Read Mizo_Old_version Ezekiela 33 Bible Online

Ezekiela 33 - Mizo_Old_version bible

Ezekiela 33

¹Tin, LALPA thu chu ka hnênah a lo thleng a,

²“Mihring fapa, i hnam fate hnênah chuan thu sawi la, an hnênah, ‘Ram chunga khandaih chu ka rawn thlen chuan, ram mite chuan an zîng ata mi pakhat an thlan chhuaha, enthlatua an dah chuan,

³anin ram chunga khandaih lo thleng a hmuh chuan tawtawrâwt a hâm ang a, mipuite chu a inrâlrintîr ang;

⁴tichuan, tu pawh tawtawrâwt ri hriaa pawisa lotu chu, khandaih lo thlengin boral phah ta mah sela, a thisen mawh chu amah ngeiin a phur tûr a ni.

⁵Tawtawrâwt ri a hriata a pawisak loh avângin a thisen mawh chu a phur mai tûr a ni. A lo pawisak erawh chuan a nun a humhim dâwn a ni.

⁶Amaherawhchu, enthlatu chuan khandaih lo thleng chu a hmuha, a tawtawrâwt a ham lohva, mipuite chu an inrâlrin lohva, khandaih chu a lo thlena, an zînga mi tu emawin a boral phah chuan, a khawlohnain a boral a ni ang a, a thisen phuba chu enthlatu lakah ka la ang,’ ti rawh.

⁷Chutiang chuan nang, mihring fapa, Israel chhûngte tân enthlatuah ka siam che a ni; chuvângin, ka kaa thu chhuak hi ngaithla la, ka hnên ata inrâlrinna tûr thu chu an hnênah hrilh rawh.

⁸Mi suaksual hnênah chuan, ‘Aw mi suaksualpa, i thi ngei tûr a ni,’ ka tihin, mi suaksual chu a awm dân kalsan tûra i hrilh loh chuan, mi suaksual chu a khawlohnaah a thi ang a, a thisen phuba erawh chu i lakah ka la ang.

⁹Amaherawhchu, mi sual chu a awm dân kalsan tûra i hrilha, a awm dân a kalsan si loh chuan, a khawlohnaah a thi ang a, nang erawh chuan i nun i humhim a ni ang.

¹⁰“Tin, mihring fapa, nangin Israel chhûngte hnênah thu sawi la, ‘Hetiang hian in ti a, kan bawhchhiatnate leh kan sualnate chuan min delh a, chûng avâng chuan ka rîral a ni, engtin nge kan nun theih rêng ang?’ in ti a.

¹¹An hnênah chuan, ‘A nuna ka nun chhûng chu, mi suaksual thihnaah hian lâwmna rêng ka nei lo va, mi suaksualin a awm dân a kalsana, a nun hi ka lawm zâwng a ni zâwk. In awm dân ṭha lo aṭang chuan kîr ru, kîr ru! Aw, Israel chhûngte u, engah nge in thih ang le, tih hi Lalpa PATHIAN thuchhuak a ni,’ tiin sawi rawh.

¹²Tin, nang, mihring fapa, i hnam fate hnênah chuan sawi la, ‘Mi fel felna chuan a bawhchhiatna niah chuan amah chu a chhanhim lo vang a, mi suaksual sualna pawhin a suahsualna a hawisan niah chuan a titlu lo vang a, mi fel lah chu a sualna niah chuan a felnain a nung thei bîk hek lo vang.’

¹³Mi fel hnênah chuan, ‘I nung ngei ang,’ tih ka sawiin, a felna ringa thil a tihsual chuan a thil fel tih pakhat mah hriat reng a ni lo vang; a thil lo tihsualnaah chuan a thi zâwk ang.

¹⁴Tin, mi sual hnênah, ‘I thi ngei ang,’ ka tih leh thungin, a sualnate a hawisana a thiang leh a dik a lo tiha,

¹⁵mi sual chuan mi dahkhamte a pêk kîra, a thil rûkte a pêk leha, nunna dânte a zawha, khawlohna eng mah a tih loh chuan a nung ngei ang a, a thi lo vang.

