Read Mizo_Old_version Ezekiela 36 Bible Online

Ezekiela 36 - Mizo_Old_version bible

Ezekiela 36

¹“Tin, nang mihring fapa, Israel tlângte hnênah thu sawi la, Nangni Israel tlângte u, LALPA thu hi ngaithla rawh u,

²Lalpa PATHIAN chuan heti hian a ti a ni: I chungah i hmêlmate chuan, ‘Chei! Hmasâng bâwlhmun zawng zawngte chu kan ta a ni ta,’ an tih avângin,

³thu sawi la, Lalpa PATHIAN chuan heti hian a ti a ni: Hnam la awm chhunte ta tûra kil tina an ei chia, thlalêra an siam che avâng leh, mi kamtamte tîtî leh sawichhiata an awmtîr che u avângin,

⁴nangni Israel tlângte u, Lalpa PATHIAN thu hi ngaithla rawh u, Lalpa PATHIAN chuan tlângte, mualte, tuikawrte, ruamte leh hmun lo ram tawhte, khawpui ram tawh, a vêla hnam la awm chhunte sahmîm tipuar mai leh nuihzatbûrte hnênah heti hian a ti a ni;

⁵chuvângin, Lalpa PATHIAN chuan heti hian a ti a ni: Hnam la awm chhun leh Edom zawng zawng, rilru lâwm taka ka ram neih lo inruat chawpa, mi hmusit taka râllâka siam tumtute chungah chuan thinur êm êmin thu ka sawi ngei a ni.

⁶Chuvângin, Israel ram chungchâng thu-ah chuan thu sawi la, tlângte, mualte, tuikawrte leh ruamte hnênah chuan, Lalpa PATHIAN chuan heti hian a ti a ni: Ngai rawh u, hnam dangte chêksawlhna in tuar avângin thinur tak leh thinrim takin thu ka sawi a ni.

⁷Chuvângin, Lalpa PATHIAN chuan heti hian a ti a ni: I vêla hnamte chuan anmahni mualphona an phur ngei ang, tiin ka kut ka lek e.

⁸“Nangni erawh chuan, aw Israel tlângte u, zâr in chhuah ang a, ka mi Israel-te tân rah in chhuah ang; an lo kal mai dâwn si a.

⁹Ngai rawh u, in lama ṭang ka ni si a, in lam ka hawi ang a, rih dûrin in awm ang a, chi tuhin in awm bawk ang.

¹⁰In chungah mihring ka tipung ang a, Israel chhûngte zawng zawng, an vai pawhin; hmun ramte chu siam ṭhatin a awm ang a, khawpuite chu luahin a awm ang.

¹¹In chungah mi leh sa ka tipung ang a, an pungin an hmuingîl ang; in awm dân hmasa ang khân ka luahtîr ang che u a, a tîra in awm dân ai maha ṭhain ka siam ang che u; tichuan, kei hi LALPA ka ni tih in hria ang.

¹²A ni, in chungah mi ka lêntîr ang a, ka mi Israel-te ngei chu; an luah ang chia, an rochan i ni ang a, tûn achinah an fate i chântîr ngai tawh lo vang.

¹³Heti hian Lalpa PATHIAN chuan a ti a ni: Nang mihringte ei raltu, i mite chân ṭhîntu i ni an tih ṭhin che avângin,

¹⁴mihringte i ei ral tawh lo vang a, i mite pawh i chân ngai tawh hek lo vang, tih hi Lalpa PATHIAN thuchhuak a ni.

¹⁵Awze mite hmuhsitna ka tuartîr tawh lo vang chia, mite sawichhiat i tuar ngai tawh hek lo vang a, i mite i chân ngai tawh hek lo vang, tih hi Lalpa PATHIAN thuchhuak a ni, ti rawh,” a ti a.

¹⁶Tin, LALPA thu chu ka hnênah a lo thleng leh a,

¹⁷“Mihring fapa, Israel chhûngte chu anmahni rama an chên lai khân an awm dân leh an thiltihtein an tibawlhhlawh a; ka hmaa an awm dân chu hmeichhe fel loh laia a thianghlim lohna ang mai a ni a.

¹⁸Chuvângin, ram chungah thisen an chhuaha, an milimtea an tihbawlhhlawh avângin an chungah ka thinrimna chu ka hri thla a.

¹⁹Hnamte zîngah ka tidarh a, ram tinah an darhsarh ta a; an awm dân leh an thiltihte ang zêlin an chung thu ka rêlsak a.

