Read Mizo_Old_version Ezekiela 29 Bible Online

Ezekiela 29 - Mizo_Old_version bible

Ezekiela 29

¹Kum sâwmna, thla sâwmna, chumi thla ni sâwm leh ni hnihnaah chuan LALPA thu ka hnênah a lo thleng a,

²“Mihring fapa, Aigupta lal Pharaoa hmachhawn la, a chungah leh Aigupta mi zawng zawng chungah thu sawi rawh.

³Sawi la, ‘Lalpa PATHIAN chuan heti hian a ti a ni: Ngai rawh, Aigupta lal Pharaoa, luipuite laia awlepui ropui tak, Ka luipui hi ka ta a ni, keimah ngeia tân ka siam a ni,’ titu, ka do che a ni.

⁴I khabeahte nghakuaiin ka man ang chia, luipuia sanghate chu i phuhlipah ka tibet ang a, luipui lai ata i phuhlipah sangha zawng zawngte nên chuan ka pawt chhuak ang che.

⁵Tin, thlalêrah ka paih ang chia, nang leh i luipuia sangha zawng zawngte pawh; tâmlakah i tla ang a, i ruang hlâwm a ni lo vang a, phûm i ni hek lo vang; ram sakawlhte leh chunglêng savate hnênah chaw atân ka pe ang che.

⁶Israel chhûngte tân luang tiang mai an lo nih tâk avângin, Aigupta rama chêng zawng zawngte chuan kei hi LALPA ka ni tih an hria ang.

⁷Kutin an vawn chein i lo tliak a, an kokîah i chhun thlêr a; an rinchhan chia, i tliak a, an kâwngte chu a sai dawt dawt a.

⁸“Chuvângin, Lalpa PATHIAN chuan heti hian a ti: Ngai rawh, i chungah khandaih ka rawn thlen ang a, i lak ata mi leh sa ka râwt bo vek ang.

⁹Tin, Aigupta ram chu ram ṭiau leh khaw ram a ni mai ang a, kei hi LALPA ka ni tih an hria ang, ‘Luipui hi ka ta a ni a, ka siam a ni,’ a tih avângin.

¹⁰Chuvângin, ka do chia, i luipui pawh; Suene kulh aṭangin Ethiopia ramri thlengin Aigupta ram chu ram ṭiau leh khaw ramah ka siam ang.

¹¹Mihring kein a chîl ngai lo vang a, sate pawh an kal ngai hek lo vang; kum sawmli chhûng pawhin luahin a awm hek lo vang.

¹²Tin, Aigupta ram chu ram ṭiaute zînga pakhatah ka siam ang a, a khawpuite chu khawpui ramte zîngah kum sawmli a ṭiau vang; Aigupta mite chu hnamte zîngah ka tidarh ang a, ram tinah ka tidarh ang.

¹³“Lalpa PATHIAN chuan heti hian a ti si a: ‘Kum sawmli hnuah chuan an darhna mite lakah chuan Aigupta mite chu ka khâwm leh ang.

¹⁴Aigupta mite awm dân ka let ang a, an pianna ram, Pathros ramah ka kîrtîr ang; tin, tah chuan tlâwm takin an lal ang.

¹⁵Lalna ram tlâwm ber a ni ang, hnamte zîngah a intilal tawh hek lo vang; hnam dang chunga thu a neih tawh loh nân anmahni ka titê dâwn a ni.

¹⁶An lam hawi apiangin an khawlohna an hriat chhuah ṭhin avângin, Israel-te rin pui an ni tawh lo vang; tin, Lalpa PATHIAN chu ka ni tih an hria ang, a ti,’ ti rawh,” tiin.

¹⁷Tin, heti hi a ni a, kum sawmhnih leh kum sarihna, thla khatna, chumi thla ni khat niah chuan LALPA thu chu ka hnênah a lo thleng a,

¹⁸“Mihring fapa, Babulon lal Nebukadnezzara chuan Tura chungah hna ropui tak thawk tûrin a sipai rual chu a ti a, mi tin chhîpte chuan a kawlh phah a, mi kokîin a pilh phah bawk a; mahse, amah leh a sipai rualte pawhin an hnathawhah chuan Tura lakah hlâwkna eng mah an hmu chuang lo.

¹⁹Chuvângin, Lalpa PATHIAN chuan heti hian a ti a ni: ‘Ngai rawh, Aigupta ram chu Babulon lal Nebukadnezzara hnênah ka pe dâwn a, a thil ngah rei ruite chu a la bo vang a, a rawk ang a, râllâkah a lâksak ang; chu chu a sipai rualte hlawh chu a ni mai ang.

²⁰Ka rawng an bâwl avângin Aigupta ram hi an hlawhah ka pe a ni,’ Lalpa PATHIAN chuan a ti a ni.

²¹Chumi niah chuan Israel chhûngte tân kî ka chawr chhuahtîr ang a, an zîngah chuan i kâ ka ântîr ang; tichuan, LALPA chu ka ni tih an hria ang,” tiin.