen ang a; tichuan, LALPA chu ka ni tih an hria ang,” tiin.

¹²“Lalpa PATHIAN chuan heti hian a ti a: ‘Edom chuan Juda chhûngte chungah phuba lain nasa takin thil a lo tisual a ni, ama thu maia an chunga phuba a lâk avângin.

¹³Chuvângin, Lalpa PATHIAN chuan heti hian a ti e: Edom chungah ka kut ka lek ang a, a lak ata mi leh sate ka râwt bo vek ang; Teman aṭangin ka tiṭiau ang a, Dedan thlengin khandaihin an thi ang.

¹⁴Tin, ka mi Israel-te kutin ka phuba lâkna chu ka thlen ang a, Edom chungah chuan ka thinurna ang zêl leh ka thinrimna ang zêlin an ti ang a, ka phuba lâkna chu an lo hria ang,’ ” tih hi Lalpa PATHIAN thuchhuak a ni.

¹⁵“Lalpa PATHIAN chuan heti hian a ti a ni: ‘Philistia miten phuba laa, kumkhaw inhmêlmâknain, mi tihboral duhna rilru chhia pua phuba an lâk avângin,

¹⁶Lalpa PATHIAN chuan heti hian a ti a ni, “Ngai rawh, Philistia mite chungah chuan ka kut ka lek ang a, Kereth khaw mite chu ka râwt vek ang a, tui kama mi la awm chhunte chu ka tiboral vek ang.

¹⁷Tin, thinur taka zilhhauvin an chungah phuba ka la ang a, chutia an chunga ka phuba lâkna ka thlen hunah chuan LALPA chu ka ni tih an hre tawh ang,” ’ ” a ti a.