Read Mizo_Old_version Ezekiela 38 Bible Online

Ezekiela 38 - Mizo_Old_version bible

Ezekiela 38

¹Tin, LALPA thu chu ka hnênah a lo thleng a,

²“Mihring fapa, Magog rama mi, Ros leh Mesek leh Tubal hotu ber Goga hmachhawn la, a chungah thu sawi la,

³Lalpa PATHIAN chuan heti hian a ti a ni: Ngai rawh, aw Goga, Ros leh Mesek leh Tubal hotu ber, ka do che a ni;

⁴ka lehhawitîr ang chia, i khabeah nghakuaiin ka kuai ang chia, ka khai chhuak ang che; i sipai rual zawng zawngte, sakawr leh a chung chuang mite, râlthuam famkima inthuam zawng zawngte, pâwl ropui tak, phaw lian leh phaw tê hmanga khandaih keng ṭheuhte nên chuan.

⁵Persia, Kus, Put-te nên, an vaia phaw leh thîr lukhum neite chu;

⁶Gomer leh a sipai rual zawng zawngte; Togarma chhûngte, hmâr tâwpa mi leh a sipai rual zawng zawngte, i hnêna mi tam takte nên pawh.

⁷Inrâlring la, a ni, lo inpeih rawh, nang leh i hnêna awm khâwm, i pâwlpui zawng zawngte nên; tin, an vêngtu lo ni ang che.

⁸Ni tam tak hnuah chuan koh khâwm i ni ang a, kum hnuhnûngahte chuan khandaih laka chhanchhuah, hnam tam takte lak ata lâk khâwmte awmna ram, Israel tlâng chhe reng ṭhînte chu i rawn bei ang; hnamte zîng ata hruai chhuaha, tûna an vaia thlamuang taka an awmna ram chu.

⁹Tin, i chho vang a, thlipui ang maiin a lo thleng ang a, chhûmin ram a tuam mup mup ang mai hi i ni ang, nang leh i hnêna sipai rual zawng zawng leh i hnêna mi tam takte chu.

¹⁰“Tin, heti hian Lalpa PATHIAN chuan a ti a ni: Chumi niah chuan heti hi a ni ang a, i rilruah thil a lo lût ang a, thil ṭha lo i suangtuah ang;

¹¹tichuan, ‘Kulh nei lo khuate ram chu ka rûn ang a, mi him taka awm hle hle, an zaa kulh lova chêng, kulh kawngkhâr leh a kalhna thîr nei lohote chu ka bei ang,’ i ti rilru ang.

¹²Râllâk sum leh bungruate la tûr leh hmun chhe hnu luah lehtute leh, hnamte zîng ata hruai khâwm tawh ran rual leh bungruate ngaha, lei lailuma chêngte chungah i kut lek i tum ang.

¹³Seba leh Dedan leh Tarsis sumdâwngte leh an sakeibaknei vânglai zawng zawngte chuan i hnênah, ‘Râllâk la tûrin i lo kal em ni? Mi rawk tûrin i pâwlte chu i rawn khâwm a ni maw? Tangkarua te, rangkachak te, ran rual leh bungruate, nasa tak chhuhsaka la bo tûr i ni maw, an ti ang che,’ tiin.

¹⁴“Chuvângin, mihring fapa, thu sawi la, Goga hnênah chuan, Lalpa PATHIAN chuan heti hian a ti a ni: Chumi ni, ka mi Israel-te him taka an awm hun tûr chu i hre lo maw?

¹⁵Hmâr lam ram tâwp rêt, i hmun aṭang chuan i lo kal ang, nang leh i hnêna mi tam tak, sakawr chung chuang ṭheuh, pâwl ropui tak, sipai rual nasa tak mai chu.

¹⁶Chhûmin ram a tuam mup mup ang mai hian ka mi Israel-te chungah i lo kal ang; heti hi a ni ang a, ni hnuhnûngahte chuan ka ram do tûrin ka hruai ang chia, hnamte chuan mi hria ang, aw Goga, an mit hmuha nangmaha tihthianghlima ka awm hunah chuan.

¹⁷Tin, Lalpa PATHIAN chuan heti hian a ti a ni: Hmasânga ka rawngbâwltu Israel zâwlnei, chûng laia kum tam tak chhûnga thu lo sawi ṭhîntuten, anmahni bei tûra ka rawn hruai tûr thu an sawi ṭhina kha i ni em, ti rawh,” tiin.

¹⁸“Tin, chumi niah chuan heti hi a ni ang a, Israel ram bei tûra Goga a lo kal hunah chuan ka thinrimna chu ka hnâr khu chhuah hluah hluah ang, tih hi Lalpa PATHIAN thuchhuak a ni.

¹⁹Ka thin a rima ka thin a ur lai takin, ‘Chumi niah chuan Israel ramah lîr nasa takin a nghîng ngei ang;

²⁰chutichuan, tuipui sanghate, chunglêng savate, ramsate, lei chunga vâk rannung zawng zawng, lei chunga mihring zawng zawngte ka hmaah an khûr ang a, tlângte tihhniamin a awm ang a, kulh bang tin leiah a tlu ang,’ tiin ka sawi a nih hi.

²¹Ka tlâng zawng zawngahte amah beihna tûrin khandaih ka lam ang, mi tin khandaih chuan a unaupa a do vang,” tih hi Lalpa PATHIAN thuchhuak a ni.

²²“Tin, thisen chhuah leh hripuiin amah ka bei ang; amah leh a sipai rualte leh a hnêna mi tam takte chungah chuan, ruahpuivânâwn leh rial nasa tak leh mei leh kâtte ka sûrtîr ang.

²³Tin, ka ropuizia leh ka thianghlimzia ka tilang ang a; tin, hnam tam takte mit hmuhah ka intilang ang. Tichuan, kei hi LALPA ka ni tih an hria ang.”