Read Mizo_Old_version Ezekiela 30 Bible Online

Ezekiela 30 - Mizo_Old_version bible

Ezekiela 30

¹Lalpa thu chu ka hnênah a lo thleng leh a,

²“Mihring fapa, thu sawi la, Lalpa PATHIAN chuan heti hian a ti a ni: ‘Chiau vak vak rawh u, Ehei, chu ni tak chu!’

³Ni a hnai e, LALPA ni chu a hnai e, Chhûm zîn ni, awze mite chhiatna tûr.

⁴A lo thleng dâwn, chemsen, Aigupta chungah, Thinlai natna, Ethiopia chungah; Aigupta-ah mi thah an tlûkin, A ngah rei ruite lâksakin, a nghahchhan suar ang chim e.

⁵Ethiopia, Put leh Lud, hnam tin lêng za chu, Kub leh ram fa tel vete zawng zawng, An tlu ang, chemsenin.

⁶“LALPA chuan heti hian a ti: Aigupta tung dingtute pawh kha an tlu ang, a chakna chhuan ṭhin pawh chu a tlâwm ang; Migdol aṭangin Suene thlengin khandaihin an tlu vek ang, Lalpa PATHIAN chuan a ti a ni.

⁷Ram tihṭiau tawhte zînga pakhat a ni ang a, a khawpuite pawh chu khawpui ram tawhte zînga mi a ni mai ang.

⁸Aigupta ramah mei ka chhuah a, a puitute zawng zawng ka tihchhiat hunah chuan LALPA chu ka ni tih an hria ang.

⁹Chumi niah chuan Ethiopia mi inring lohote tizâm tûrin ka hnên ata mi tirh lawngin an kal ang a; tin, Aigupta ni ang bawkin thinlung manganna tak an chungah a thleng ve ang; ngai rawh, a lo thleng mêk e!

¹⁰“Lalpa PATHIAN chuan heti hian a ti a ni: Babulon lal Nebukadnezzara kutin Aigupta thil ngah rei ruite chu ka tibo vang.

¹¹Ram tichhe tûrin amah leh a hote, hnamte zînga ṭihbaiawm takte chu hruai thlen an ni ang, Aigupta chungah an khandaih an lek ang a, ram chu mi ruangin an tikhat ang.

¹²Tin, luipuite chu ka tikang ang a, ram chu mi sualte hnênah ka hralh ang; a ram leh a chhûnga awm zawng zawng chu awze mite kutin ka tiṭiau vang. Kei LALPA hian ka sawi tawh a ni.

¹³“Lalpa PATHIAN chuan heti hian a ti a ni: Milimte chu ka tichhia ang a, Noph khua ata milimte ka tibo vang, Aigupta-ah hotu rêng rêng an awm tawh lo vang; tin, Aigupta ramah chuan hlauhna ka awmtîr ang.

¹⁴“Pathros chu ka tiṭiau vang a, Zoan-ah chuan mei ka chhuah ang a, No khuaah chuan ka hlen ang.

¹⁵Tin, Aigupta kulh Sin khaw chungah ka thinrim ka hrithla ang a, No khuaa mipuite chu ka râwt bo vang.

¹⁶Tin, Aigupta-ah chuan mei ka chhuah ang a, Sin khua chu mangang takin a awm ang a, No khua pawh a chim vek ang; Noph khua chuan chhûnah hmêlma a nei fo vang.

¹⁷Aven leh Pi-beseth khaw tlangvâlte chu khandaihin an tlu ang a, chûng khuate chu sala hruaiin an awm ang.

¹⁸Aigupta nghâwngkawl ka tihtliaha, a chakna a chapopui ṭhin ka tihtâwp hunah chuan, Tehaphnehes khuaah chuan ni a thim ang; amah zawng chhûmin a hliah ang a, a fanute chu sala hruaiin an awm ang.

¹⁹Hetiang hian Aigupta ramah thu ka hlen ang; tichuan, kei hi LALPA ka ni tih an hria ang,” tiin.

²⁰Tin, heti hi a ni a, kum sâwm leh kum khatna, thla khatna, chumi thla ni sarih niah chuan LALPA thu chu ka hnênah a lo thleng a,

²¹“Mihring fapa, Aigupta lal Pharaoa bân chu ka titliak a; tin, ngai rawh, khandaih keng tûra a chak leh nân damdawi hnawih leh tuam a hlawh lo.

²²Chuvângin, Lalpa PATHIAN chuan heti hian a ti a ni: ‘Ngai rawh, Aigupta lal Pharaoa chu ka do a ni; a bân ṭha lam leh a tliak tawh hnu lam pawh chu ka titliak ang a; tin, a kut ata khandaih chu ka titla ang.

²³Tin, Aigupta mite chu hnamte zîngah ka tidarh ang a, ram tinah ka tiphirsî vek ang.

²⁴Tin, Babulon lal bânte chu ka tichak ang a, a kutah khandaih ka kentîr ang a; Pharaoa bânte erawh chu ka titliak ang a, a hmaah chuan thihpui khawp hliam rûmin a rûm ang.

²⁵Tin, Babulon lal bânte chu ka tichak ang a, Pharaoa bânte erawh chu a uai thla ang; tin, Babulon lal kutah ka khandaih ka kentîr a, Aigupta lal chunga a lek hunah chuan kei hi LALPA ka ni tih an hria ang.

²⁶Tin, Aigupta mite chu hnamte zîngah ka tidarh ang a, ram tinah ka tiphirsî vek ang a; tin, LALPA chu ka ni tih an hria ang,’ ” tiin.