²⁰An va kalna hnamte hnên an thlenin ka hming thianghlim an tibawrhbâng a, miten, ‘Hêngte hi LALPA mite an ni a, ram ata an lo chhuak a nih hi,’ an lo tih ṭhinah hian.

²¹Mahse, Israel chhûngten an va kalna hnamte zînga an tihbawrhbân, ka hming thianghlim chu ka lainat a ni.

²²Chuvângin, Israel chhûngte hnênah, Lalpa PATHIAN chuan heti hian a ti a ni: Aw, Israel chhûngte u, nangmahni ka lainat avâng ni lovin, in va kalna hnamte zînga in tihbawrhbân, ka hming thianghlim ka lainat avâng zâwkin hei hi ka ti a ni.

²³Ka hming ropui tak, hnamte zînga bawrhbâng, an zînga nangmahni ngeiin in tihbawrhbân chu ka tithianghlim dâwn a ni; tichuan, an mit hmuha nangmahnia tihthianghlima ka awm hunah chuan LALPA ka ni tih an hria ang, tih hi Lalpa PATHIAN thuchhuak a ni.

²⁴“Hnamte zîng ata ka hruai chhuak ang che u a, ram zawng zawng ata ka khâwm ang che u a, in ram ngeiah ka hruai lût dâwn si che u a.

²⁵Tin, in chungah tui fîm ka theh ang a, in lo thianghlim ang a, in bawlhhlawhna zawng zawng leh in milimte lak ata ka tlêng fai ang che u.

²⁶Thinlung thar ka pe ang che u a, in chhûngah thlarau thar ka dah ang; in tisa ata thinlung, lung anga sak chu ka la bo vang a, thinlung, tisa anga nêm ka pe zâwk ang che u.

²⁷Tin, in chhûngah ka thlarau ka dah ang a, ka dân siamah ka lêntîr ang che u a, ka thupêkte chu in vawng ang a, in zâwm ang.

²⁸In pute hnêna ram ka pêkah chuan in chêng ang; tin, nangni chu ka mite in ni ang a, kei in Pathian ka ni ang.

²⁹In bawlhhlawhna zawng zawng ata ka chhanchhuak ang che u a; tin, buh chu thu ka pe ang a, ka tipung ang a, in chungah ṭâm a tla tawh lo vang.

³⁰Thingrahte ka tipung ang a, thlawhhma ka tihlâwk ang a, ṭâm avânga hnamte zînga mualphona in tuar tawh lo vang.

³¹Tichuan, in dân sualte, in thiltih ṭha lote chu in lo hre tawh ṭhîn ang a, in tenawmna leh in khawlohna avâng chuan nangmahni mit hmuh ngeiah in ten tawh ang.

³²Nangmahni vânga hei hi ti ka ni lo tih lo hre mai rawh u, tih hi Lalpa PATHIAN thuchhuak a ni. Aw, Israel chhûngte u, in awm dân avâng chuan zak ula, kimki rawh u.

³³Lalpa PATHIAN chuan heti hian a ti a ni: In khawlohna zawng zawng ata ka tlen fai che u niah chuan, khawpuite chu ka luahtîr leh ang che u a, hmun ram tawhte chu ka siam ṭha leh ang.

³⁴“Tin, ram lo chhe tawhte chu an let ang, tûn hmain mi veivâkte mit hmuha chhe tawh hnu ni mah sela.

³⁵Tin, ‘He ram chhe tawh hnu hi Eden huan ang mai a lo ni leh ta; khawpui chhiaa, lo ram tawhte chu luah leh kulh neiin a awm leh ta,’ an la ti ang.

³⁶Tin, in vêla hnam la awmte chuan kei LALPA hian hmun chhiate chu ka siam ṭha leh a, ram lo chhe tawh chu ka tiduah leh ta tih an hria ang. Kei LALPA hi ka ṭawng tawh a, ka ti ngei ang.

³⁷“Tin, Lalpa PATHIAN chuan heti hian a ti a ni: Chu lovah pawh hei hi Israel chhûngte chu ka la dîltîr ang: ran rual ang maia an mite tipung tûrin.

³⁸Inthawina tûr ran rual, kût vângthlaa Jerusalem ran rualte ang maiin; chutiangin khawpui ram tawh hnu chu mipui tam takin a la khat ang; tichuan, kei hi LALPA chu ka ni tih an hria ang,” a ti a.