Read Mizo_Old_version Ezekiela 37 Bible Online

Ezekiela 37 - Mizo_Old_version bible

Ezekiela 37

¹Tin, LALPA kut chu ka chungah a awm a, LALPA thlarau chuan mi hruai chhuak a, ruam lai takah mi dah a; chu ruam chu ruh hlîrin a khat a.

²Tin, an zîngah chuan mi hruai vêl ta a; tin, ruamah chuan a lo awm rem rum mai a! Tin, ngai teh, a ro vek a ni.

³Tin, ka hnênah, “Mihring fapa, hêng ruhte hi a nung thei ang em?” a ti a. Tin, kei chuan, “Aw Lalpa PATHIAN, nangin i hre zâwk ang,” ka ti a.

⁴Tin, ani chuan ka hnênah, “Hêng ruhte hnênah hian thu sawi la, an hnênah, ‘Aw, nangni ruh rote u, LALPA thu hi ngai rawh u.

⁵Hêng ruhte hnênah hian Lalpa PATHIAN chuan heti hian a ti a ni: “Ngai rawh u, nangmahniah thaw ka luhtîr ang a, in nung ang.

⁶Tin, nangmahniah thahrui ka dah ang a, tisain ka tuam ang che u a, vunin ka khuh ang che u; tin, in chhûngah thaw ka awmtîr ang a, in nung ang. Tichuan, kei hi LALPA chu ka ni tih in hria ang,” ’ ti rawh,” a ti a.

⁷Tichuan, thu mi pêk ang chuan ka sawi ta a; tin, ka han sawi chuan thâwm a lo awm a, ngai teh, a ri ta rum rum a, ruhte chu mahni zawmpui ṭheuhvah a inchuktuah khâwm ta a.

⁸Tin, ka han en chuan, ngai teh, anmahniah thahrui a lo awm a, tisain a tuam a, vunin a khuh ta a; thaw erawh chu anmahniah a la awm lo.

⁹Tichuan, ani chuan ka hnênah, “Thli hnênah thu sawi la, mihring fapa, sawi ngei la, thli hnênah chuan, ‘Lalpa PATHIAN chuan heti hian a ti a ni: “Aw, thaw, kâwlkil li aṭangin lo kal la, hêng mi thahte chungah hian thaw rawh, an nun theih nân,” ’ ti rawh,” a ti a.

¹⁰Chutichuan, thu mi pêk ang chuan ka sawi a, thaw chu anmahniah a lo lût a, an nung ta a, mahni ke ṭheuhvin an ding a, sipai rual ropui tak an lo ni ta a.

¹¹Tichuan, ka hnênah, “Mihring fapa, hêng ruhte hi Israel chhûngkaw pum pui an ni a. Ngai teh, anni chuan, ‘Kan ruhte a ro zovin, kan beisei a bo zo ta a, râwt bovin kan awm ta,’ an ti ṭhîn a.

¹²Chuvângin, thu sawi la, an hnênah, ‘Lalpa PATHIAN chuan heti hian a ti a ni: “Ngai rawh u, in thlânte ka hawng ang a, aw, ka mite u, in thlân ata ka chhuahtîr ang che u; tin, Israel ramah chuan ka hruai lût ang che u.

¹³Tin, in thlânte ka hawna, in thlân ata ka chhuahtîr che u hunah chuan, aw, ka mite u, LALPA chu ka ni tih in hria ang.

¹⁴Nangmahniah ka Thlarau ka dah ang a, in nung ang a, in ram ngeiah ka dah ang che u. Tichuan, kei, LALPA hian ka sawi tawh a, ka ti ngei bawk a ni tih in hria ang,” ’ tih hi LALPA thuchhuak a ni,” a ti a.

¹⁵Tin, LALPA thu chu ka hnênah a lo thleng leh a,

¹⁶“Nang, mihring fapa, tiang pakhat la la, chutah chuan, ‘Juda leh a pâwlpui Israel fate tan,’ tih ziak rawh; tiang dang pawh la la, chutah chuan, ‘Josefa, Ephraima tiang leh a pâwlpui Israel chhûngte zawng zawng tan,’ tih ziak bawk rawh.

¹⁷Tin, tiangte chu zawm la, i kutah pakhat a nih theih nân.

¹⁸‘Hêng hi eng tihna nge ni, min kawhhmuh dâwn lâwm ni?’ i hnam faten an tih che chuan,

¹⁹an hnênah, ‘Lalpa PATHIAN chuan heti hian a ti a ni: “Ngai rawh u, Josefa tiang, Ephraima leh a pâwlpui Israel chite kuta mi chu ka la ang a, chûng chu Juda tiang nên ka zawm ang a, pakhatah ka siam ang a, ka kutah pakhat a lo ni ang,’ ” i ti dâwn nia.

²⁰Tiang, i ziakte ngei kha an mit hmuh ngeiah i kutah a awm ang.

²¹“Tin, an hnênah, ‘Lalpa PATHIAN chuan heti hian a ti a ni: “Ngai rawh u, Israel-te chu hnam, an va kalnate zîng ata ka hruai ang a, kil tin ata ka khâwm ang a, an ramah chuan ka hruai lût ang.

²²Tin, chu ram, Israel tlângahte chuan hnam pakhatah ka siam ang a, lal pakhat chu an zaa lal a ni ang; tin, hnam pahnih an ni tawh lo vang a, lalna ram hnihah ṭhen a ni ngai tawh hek lo vang.

²³An milimte, an thil tenawmte, an bawhchhiatnatein an intibawlhhlawh ngai tawh hek lo vang; an tlûka an sual ṭhinna zawng zawng ata ka chhanchhuak ang a, ka tlêng fai ang. Tichuan, ka mite an ni ang a, kei an Pathian ka ni ang.

²⁴Ka rawngbâwltu Davida chu an chunga lal a ni ang a, an zaa chungah berâmpu pakhat a awm ang; ka thupêkte an awih ang a, ka dân siamte an zâwm ang a, an hmang ang.

²⁵Ka rawngbâwltu Jakoba hnêna ka ram pêk, in pute lo chên ṭhinnaah chuan an chêng ang; chutah chuan kumkhuain an chêng ang a, anmahni leh an fate, an fate fate pawh; ka rawngbâwltu Davida chu kumkhuain an hotu a ni ang.

²⁶Chu lo pawh chu anmahni hnênah remna thuthlung ka siam ang a, an tân kumkhaw thuthlung a ni ang a, an hnênah ka pe ang a, anni chu ka tipung ang a, an zîngah chuan kumkhuain ka biakbûk ka dintîr ang.

²⁷Ka bâwktê pawh an hnênah a awm ang a, an Pathian ka ni ang a, anni chu ka mite an ni ang.

²⁸Tin, an zîngah kumkhua atân ka biakbûk a din hunah chuan kei hi LALPA, Israel tithianghlimtu chu ka ni tih an hria ang,” ’ ti rawh,” tiin.