Read Mizo_Old_version Ezekiela 3 Bible Online

Ezekiela 3 - Mizo_Old_version bible

Ezekiela 3

¹Tin, ka hnênah, “Mihring fapa, i hmuh kha ei rawh; lehkhabu zial hi ei la, Israela chhûngte hnênah chuan thu va sawi rawh,” a ti a.

²Chutichuan, ka kâ ka âng a, lehkhabu zial chu mi eitîr ta a.

³Tin, ani chuan ka hnênah, “Mihring fapa, i pumah pai la, he lehkhabu zial ka pêk che hian i kawchhûng tikhat rawh,” a ti a. Tichuan, ka ei ta a, a thlumzia chu ka kâah chuan khawizu ang mai a ni a.

⁴Tin, ani chuan ka hnênah, “Mihring fapa, kal la, Israel chhûngte hnênah chuan ka thute hi hmangin va sawi rawh.

⁵ṭawng hrang leh ṭawng harsate hnênah tirh i ni lo va, Israel chhûngte hnênah tirh i ni zâwk si a.

⁶Hnam ropui tak, an ṭawng i hriat loh, ṭawng harsa pui pui hmangtute zîngah pawh tîr che ila chuan i thu an ngaithla ang.

⁷Mahse, Israel chhûngte chuan an ngaithla lo vang che, kei mi ngaithla dâwn si lo va, Israel chhûngte zawng luhlul tak leh tihmawh takte an ni si a.

⁸Tûnah hian luhlul tak leh deh khirh takin anmahni ang maiin ka siam ang che.

⁹Lung chang tak, meilung aia changa deh khirhin ka siam a che, hlau suh la, an mitmelhah zâm hek suh, hel hmang mi ni mah sela,” a ti a.

¹⁰Chu lo chu ka hnênah, “Mihring fapa, i hnêna ka thu sawi tûr zawng zawng chu i bengin ngaithla la, i thinlungah khung rawh.

¹¹Tin, kal la, i chipui sal tângte hnên va thleng la; an ngaithla emaw, ngaithla lo emaw, ‘Hetiang hi LALPA thuchhuak chu a ni e,’ tiin sawi la, hrilh rawh,” a ti a.

¹²Tichuan, thlarauvin mi chawi kâng ta a, ka hnung lamah chuan thâwm ri sung sung hi ka hria a, “A hmun aṭang hian LALPA ropuina chu malsâwmin awm rawh se,” tiin.

¹³Tin, thil nungte thla intawk ri te, an bula tawlailîr ri te, thâwm ri sung sung te chu ka hria a.

¹⁴Chutichuan, thlarauvin mi chawi kâng a, mi la bo ta a; thinrim tak leh hreh tak chungin ka kal ta a, LALPA kut chu ka chungah a chak si a.

¹⁵Tichuan, Tel-abib-a sal tângho, Kebar luia chêngte hnên chu ka lo thleng a, an ṭhutnaah chuan ka ṭhu a; mak ti takin tah chuan ni sarih ka ṭhu ta a.

¹⁶Tin, ni sarih tâwpah chuan heti hi a ni a, LALPA thu chu ka hnênah a lo thleng a,

¹⁷“Mihring fapa, Israel chhûngte vêngtuah ka ruat che a ni; tichuan, ka kâa thu i hria angin keima aiah i vaukhâng tûr a ni.

¹⁸Mi suaksual hnêna ka thu, ‘I thi ngei tûr a ni,’ ka tiha, chu mi suaksual chu a nunna hum tûra a sualna kawng kalsan tûra vauna i neih lohva, vaukhânna thu i hrilh bawk si lohva, chu mi suaksual chu a khawlohnaah a thih chuan, a thisen mawh chu i lakah ka phût ngei ang.

¹⁹Amaherawhchu, chu mi suaksual chu i vauva, a suahsualna a kalsan lohva, a sualna kawng a hawisan bawk loh chuan a khawlohnaah a thi ang a, nang erawh chuan i nun i chhanhim a ni zâwk ang.

²⁰Tin, mi fel chuan a felna hawisana khawlohna a tiha, a hmaa tlûkna ka lo dah chuanin, a thi ang; vaukhânna i neih loh avângin ama sualah a thi ang a, a thil fel tih tawhte chu hriat reng a ni lo vang; a thisen mawh erawh chu i lakah ka phût ang.

²¹Nimahsela, mi fel chu sual lo tûra i vaukhâna a sual loh chuan, vauna a pawisak avângin a nung ang; nang pawhin i nun i humhim ang,” a ti a.

²²Tin, tah chuan LALPA kut chu ka chungah a awm a, ka hnênah, “Tho la, phaizâwlah kal la, tah chuan ka bia ang che,” a ti a. Tichuan, ka tho va, phaizâwlah chuan ka kal ta a.

²³Tin, ngai teh, tah chuan LALPA ropuina chu, ropuina, Kebar luia ka hmuh ang mai khân a lo ding a, kei chu bawkkhupin ka tlu ta a.

²⁴Tichuan, thlarau chu keimahah a lo lût a, ka kein mi dintîr a, mi bia a, “Kal la, i inah inkhâr khung rawh.

²⁵Nang zawng e, mihring fapa, hruizênin an hlîng ang chia, an phuar ang che, an zîngah i lêng chhuak tawh lo vang.

²⁶I lei chu i dangah ka behtîr ang a, i ṭawng tawh lo vang a, anmahni zilhtu i ni tawh lo vang, hel hmang chhûng an ni si a.

²⁷Mahsela, i hnêna thu ka sawi hunah chuan i kâ ka ântîr ang chia, an hnênah chuan Lalpa PATHIAN chuan heti hian a ti a ni: ‘A ngaithlain ngaithla sela, a ngaithla lovin ngaithla lo mai rawh se, hel hmang chhûng an ni si a, a ti e,’ tiin i sawi tûr a ni.