Read Mizo_Old_version Ezekiela 34 Bible Online

Ezekiela 34 - Mizo_Old_version bible

Ezekiela 34

¹Tin, LALPA thu chu ka hnênah a lo thleng a,

²“Mihring fapa, Israel berâmpute hnenah thu sawi rawh; thu sawi la, an hnênah, ‘Berâmpute hnên ngeiah chuan, heti hian Lalpa PATHIAN-in a ti a ni: “Israel berâmpu, mahni inchâwm maite chu an chung a pik e! Berâmpute chuan berâm chu an châwm lo vang em ni?

³A thaute chu in ei a, a hmulin in inthuam a, a thau thaute chu in talh a, berâmte chu in châwm si lo.

⁴Natna tuarte in tichak lo va, damlote in tidam lo va, ruh tliakte in tuam lo va, hnawh bote in hruai kîr lo va, bote in zawng hek lo; khauh tak leh na takin in thunun ta zâwk a.

⁵Berâmpute an awm loh avângin tihdarhin an awm a, an darh a, ram sakawlhte chaw mai an lo ni ta a.

⁶Ka berâmte chu tlâng tin leh mual tinah an vâk bo va; a ni, ka berâmte chu lei chung zawng zawngah an lo darh ta; ngaihsaktu leh zawngtu rêng an awm lo, tiin sawi rawh,” a ti a.

⁷“ ‘Chuvângin, berâmpute u, LALPA thu hi ngaithla rawh u,

⁸“A nuna ka nun chhûng chu,” tih hi Lalpa PATHIAN thuchhuak a ni, “Berâmpu an awm lohva, berâmputen ka berâmte an zawn lohva, berâmputen ka berâmte an châwm lohva, anmahni an inchâwm zâwk avângin ka berâmte chu ram sakawlhte chaw mai an lo ni a, ka berâmte chu sa seh mai an lo ni ta ngei a.”

⁹Chuvângin, nangni berâmpute u, LALPA thu hi ngaithla rawh u.

¹⁰Heti hian Lalpa PATHIAN chuan a ti a ni: “Ngai rawh u, berâmpute chu ka do a ni; an kut ata ka berâmte ka chhuh ang a, ka berâmte an enkawlna ka titâwp ang a, berâmpute pawh anmahni an inchâwm tawh hek lo vang; an ângchhûng ata ka berâmte ka la chhuak ang a, an tân ei tûr an nih tawh loh nân,” tiin.

¹¹“ ‘Heti hian Lalpa PATHIAN chuan a ti si a: “Ngai rawh u, kei, keimah ngei hian ka berâmte ka zawng ang a, ka zawng chhuak ang.

¹²Berâmpuin a berâm darhte zînga a berâm rualte a zawn lai angin ka berâmte ka zawng chhuak ang; khawdur ni leh thim hnuaia an darhna zawng zawng ata ka zawng chhuak ang.

¹³Tin, mite zîng ata ka la chhuak ang a, ram tin ata ka khâwm ang a, an ram ngeiah ka hruai lût ang; Israel tlângahte, tuikawr ruamahte, mi chênna hmun zawng zawngahte ka tlattîr ang.

¹⁴Hlobet ṭha tak hmunahte ka tlattîr ang a, an huang chu Israel tlâng sângahte a awm ang. Huang ṭha tak chhûngah an bawk ang a, Israel tlâng chunga hlobet dâwng hmunahte an tla ang.

¹⁵Keimah ngeiin ka berâmte chu ka châwm ang a, ka bawhtîr hle hle ang,” tih hi Lalpa PATHIAN thuchhuak a ni.

¹⁶“Bote chu ka zawng ang a, hnawh bote chu ka hruai kîr ang a, ruh tliakte chu ka tuam ang a, damlote chu ka tichak ang; a thau leh a chakte chu ka tibo vang a, dik takin ka châwm ang.”

¹⁷Tin, nangni thu-ah zawng, aw ka berâm rualte u, heti hian Lalpa PATHIAN chuan a ti a ni: “Ngai rawh u, ka berâmte kâr thu ka rêlsak ang a, berâmpate, kêlpate pawh.

¹⁸Ran tlatna hmun ṭha tak chunga tlat chu in tân thil tênau anga langin, in tlatna neih chhun chu in chîl chhe mai mai zâwk a ni maw? Tin, tui fîm takte chu in in zawhin in pal nu mai mai a ni maw?

¹⁹Ka berâmte erawh chuan in rah hnu an ei a, in pal nut hnu an in a ni.”

²⁰“ ‘Chuvângin, heti hian LALPA PATHIAN chuan an hnênah a ti a ni: “Ngai rawh u, kei, keimah ngei hian ran chêrte leh ran thaute kâr thu ka rêlsak ang.

²¹A chak lote chu in dâr leh in pangtein in nêk a, in kîtein in pir a, in tidarh a;

²²chuvângin, ka berâmte chu ka chhanhim ang a, sa seh mai an ni tawh lo vang a, berâmte kâr thu ka rêlsak ang.

²³Tin, an chungah berâmpu pakhat ka dah ang a, ka rawngbâwltu Davida ngei chu; ani chuan anni chu a châwm ang; ani chu an vêngtu a ni ang a, anni chu a châwm ang.

²⁴Tin, kei LALPA hi an Pathian ka ni ang a, ka rawngbâwltu Davida chu an chunga hotu a ni ang; kei LALPA ngei hian ka sawi tawh a ni.

²⁵Tin, anmahni nêna remna thuthlung ka siam ang a, sakawlhte chu ram ata ka tibo vang; tin, thlalêrahte pawh him takin an chêng ang a, ngaw hnuaiahte an muhîl chiah chiah ang.

²⁶Anmahni leh ka tlâng vêl hmunte chu mal ka sâwm ang a, a hun têah ruah ka sûrtîr ang a, malsâwm ruahte a sûr ang.

²⁷Tin, rama thing chuan rah a chhuah ang a, leiin a hlâwkna a chhuah ang a, an ramah chuan him takin an awm ang; an nghâwngkawlte ka tihtliaha, bâwiha siamtute kut ata ka chhanchhuah hunah chuan kei hi LALPA ka ni tih an hria ang.

²⁸Hnam dangte sahmîm tipuar mai an ni tawh lo vang a, rama sakawlhte ei ral mai an ni tawh hek lo vang; him takin an awm tawh zâwk ang a, tu mân an tihlau ngai tawh lo vang.

²⁹Thil phun hmingthang tak ka siamsak ang a, chu ramah chuan ṭâmin a tiral tawh lo vang a, hnam dangte hmuhsitna an tuar tawh hek lo vang.

³⁰Tin, kei LALPA an Pathian hi an hnênah ka awm tih an hriain, anni Israel chhûngte pawh ka mite an ni tih an hria ang,” tih hi Lalpa PATHIAN thuchhuak a ni.’

³¹‘Nangni ka berâmte, ka ran tlatna hmuna berâmte chu mihring in ni a; tin, kei hi in Pathian ka ni,’ tih hi Lalpa PATHIAN thuchhuak a ni,” tiin.