Read Mizo_Old_version Ezekiela 39 Bible Online

Ezekiela 39 - Mizo_Old_version bible

Ezekiela 39

¹“Tin, nang, mihring fapa, Goga chungah thu sawi la, ‘Lalpa PATHIAN chuan heti hian a ti a ni: “Ngai rawh, aw Goga, Ros leh Mesek leh Tubal hotu ber, ka do che a ni;

²ka lehhawitîr ang chia, ka hruai zêl ang chia, hmâr tâwp rêt ata ka hruai chhuak ang chia, Israel tlângahte chuan ka thlen ang che.

³Tichuan, i kut vei lam ata i thal ngul chu ka titliak ang a, i kut ding lam ata i thalte chu ka tithla ang.

⁴Israel tlângahte chuan i tlu ang a, nang leh i sipai rual zawng zawng leh i hnêna mipui awmte nên; sava, sa hel ei chi tinrêngte hnên leh ram sakawlhte hnênah ei zawh atân ka pe ang che.

⁵Tâmlakah i tlu ang; keiin ka sawi tawh si a,” tih hi Lalpa PATHIAN thuchhuak a ni,’ ti rawh.

⁶Magog leh tui kam rama him taka chêng ṭhînte chungah chuan mei ka chhuah ang. Tichuan, kei hi LALPA ka ni tih an hria ang.

⁷Tin, ka mi Israel-te zîngah chuan ka hming thianghlim tihbawrhbân leh chu ka phal tawh hek lo vang. Tichuan, hnamte chuan kei hi LALPA, Israel Mi Thianghlima chu ka ni tih an hria ang.

⁸“Ngai rawh u, a lo thleng e! Hlenin a awm ngei ang,” tih hi Lalpa PATHIAN thuchhuak a ni. “Hemi ni hi a ni, ka lo sawi tawh kha.

⁹Tichuan, Israel khawpuia chêngte chu an chhuak ang a, hriamhreite chu an tuah ang a, a kâng ral ang; phaw lian leh phaw tête, thal leh a ngulte, fei leh tiang zumte chu kum sarih chhûng an tuah ang.

¹⁰Ram thing an phur lo vang a, ngaw thingte an kit hek lo vang, hriamhreite chu thingtuah atân an hmang dâwn si a; râllâka latute chu râllâka lâk an ni ve ang a, a rawktute chu an rawk ve thung ang,” tih hi Lalpa PATHIAN thuchhuak a ni.

¹¹“Tin, chumi niah chuan heti hi a ni ang a, Goga tân Israel ramah phûmna hmun ka ruat ang a, tuipui chhak, Abarim ruam ngei chu; chu chuan khualzinte chu a dang ang, Goga leh a hote chu an phûm dâwn avângin. Tichuan, chu ruam chu Hamon-gog ruam an vuah ang.

¹²Tin, Israel chhûngte chuan an ram thian faiin thla sarih chhûng an phûm ang.

¹³A ni, rama mi zawng zawngin an phûm ang, chawimawia ka awm ni chu an tân hmingthanna a ni ang,” tih hi Lalpa PATHIAN thuchhuak a ni.

¹⁴“Tin, an ram then fai nân, ruang phûm lohte zawng chhuaka phûm tûrin hnaa nei tûr mi an ruat hran ang, thla sarih tâwp hnuah an zawng ṭan ang.

¹⁵Ram fangtute chuan an fanin, mihring ruhte an hmuh chuan chhinchhiahna an siam ang a, Hamon-gog ruama phûmtuten an phûm hma chu.

¹⁶Tin, Hamona chu khawpui hming a ni ang. Chutiang chuan ram an thian fai ang.”

¹⁷“Tin, nang, mihring fapa, Lalpa PATHIAN chuan heti hian a ti a ni: ‘Sava chi tinrêngte leh sa tinrêngte hnênah thu sawi la, “Pung khâwm ula, lo kal rawh u, sa in eia thisen in in theih nân Israel tlânga inthawina ropui tak, in tâna ka siam vêlah chuan rawn inkhâwm rawh u.

¹⁸Mi ropui sate in ei ang a, leia hotute thisen in in ang a, berâmpate, berâmnote, kêlte, Basan rama bâwngpa châwm thau zawng zawngte thisen nên.

¹⁹In tâna inthawina ruai ka ṭheh thau chu puar ṭeuhvin in ei ang a, a thisen chu rui khawpin in in ang.

²⁰Tichuan, sakawrte, tawlailîr hnûk mite, mi ropuite leh râl tu mi zawngtein ka chawhluiah in tlai ang,” tih hi Lalpa PATHIAN thuchhuak a ni.

²¹“ ‘Tichuan, hnamte zîngah chuan ka ropuina ka dah ang a, hnam zawng zawngte chuan ka thurêl tihtlûk tawhte leh, an chunga ka kutthlâkte chu an hmu ang.

²²Chumi ni achinah chuan Israel chhûngten kei hi LALPA an Pathian chu ka ni tih an hre tawh ang.

²³Tin, hnamte chuan Israel chhûngte chu an khawlohna avângin an tâng a ni tih an hria ang; ka laka an rinawm loh êm avângin anmahni lakah ka hmêl ka thup a; tichuan, an hmêlmate kutah ka pe a, khandaihin an tlu ta vek a.

²⁴An thianghlim lohna ang zêl leh an bawhchhiatna ang zêlin an chungah ka ti ve a, an lakah ka hmêl ka thup a ni.’ ”

²⁵“Chuvângin, Lalpa PATHIAN chuan heti hian a ti a ni: ‘Tûnah chuan Jakob-ho awm dân ka let ang a, Israel chhûngkaw pum pui chungah zah ka ngai ang, ka hming thianghlim chu ka humhalh tlat ang.

²⁶Tu mah tihlautu awm lova an rama him taka an chên hunah pawh an bawhchhiatna zawng zawng, ka chunga an bawhchhiatte leh an mualphona chu an phur ang.

²⁷Mite zîng ata ka hruai chhuah leha, an hmêlmate ram ata dah khâwma, anmahnia hnam tam takte mit hmuha tihthianghlima ka awm hunah chuan,

²⁸hnamte zînga sala ka tântîra, an ram ngeia ka hruai khâwm leh dânah kei hi LALPA an Pathian ka ni tih an hria ang; chutah chuan an zînga pakhat mah ka hnutchhiah lo vang.

²⁹An lakah ka hmêl ka thup tawh lo vang, Israel chhûngte chungah ka thlarau ka leih tawh si a,’ tih hi Lalpa PATHIAN thuchhuak a ni,” tiin.