Read Mizo_Old_version Ezekiela 28 Bible Online

Ezekiela 28 - Mizo_Old_version bible

Ezekiela 28

¹ LALPA Pathian thu chu ka hnênah a lo thleng leh a,

²“Mihring fapa, Tura hotu hnênah chuan sawi la, ‘Lalpa PATHIAN chuan heti hian a ti: I rilru a chapo va - Pathian ka ni a, tuipui laia pathian ṭhuthmunah ka ṭhu - i ti a; mahse, mihring mai i ni a, pathian i ni lo va, pathian rilru ang puah inngai mah la.

³Daniela aiin i fing zâwk a, i lakah thurûk rêng rêng a awm thei lo va,

⁴i fin leh i remhriatnain i lo intihausa a, i ro bâwmah tangkarua leh rangkachak i khung a,

⁵i finna nasa tak leh i sumdâwnnain sum i tipung a, i hausak êm avângin i rilru a lo chapo ta a;

⁶chuvângin, Lalpa PATHIAN chuan heti hian a ti: Pathian rilru ang pua i inngaih avângin,

⁷ngai rawh, awze mi, hnam ṭihbaiawm tak i hnênah ka rawn tîr dâwn a ni; i finna rah mawi chungah an khandaih an vilik ang a, i ropuina an tikhawlo vang.

⁸Khur thûkah an tîr lût ang chia, tuipui laia an thahte thihin i thi ang.

⁹A thattu che hmaah chuan, “Pathian ka ni,” i la ti cheu dâwn em ni? A hliamtu che kutah chuan pathian i ni lo va, mihring mai i ni zâwk.

¹⁰Awze mite kutah serh tan loh thihin i thi ang; ka ṭawng tawh si a,’ tih hi Lalpa PATHIAN thuchhuak a ni.”

¹¹Chu lo pawh chu LALPA thu chu ka hnênah a lo thleng a,

¹²“Mihring fapa, Tura lal sûnna hla phuah la, a hnênah, ‘Heti hian Lalpa PATHIAN-in a ti: “Ṭha famkim tak, finnaa khat, mawina tinrêng!

¹³Pathian huan Eden-ah i chêng; Lunghlu tinrêng i inbel a, Sardion, topaz lung leh diamond, Berul, onuks, jaspi, sapphir, smarakdin, karbankul, A phûm nghehna leh a ziak mawina rangkachaka siamte, Nangmah siam nia buatsaih tawhte chu.

¹⁴Nang chu vêngtu cherub hriak thih i ni; Pathian tlâng thianghlimah ka awmtîr chia, Mei vâm iang lung zîngah i lêng.

¹⁵I ṭha famkim, siama i awm ni ata, nangmaha khawlohna a awm hma rêng zawng.

¹⁶I sumdâwnna a pung tual tual, A tikhat che, pâwngnêkin, Sualah i lo tlu e, Pathian tlâng hnâwmhnean ka hnâwl che, Vêngtu cherub-in a hnawt chhuak che, Mei vâm iang lung zîng ata.

¹⁷I mawina vânga lo chapovin, I ropuinain i finna tikhawlovin, Leiah ka paih chia, Lalte hmaah mualah ka pho che, ennawmah.

¹⁸I sumdâwn fel lohnateah, i khawlohna avângin, I hmun thianghlimte i tibawrhbâng a; Chuvângin, mei ka chhuah, i chhûng ata, A kâng ral che, leiah vaivutah ka chantîr che; A hmu ṭhîn che zawng zawng hmuhan.

¹⁹Mite zînga a hria apiang che mak tihan. Ṭihkhaiah i lo chang ta, I awm ngai rêng rêng tawh lo vang le,” ’ ” tiin.

²⁰Tin, LALPA thu chu ka hnênah a lo thleng a,

²¹“Mihring fapa, Sidon hmachhawn la, a chung thu sawi rawh.

²²‘Heti hian Lalpa PATHIAN chuan a ti: “Ka dodâl che a ni, aw Sidon; Ka tilang ang, ka ropuina, nangmahah; Lalpa ka nihzia an hria ang a, Amahah ro ka rêl hunah chuan, Ka entîr ngei ang, ka thianghlimna.

²³A kawtthlêrah thisen leh hripui ka thlen ang, A chhûngah hliam an tlu ang a, Hmun tin kil tin ata chemsenin; Tin, LALPA ka ni tih an hria ang.

²⁴“ ‘ “Tichuan, Israel chhûngte tân chhuntu tûr hnimhlîngnei a awm lo vang a, a vêla anmahni hmusittute zîngah tinatu tûr hlîng a awm tawh lo vang; tin, kei hi Lalpa PATHIAN ka ni tih an hria ang.”

²⁵“ ‘Heti hian Lalpa PATHIAN chuan a ti a ni: “Israel chhûngte chu an darhna ram mite zîng ata ka hruai khâwm leh hunah, hnamte mit hmuhah anmahniah ka thianghlimna ka entîr hunah chuan, Jakoba hnêna ka pêk, an ram ngeiah chuan an chêng tawh ang.

²⁶Tichuan, him takin an awm tawh ang; a ni, inte an sa ang a, grêp huante an siam ang a, him takin an awm ang, an vêla hmusittu zawng zawngte chunga ro ka rêl hunah chuan, kei hi LALPA an Pathian chu ka ni tih an hria ang,” ’ ” tiin.