Read Mizo_Old_version Ezekiela 35 Bible Online

Ezekiela 35 - Mizo_Old_version bible

Ezekiela 35

¹Tin, LALPA thu chu ka hnênah a lo thleng leh a,

²“Mihring fapa, Seir tlâng hmachhawn la, a hnênah thu sawi la,

³a hnênah, ‘Lalpa PATHIAN chuan heti hian a ti a ni: “Ngai rawh, aw Seir tlâng, ka do che a ni; i chungah ka kut ka lek ang a, thlalêrah, râpthlâk takah ka siam ang che.

⁴I khawpuite chu ka tiram ang a, thlalêrah i chang ang; tin, LALPA chu ka ni tih hi i hria ang.

⁵An bawhchhiatna hremna hnuhnûng bera an chhiat nia Israela chhûngte chu khandaih thiltihtheihnaa i hlana, i tai reng avângin,

⁶a nuna ka nun chhûng chu, thisen atân ka buatsaih ang chia, thisenin a ûm ang che; thisen i huat loh avângin thisen chuan a ûm ang che,” ’ tih hi Lalpa PATHIAN thuchhuak a ni.

⁷Hetiang hian Seir tlâng chu râpthlâk taka siamin thlalêrah ka siam ang; a chunga mi veivâk ṭhînte chu ka titâwp vek ang.

⁸A tlângte chu ama mi thahtein ka tikhat ang; i tlângahte, i kawr leh i tuikawr ruamahte khandaiha thahte chu an tlu rem rum ang.

⁹Thlalêrah ka siam hlen ang chia, i khawpuite chu luahin a awm lo vang; tin, kei hi LALPA ka ni tih in hria ang.

¹⁰‘LALPA chu a awm reng na a, hêng hnam pahnihte leh ram pahnihte hi ka ta a ni a, ka nei mai ang,’ i tih avângin,

¹¹a nuna ka nun chhûng chu,” tih hi Lalpa PATHIAN thuchhuak a ni, “I thinrimna ang zêl leh i huatna avânga îtsîkna i tihlan ang zêlin ka che dâwn a ni; i chung thu ka rêl hunah chuan an zîngah ka intilang ang.

¹²‘Thlalêra siamin an awm ta a, ka hnênah pêkin an awm ta,’ tia Israel tlângte i sawichhiatna zawng zawng chu kei LALPA hian ka hre vek tih i la hria ang.

¹³Ka chungah i kaa intilianin ka chungah thu i tuitam a, ka hre vek mai.

¹⁴Heti hian Lalpa PATHIAN chuan a ti a ni: ‘Lei pum pui lâwm nân thlalêrah ka siam ang che.

¹⁵Israel-te rochun thlalêra a chan avânga i lâwm ang bawkin i chungah ka ti ang; aw Seir tlâng leh Edom zawng zawng, a pumin thlalêrah a chang ang! Tichuan, LALPA chu ka ni tih an hria ang.’