¹⁶Sualna a lo tih tâk eng mah kha hriat reng a ni tawh lo vang a, a thiang leh a dik chu a lo ti tawh a, a nung ngei ang.

¹⁷Mahse, i hnam fate chuan, ‘Lalpa thiltih dân hi a rual lo ve,’ an tihin, anmahni tih dân a fel lo zâwk a ni si a.

¹⁸Mi fel chuan a felna a hawisana, thil sual a lo tih chuan, chumi avâng chuan a thi mai ang.

¹⁹Tin, mi sualin a sualna a hawisana, a thiang leh a dik chu a tih chuan, chumi zârah chuan a nung ang.

²⁰Mahse, ‘Lalpa tih dân hi a rual lo ve,’ in ti a. Aw, Israel chhûngte u, mi tin mahni tih dân ang zêlin ka rêlsak ang che u,” a ti a.

²¹Tin, heti hi a ni a, kan sal tân kum sâwm leh kum hnihna, thla sâwmna, chumi thla ni nga niah chuan Jerusalem ata tlân chhuak mi pakhat ka hnênah a lo kal a, “Khawpui chu hneh a ni ta,” a rawn ti a.

²²Tin, chu mi tlân chhuak chu a lo kal hma tlai lamah chuan LALPA chuan ka chungah a kut a nghat a, zîng lama ka hnêna a lo kal chuan ka kâ mi lo ântîr hman a; tichuan, ka kâ chu ka âng a, ṭawng thei lovin ka awm ta lo.

²³Tin, LALPA thu chu ka hnênah a lo thleng a,

²⁴“Mihring fapa, Israel rama hmun ram tawh hnua awmte chuan, ‘Abrahama chu pakhat a ni a, ram chu a luah a, keini erawh chu tam tak kan ni a; ram chu rochun tûra pêk a ni tawh ang chu,’ tiin a sawi a.

²⁵Chuvângin, an hnênah chuan, ‘Lalpa PATHIAN chuan heti hian a ti: “Sa thisen in ei a, in milimte lamah in mitte in lên chho va, thisen in chhuah a, nangnin ram chu in chang ang maw?

²⁶In khandaih in ring a, thil tenawm in ti a, mi tinin ṭhenawmpa nupui in tikhawlo va, nangnin ram chu in chang ang maw?”’

²⁷Hetiang hian an hnênah i sawi tûr a ni, ‘Lalpa PATHIAN chuan heti hian a ti a ni: “A nuna ka nun chhûng chu, hmun ram tawh hnua awmte chu khandaihin an tlu ngei ngei ang a, tâmlaka awmte chu sakawlh hnênahte ei zawh atân ka pe ang a, kulh nghet leh pûka awmte chu hripuiin an thi ang.

²⁸Tin, ram pawh chu ka tichhiain, râpthlâk takah ka siam ang a, a thiltihtheihna, a chapopui chu a kin tawh ang; Israel tlângte chu thlalêrah a chang ang a, tu mah an veivâk tawh lo vang.

²⁹Thil tenawm an tih avânga ram chu ka tihchhiata, râpthlâk taka ka siam hunah chuan kei hi LALPA ka ni tih an hria ang.”’

³⁰“Tin, nang, mihring fapa, bang bulah kawngkâahte i hnam fate chuan an sawi huai huai ang chia, mi tinin an unaute hnênah, ‘Hawh teh u khai! LALPA hnên ata thuchhuak i ngaithla ang u,’ an ti ang.

³¹Tin, a hlawp hlawpin i hnênah an lo kal ang a, ka mite ang maiin i hmaah an ṭhu ang a, i thu an ngaithla ang a; mahse, an zâwm chuang lo vang; an kain hmangaihna nasa tak an tilang ang a, an thinlung erawh chuan hlêpna lam a pan ang.

³²Tin, ngai teh, nang chu an tân chuan hmangaihna hla, mawi taka sak leh tum ang i ni ang; i thute chu ngaithla mahse, an zâwm chuang lo vang.

³³Hei hi a lo thlen hunah (ngai rawh, a lo thleng mêk e), an zîngah zâwlnei a awm tih an hre dâwn nia, a ti e, ti rawh,” a ti a.