Read Mizo_Old_version Ezekiela 31 Bible Online

Ezekiela 31 - Mizo_Old_version bible

Ezekiela 31

¹Tin, heti hi a ni a, kum sâwm leh kum khatna, thla thumna, chumi thla ni khat niah chuan LALPA thu chu ka hnênah a lo thleng a,

²“Mihring fapa, Aigupta lal Pharaoa leh a khua leh a mite hnênah sawi la: ‘Ropuinaah tu nge i an le?

³Ngai rawh, Lebanon zâr mawi leh Buk, hlim chhah, sâng mawi, A zîk chhûm kâra lêng i iang e.

⁴Siktui thiang châwm, lipui siama ṭhang tual tual, A phunna luiten an luan vêl a, Ram thing tin châwm nân a luantîr e.

⁵Chutin ram thing zawng hnehin a sâng zual e, A zâr a ṭhang, a ṭang a sei, Tui tam tak châwm, hnianghnârin.

⁶Bu an khuar e, a zârah, chunglêngten, A zâr hnuaiah sa tinrêngin no an nei, A hlim hnuaiah hnam ropui zawng an chêng e.

⁷Chutin a mawi, a ropuina, a zâr sei zêlin, A zung tân tui zawng a hnianghnâr e.

⁸Pathian huana sidar thingten an chhîng lo ve, A zâr fâr thingin a iang zo lo, A ṭang pawh thingsiain a iang hek lo, A mawinaah Pathian thing a chhîng zo ve.

⁹A ṭang titamin ka siam mawi a, Pathian huana Eden thing zawngten an îtsîk e,’ tiin.

¹⁰“Chuvângin, Lalpa PATHIAN chuan heti hian a ti a ni: ‘A lo sân êm êma, chhûmte zînga a zîk a lêna, a thinlungin a sânzia chu a chapopui avângin,

¹¹hnamte zînga mi chak tak kutah ka mantîr ang; a suahsualzia ang zêlin a hrem ang a, ka hnawt chhuak ang.

¹²Tin, awze mi hnamte zînga ṭihbaiawm takte chuan an kit ang a, an hluihlâwn ang: tlângahte, ruamahte a ṭang a tla rem rum ang a, chu ram tuiluankawr zawng zawngahte a zârte chu a tliak rem rum ang; khawvêl mi zawng zawngte chu a hlim ata an chhuak ang a, amah chu an kalsan ang.

¹³A chhiatnaah chuan chunglêng sava zawng zawngte an chêng ang a, a ṭang chungahte chuan ramsate an awm ang.

¹⁴Hêng hi tuia châwm thing zawng zawng an intihsân lohva, an zîk chhûm kâra lêng lova, tuia châwm thing rêng rêngin an sânzia an chhuan hek lohna tûr a ni; lei hmun hnuaihnung bera khuarkhuruma chhuk ta mihring fate zînga kal tûrin, thihnaa mantîr an ni vek tawh si a.’

¹⁵“Lalpa PATHIAN chuan heti hian a ti a ni: ‘Seol-a a chhuk niah chuan tui thûk tak chu amah ka sûntîr a, a luite ka chawlhtîr a, tui tam takte chu an luang lo va; Lebanon amah ka sûntîr bawk a, ram thing zawng zawngte amah avângin an chau zo ta.

¹⁶Hnamte pawh a tlu thâwmah chuan ka tikhûr a, khuarkhuruma chhuk tawhte hnêna Seol-a ka paihthlâk ni chuan; Eden thing zawng zawngte, Lebanon-a thing ṭha ṭhate, tuia châwm zawng zawngte chu lei hnuaihnung berah chuan thlamuanin an awm ta.

¹⁷Khandaiha thahte hnênah chuan Seol-ah an chhuk ta bawk a; a ni, hnamte zînga a hlim hnuaia chêng ṭhîn, a kutkete ngei pawh chu.

¹⁸Eden thingte zîngah ropuina leh lennaah tu nge nang ang awm? Mahse, Eden thingte nên chuan lei hmun hnuaihnung berah paihthlâk i ni ang; khandaiha thah, serh tan lohte zîngah i mu tûr a ni. Hei hi Pharaoa leh a khua leh tuite chu an ni,’ tih hi Lalpa PATHIAN thuchhuak a ni.”