Read Mizo_Old_version Ezekiela 32 Bible Online

Ezekiela 32 - Mizo_Old_version bible

Ezekiela 32

¹Tin, heti hi a ni a, kum sâwm leh kum hnihna, thla sâwm leh thla hnihna, chumi thla ni khat niah chuan LALPA thu chu ka hnênah a lo thleng a,

²“Mihring fapa, Aigupta lal Pharaoa sûnna hla phuah la, a hnênah: Hnamte zînga sakeibaknei vânglai anpui chu! Tuipui awlepui i iang zâwk e; I hnâra tuite tiphuanin, i kein i chawk nû, I luite i tibawlhhlawh zo ta.

³Lalpa PATHIAN chuan heti hian a ti: Ka lênin ka khuh ang chia, mi tam tak nên, Ka lênin an man ngei ang che.

⁴Ka hluihlâwn ang chia, khawmualah, Ka paih ang che, tâmlakah; Chunglêng zawng zawng ka ko khâwm ang, i chungah, Ka titlai ang lei pum pui ramsa, nangmahin.

⁵Tlâng tinah i sa ka hlui ang a, I ruangin ruamte a khat ang.

⁶I chênna ram tlâng thlengin ka bual ang, i thisenin. Kawr tin a khat bawk ang, nangmahin.

⁷Ka tihchimih hunah che chuan, Vân ka khuhin arsi ka tithim ang, Ni ka hliah bo vang, chhûmin, Thlain a êng a chhuah lo vang.

⁸Vân êng zawng ka tithim ang, i chungah, I ramah thim ka lêntîr ang, Tih hi Lalpa PATHIAN thuchhuak a ni,” ti rawh.

⁹I hriat loh rama hnamte zînga i chhiatna ka thlen hunah chuan mi tam takte thinlung ka tichi-ai ang.

¹⁰A ni, mi tam tak nangmahah mak tiin ka siam ang a, an hmaa ka khandaih ka vilik hunah chuan, nangmah avângin an lalte pawhin râpthlâk an tiin an hlau êm êm ang; i tlûk niah chuan mi tinin an nun chân hlauvin an khûr an khûr ang.

¹¹Lalpa PATHIAN chuan heti hian a ti si a: Babulon lal khandaih i chungah a lo thleng dâwn.

¹²I mite ka tlûktîr ang, râlhrât mite khandaih, Hnamte zînga ṭihbaiawm berte an ni, An tichhia ang. Aigupta mite ropuina, A mipui zawngte an boral ang.

¹³Tui tam tak kam ramsa zawng a tiboral ang, Mî kete chuan a pal nu tawh lo vang a, Ramsa kete pawhin a pal nu tawh hek lo vang.

¹⁴Chutin tui ka tifîm ang a, Ka luantîr ang, luite chu, hriak angin, Tih hi Lalpa PATHIAN thuchhuak a ni.

¹⁵Aigupta ram ka tihṭiau chhiata, A nghahna zawng zawngah saruakin, A chhûnga chêngte ka râwt bo hunah chuan, Kei hi LALPA ka ni tih an hre ngei ang.

¹⁶“Hei hi an ṭah hla tûr chu a ni; hnam tin fanuten hei hian ṭapin Aigupta leh a mi zawng zawngte an sûn ang,” tih hi Lalpa PATHIAN thuchhuak a ni.

¹⁷Tin, heti hi a ni a, kum sâwm leh kum hnihna, chumi thla ni sâwm leh panga niah chuan LALPA thu chu ka hnênah a lo thleng a,

¹⁸“Mihring fapa, Aigupta mipuite chu ṭah vak vak la, amah leh hnam hmingthang tak fanute chu, khuarkhuruma chhuk tawhte hnênah, lei hnuaihnung lamah chuan paih thla rawh.

¹⁹“Mawinaah tu nge i khûm le? Chhuk la, serh tan lohte zîngah chuan zâl rawh.

²⁰“Khandaiha thah tawhte zîngah chuan an tlu ang a, khandaih hnênah pêk an ni tawh a, amah leh a mi zawng zawngte chu hnûk bo rawh u.

²¹Seol-a awm râlhrât mi chak takte chuan amah leh a ṭanpuitute an bia ang; an chhuak a, an mu reng a, khandaiha thah, serh tan lohte chu.

²²Chutah chuan Assur leh a hote zawng zawng an awm a, an thlânte chu ama vêlah a awm a, an zain thah, khandaiha tlu vek an ni.

²³An thlânte chu khuarkhurum thûk berah a awm a, a thlân vêlah chuan a hote an awm a; an zain khandaiha thah vek an ni a, mi nung ram tirâlṭitute an ni.

²⁴“Chutah chuan Elam leh a thlân vêlah a hote an awm a, an zain thah, khandaiha tlu, lei hnuaihnunga serh tan lohva chhuk, mi nung ram tirâlṭitute, an mualphona khuarkhuruma chhukpuitute an ni a.

²⁵Mi thahte zîngah amah leh a hote mutna an siamsak a, an thlânte chu ama vêlah a awm a, an zain serh tan loh, khandaiha thah an ni; an hlauhawmna chu mi nung ram râlṭitna a ni ṭhîn a, khuarkhuruma chhuk tate nên chuan an mualphona an phur a, mi thahte zîngah chuan an awmtîr a.

²⁶“Chutah chuan Mesek leh Tubal, an hote nên an awm a, an thlânte chu ama vêlah a awm a, an zain serh tan loh, khandaiha thah an ni a; an hlauhawmnain mi nung ram a tirâlṭi ṭhîn si a.

²⁷Serh tan loh, mi chak tlute, indo hriamhrei nêna Seol-a chhuk tate, an khandaih lukhama, an ruhte chunga an phawte awm hnênah chuan an mu lo vang; anni zawng mi nung rama mi chak tirâlṭitute an ni si a.

²⁸Nang chu serh tan lohte zîngah bung rem rumin i awm ang a, khandaiha thite hnênah i mu ang.

²⁹Chutah chuan Edom, a lalte leh a hotute zawng zawng an awm a; an chak teh na a, khandaiha thahte zîngah an zalh a ni; serh tan loh, khuarkhuruma chhuk tawhte hnênah an mu a.

³⁰Chutah chuan hmâr lam hotute, an vaiin, Sidon mi zawng zawng, thahte zînga chhuk tawhte chu an awm a, an chaknain mi a tirâlṭi ṭhîn na a, an zak a, serh tan lohvin, khandaiha thahte zîngah an mu a, khuarkhuruma chhuk tawhte nên chuan an mualpho tlâng ta a ni.

³¹“Pharaoa chuan a lo hmu ang a, a mite zawng zawng chu a thlamuan phah ang, Pharaoa leh a sipai rual zawng zawng, khandaiha thahte ngei pawh chu, tih hi Lalpa PATHIAN thuchhuak a ni.

³²Mi nung ramah chuan râlṭitna ka lêntîr a, serh tan loh, khandaiha thahte zîngah a mu ang, Pharaoa leh a mi zawng zawngte ngei chu, tih hi Lalpa PATHIAN thuchhuak a ni.”