Read Mizo_Old_version Ezekiela 4 Bible Online

Ezekiela 4 - Mizo_Old_version bible

Ezekiela 4

¹“Nang mihring fapa, leirawhchan phêk la la, i hmaah dah la, chumiah chuan khawpui, Jerusalem khawpui lem ziak rawh.

²A vêla hualin kulh siam hnan la, mual pâwng siam hnan rawh, sipai riahbûkte siam hnan la, kulh sut chhiatnate a vêlin siam hnan rawh.

³Tin, nangin thîr phêk la la, nangmah leh khawpui inkârah chuan thîr bang atân chhawng rawh; chu lam chu hmachhawn la, hualin a awm ang a, nangman i hual tûr a ni. Hei hi Israel chhûngte tân entîr lâwkna a ni ang.

⁴“Tin, nang chu vei lam delhin mu la, i chungah Israel chhûngte khawlohna nghat rawh.

⁵An khawlohna tuarin ni zathum leh ni sawmkaw chhûng mu rawh. Kum khat hrem an tuar aiah ni khat zêl i tuar dâwn a ni.

⁶Chumi zawhah inlet la, i ding lam delhin mu leh rawh; Juda chhûngte khawlohna chu ni sawmli i tuar leh tûr a ni, hrem an tuar tûr kum khat zêlah ni khat.

⁷Bân hlîm têl tâwlin Jerusalem hual lam kha hawi la, a chung thu sawi chhuak rawh.

⁸Tin, ngai teh, hruizênin ka hlîng che a, i hual ni i tlingtlâk hma loh chuan khawi lamah mah i inher tûr a ni lo ve.

⁹Buh te, barli te, bê te, dailuah te, buhtun te, vaibuhtun te la la, bêl pakhatah dah la, chhangah siam rawh; i pangkhing delha i mut chhûng zawng, ni zathum leh sawmkaw chhûng chuan chu chu i ei tûr a ni.

¹⁰I chaw ei tûr chu teh vek tûr a ni a, ni khatah sekel sawmhnih a ni tûr a ni; hunbi nei takin i ei tûr a ni.

¹¹Tin, tui te pawh teh vekin i in tûr a ni a, hin khat hmun ruka ṭhena hmun khat a ni tûr a ni; hunbi nei takin i in tûr a ni.

¹²Tin, an mit hmuh ngeiah mihring êk rovin i ur ang a, barli chhang eiin i ei tûr a ni,” a ti a.

¹³Tin, LALPA chuan, “Hetiang chaw bawlhhlawh hi Israel fate chuan ka hnawh bona tûr hnamte zîngah chuan an ei ang,” a ti a.

¹⁴Tah chuan kei chuan, “A! Lalpa PATHIAN, ngawi teh, ka nun chu tihbawlhhlawh a ni ngai lo va, ka tleirâwl tirh ata tûn thleng pawhin, amaha thi emaw, ramsa seh emaw chu ka la ei ngai si lo va, sa tenawm ka kâah a lût ngai bawk hek lo,” ka ti a.

¹⁵Tah chuan ani chuan ka hnênah, “Hei le, mihring êk aiah bâwng êk ka pe chia, i ei tûr chu hêng hian i siam tûr a ni,” a ti a.

¹⁶Chu lo pawh chu ka hnênah, ani chuan, “Mihring fapa, ngai teh, Jerusalem-ah chuan chaw, nunna bul chu ka tichhia ang a, an chaw chu teh vekin fîmkhur takin an ei ang; tui pawh teh vekin lunghnûr takin an in ang;

¹⁷chaw te, tui te an tlâkchhama, an inlungtena, an khawlohnaa an rîral zawh nân.