Read Mizo_Old_version Ezekiela 27 Bible Online

Ezekiela 27 - Mizo_Old_version bible

Ezekiela 27

¹ LALPA thu chu ka hnênah a lo thleng a,

²“Nang, mihring fapa, Tura khaw sûnna hla phuah la,

³Tura khaw hnênah chuan - Aw nang, tuipui kama chêng ṭhîn, Tuipui kam ram tam takte hnêna sumdâwngtu, Lalpa PATHIAN chuan heti hian a ti che a ni: Aw nang Tura, ‘Ka mawi famkim’ i ti maw!

⁴I ramin tuipui lai chu a chhun e, I siamtuten an timawi chungchuang ngei che;

⁵I thing hmanrua Senir fârin an siam e, I lawng ngul atân an la, Lebanon thingril.

⁶Basan sasua i vaichaah an siam e, Saingho chhûngphûm i lawng chhuatah Tufâr thing, Tuipui ram Kittim ata chu.

⁷I lawng puanzâr Aigupta nêmte puan ṭial, Nangmah chhinchhiah nân a lo chuang e, I tân hliapzâr dumpâwl, senduk, Elisa tui kam ram ata chu.

⁸I lawng kartu Zidon, Arvad mi an ni, I lawng khalhtute zawng chu, aw Tura, I mi fingte an ni e.

⁹Gebal upa leh mi themthiam, I lawng tuahremtu an lo ni e, Tuipui lawng zawng leh a miten, Nangmah dâwrin an pan che.

¹⁰I râl tu mi i sipai rual, Persia, Lud, Put an ni; An sialphâw leh an dâr lukhum an bâng a, Nangmah cheimawitu an lo ni e.

¹¹I sipai rual Arvad mi nên an chuang, i kulhpui chungah, I kulhbîng Gammad-ho râl vêngin, An sialphaw an bâng e, i kulhpui vêlin, Nangmah cheimawitu an lo ni e.

¹²I ngah vângin, sum leh pai ro thil tinrêng, Tarsis chu dâwrtu che a lo ni a, I bungrua leiin a hlân che Tangkarua, thîr, rângva leh suante pawh.

¹³Javan, Tubal, Mesek, nang dâwrtu che hian, Sal leh dâr bungbêlin an dâwr che, i bungraw neih nân.

¹⁴Beth-togarma chuan sakawr, indo sakawr leh sabengtung hlânin I bungrua an lei ṭhîn.

¹⁵Dedan mite i dâwrtute an ni a, Tui kam hmun tin i sumdâwn hmun a lo ni, Saingho leh eboni an hlân che - dawvânkai nân.

¹⁶Bungrua i ngah avângin, Edom chu i dâwrtu a lo ni a, Emerald lung, puansenduk, puan cheimawi, Puanzaisîn, ṭhival, rubi lungtein an dâwr che.

¹⁷Juda leh Israel-te pawh a dâwrtu che an ni a, Minith buh leh Pannag, khawizû, Hriak leh thing hnaiin an dâwr che.

¹⁸I ngah vângin sum leh pai ro thil tinrêng, Damaska i dâwrtu a lo ni a, Helbon uain leh berâm hmul vârin an dâwr che.

¹⁹Uzal uain chu rawn lain an lei, i bungruate, Thîr tle tak, thakthîng leh fûte i sumdâwnna.

²⁰Sakawr chung phah puantein Dedan chuan a dâwr che a.

²¹Arabia leh Kedar lalte nangmah dâwrtute an ni vek, Berâmnote, berâmpate, kêlpatein an dâwr che.

²²Seba leh Raama sumdâwngtute chu a dâwrtu che an lo ni; Rimtui ṭha berte, lunghlu chi tin leh rangkachaktein an dâwr che.

²³Haran, Kanne leh Eden, Seba, Assuria leh Kilmad sumdâwngtute chu A dâwrtu che an ni a.

²⁴Chûngte chu an ni, dâwrtu che, Silhfên ṭha mi, puan dumpâwl leh puan cheimawi, Chhuatphah ze mawi nên, Hruihrual nghet taka cherin, Hêng hian an dâwr che.

²⁵Tarsis lawngte chu i bungraw phur dual dualtute an ni, I lo mukin tuipui chungah i lo ropui ta.

²⁶I lawng khalhtun tuipui fâwnah a khalh lût chia, Khawchhak thlîin a nuai ral che, tuipui laiah.

²⁷I sum leh pai, i bungruate, i sumdâwn thil, I lawng mite, lawng khalhtu, tuah remtute, I hlân vêltu leh râl tu mite, nangmaha awm, I chhûnga awm zawng zawngte nên, In pil bo vang, tuipui laiah, i chhiat niin.

²⁸I lawng khalhtute au thâwmah, I vêla mite an khûr e.

²⁹Lawng kar ngul vuantute zawng zawng, lawng mite leh, Tuipuia khalhtute zawng zawng chhukin, An ding, vau kamah.

³⁰I chungthuah an aw hriat thamin an chhuah ang, Lungchhe takin an ṭap ang a, An lûah vaivutte phulin, an tâl ang, vut zîngah.

³¹Nangmah vânga inziat kâwngin, an fêng ang, saiip puan, Lungchhe vânkaia ṭapin an sûn ang che, nasa takin.

³²Nangmah sûnin an chham ang, an ṭah hla, Tu nge Tura ang awm le - Tuipui laia dairial chang ta hi?

³³I bungruate tuipuia chhuakin, Mi tam tak a hrai tlai ṭhîn, Lei lalte zawng i tihausa, I sum leh pai tam, i bungruain.

³⁴Tuipui thûkah i chhiat ni khân, I sumdâwn thil, i mi zawng zawng, Rial ang an ral ta, nangmah nênin.

³⁵Tui kam mi zawng zawngin râpthlâk an ti che, An lalte lah hlauvin an thlabâr, An sakhmêl pawh a dang zo ve.

³⁶Mite zînga sumdâwngtuten an chek khum che, Mi tân ṭihkhaiah i lo chang ta, I lang leh tawh ngai lo vang le, Tiin an ṭah khum che.”