Read Mizo_Old_version Ezekiela 26 Bible Online

Ezekiela 26 - Mizo_Old_version bible

Ezekiela 26

¹Tin, kum sâwm leh kum khatna thla ni hmasa berah chuan heti hi a ni a, LALPA thu chu ka hnênah a lo thleng a,

²“Mihring fapa, Tura chuan Jerusalem chungthuah, ‘Ihi! Hnamte kawngkhâr chu a chhe ta, ka lamah a inhawng a, a lo tlâkran tâk vek avângin kei ka changtlung tawh ang,’ a tih avângin,

³Lalpa PATHIAN chuan heti hian a ti a ni: Ngai rawh, aw Tura, ka do che a ni; tuifinriatin a fâwn a vawrh chhoh ang maiin i chunga lo kal tûrin hnam tam takte ka rawn tîr ang.

⁴Tin, Tura kulhte chu an tichhia ang a, kulhbîng sângte chu an tichim ang; an lak ata lei zawng zawng ka ziat fai lêng ang a, lungpui ro maiah ka siam ang.

⁵Tuipui laia lên pho rona hmun a ni mai ang, keiman ka sawi tawh si a, tih hi Lalpa PATHIAN thuchhuak a ni; tichuan, hnamte tân râllâk a ni mai ang.

⁶Tin, a fanu rama awmte chu khandaiha tihhlum an ni ang a; tichuan, LALPA chu ka ni tih an hria ang.

⁷“Lalpa PATHIAN chuan heti hian a ti si a: Ngai rawh, Tura chungah chuan Babulon lal Nebukadnezzara, lalte lal chu hmâr lam aṭangin, sakawrte nên, sakawr chung chuang mite nên, a pâwl leh mipui tam tak mai nên ka rawn hruai dâwn a ni.

⁸“ ‘I fanute an that ang, ramah, khandaihin; Kulh a siam ang, nangmah dan nân, Nangmah do nân a siam ang, mual pâwngte, I chungah ka phawsial a sîr ang.

⁹Kulh sut chhiatna a siam, i kulh ṭhiat nân, I kulhbîng sâng a tichim ang, hreipuiin.

¹⁰A sakawr tam avângin a khuh ang che, vaivutin, Khawpui chhiata mite an lût ṭhîn angin, I kawngka an luh ve hunah chuan, I kulhpui a nghîng ang- Sakawr chung chuangte thâwm leh indo tawlailîr thâwmah.

¹¹Sakawr rual kein a chîl chhia ang, i kawtthlêr zawng, I mite a that zo vang, khandaihin, I chakna bang sâng suar ang a chim ang.

¹²I ro thil râllâkin an la ang, I bungrua zawng zawng an rawk zo vang, I kulh bang suar ang a tichim ang, I rûn in nuam an tichhe zo vang, I thing, lung, hlumte an paih ang, tuipui laiah.

¹³Ka tibâng zo vang, i zai thâwmte, I ṭingṭang ri pawh a dai hlen ang.

¹⁴Lungpui ro maiah ka siam ang che. Lên pho ronaah i lo chang ang, Din i ni leh tawh lo vang, Keimah LALPA hian ka sawi tawh si, Tih hi Lalpa PATHIAN thuchhuak a ni e.

¹⁵“ ‘Lalpa PATHIAN chuan Tura khaw hnênah heti hian a sawi a: I chhûngah chuan inthahnate a awm hun a, mi hliamte an rûm hunah chuan i tlu thâwmah chuan tuipui kam ramte a nghîng dâwn lo vem ni?

¹⁶Tuipui chunga hotute zawng zawng chu an ṭhutthlêng ata an chhuk ang a, an puan ropuite an dah ang a, an chei mawite an hlîp tawh ang; khurhnain an inthuam zâwk ang a, leiah an ṭhu ang a, an khûr an khûr ang a, mak an ti ang che.

¹⁷Tin, nangmah sûnna hla an phuah ang a, i hnênah - “ ‘Khawpui hmingthang, tuipui chunga chak, Tui thiam mite hlîr chên ṭhinna chu, Amah leh a chhûnga chêngte zawng zawng, Mi veivâkten an ṭih ṭhin che nên, I chhiatna chu a va nasa êm!

¹⁸I tlûkna niah an nghîng, thliarkârte, Tuipui thliarkâr an zâm ang, i bo niah,’ an ti ang,” tiin.

¹⁹Lalpa PATHIAN chuan heti hian a ti si a: “Khawpui ram, tu ma luah loh khawpui anga ka siam hunah che chuan, tui thûk takah ka tipil ang chia, tui nasa takin a chîm ang che;

²⁰hmasâng mi, khur thûka kal tawhte hnênah ka tîr thla ang chia, lei hnuai lamah, hmâna ṭiau tawh khur thûka kal tawhte hnênah ka chêntîr ang chia, tu mahin an luah loh nân che leh mi nungte zînga ropuina i hmuh tawh hauh loh nân.

²¹Ka tiboral daih ang chia, i awm tawh lo vang, miten zawng che mah sela, an hmu tawp lo vang che,” tih hi Lalpa PATHIAN thuchhuak a ni.