Read Mizo_Old_version Ezekiela 40 Bible Online

Ezekiela 40 - Mizo_Old_version bible

Ezekiela 40

¹Kan sal tân kum sawmhnih leh pangana, chumi kum bul thla ni sâwmna, khawpui chhiat hnu kum sâwm leh palina, chumi ni ngeiah chuan LALPA kut chu ka chungah a lo awm a, chutah chuan mi hruai a.

²Pathian inlârnaah chuan Israel ramah mi hruai a, tlâng sâng takah mi dah a, chumi chhim lamah chuan khawpui din tawh ang mai a awm a.

³Chutah chuan mi hruai a, ngai teh, mi pakhat a lo awm a, a hmêl lan dân chu dâr ang mai a ni a, la zai leh tehna tiang a keng a, kawngkaah chuan a ding a.

⁴Tin, mi chuan ka hnênah, “Mihring fapa, i mit khân en la, i beng chhi la, ka entîr tûr che lamah i rilru nghat tlat tawh; chu ka thil entîr tûr che atân chuan hetah hian rawn hruai i ni si a. I hmuh zawng zawngte chu Israel chhûngte hnênah chuan puang ang che,” a ti a.

⁵Tin, ngai teh, in vêlah chuan kulh bang a lo awm a; tin, mi chuan tehna tiang, tawng ruka sei a keng a, a tawng khat chu tawng khat leh kutphah bêng ṭheuh a ni; tin, kulh bang chhah lam chu a teh a, tiang tlûk khat a ni a, a sân lam pawh tiang tlûk khat a ni bawk.

⁶Tichuan, chhak lam chhawng kawngka inah a lo kal a, a rahkaah chuan a chho va; tin, kawngka in luhna pindan chu a teh a, tiang tlûk khata zau a ni.

⁷Tin, vênna pindante chu a dung lam tiang tlûk khat, a vâng lam tiang tlûk khat ṭheuh a ni; vênna pindan inkâr chu tawng nga ṭheuh a ni a; tin, in pui lam kawngka in, sumhmun lama kawngka in, luhna pindan chu tiang tlûk khat a ni a.

⁸In pui lam sumhmun pawh chu a teh a, tawng riat a ni.

⁹A bangpêngte chu tawng hnih ṭheuh a ni a, kawngka sumhmun chu in pui lamah a ni.

¹⁰Tin, chhak lam kawngka ina vênna pindante chu lehlam lehlamah pathum ve ve a ni a, a pathum chuan a intiat vek a ni; tin, bangpêngte pawh kha a lehlam lehlama mi chu a intiat a ni.

¹¹Tin, kawngka in luhna vâng lam chu a teh a, tawng sâwm a ni a; kawngka in kal tlangna vâng lam chu tawng sâwm leh pathum a ni.

¹²Tin, vênna pindan hmaah chuan daidanna lehlam lehlamah tawng khata chhah ve ve a awm a; tichuan, vênna pindante chu lehlam lehlamah tawng ruk ve ve a ni.

¹³Tin, kawngka in chu a teh a, vênna pindan pakhat chung aṭanga a lehlam chung thleng chuan tawng sawmhnih leh tawng ngaa zau a ni, kawngkhâr leh kawngkhâr inzawm ṭheuhvin.

¹⁴Tin, sumhmun pawh chu a teh a, tawng sawmruk a ni a; kawngka in sumhmun pâwn chu hung chhûng chu a ni a.

¹⁵Tin, kawngka in pâwnta ber aṭanga kawngka in sumhmun chhûngril ber thleng chuan tawng sawmnga a ni.

¹⁶Tin, kawngka in chhûng lamah chuan a vêlin pindanahte chuan tukverh hawn theih loh a awm a, a inkâra banahte pawh; a sumhmunahte pawh, a chhûng lamah pawh a vêlin tukverh a awm a, a banahte chuan tûm thing lem a awm ṭheuh bawk a.

¹⁷Tin, hung chhûng pâwnta zâwkah chuan mi hruai a; tin, ngai teh, pindante a awm a, hung chhûng chu a vêlin lung rem a ni a; tin, lungremah chuan pindan sawmthum a awm a.

¹⁸Tin, lungrem chu kawngka in aṭanga rem a ni a, kawngka in chen bawk tûra rem a ni a, chu chu lungrem hnuaihnung zâwk a ni.

¹⁹Tichuan, kawngka in hnuai zâwk zâwn aṭang chuan hung chhûngnung zâwk pâwn lam thleng chuan a teh a, a zauzia chu tawng za a ni, a chhak lam leh a hmâr lam pawh.

²⁰Tin, hung chhûng pâwnta zâwk kawngka in hmâr lampanga mi chu a dung leh a vâng pawh a teh a.

²¹Tin, vênna pindante chu lehlam lehlamah pathum ve ve a awm a, a bangpêngte leh a kawngka in sumhmunte pawh a hmasa ang vek a ni; a dung chu tawng sawmnga a ni a, a vâng chu tawng sawmhnih leh tawng nga.

²²A tukverhte, a sumhmuntea tûm thing lemte chu chhak lam kawngka ina mi ang vek a ni; rahka pasarih a awm chho va, a sumhmun chu a chhûng lamah a awm a.

²³Hung chhûngnung zâwk luhna tûr kawngka in chu kawngka in dang zâwnah khân a awm zêl a, hmâr lamah leh chhak lamah pawh; tin, kawngka in leh kawngka in inkâr chu a teh a, tawng za a ni.

²⁴Tin, chhim lamah mi hruai leh a; tin, ngai teh, chhim lam kawngka in chu a lo awm a; tin, a teh dân pângngaiin a bangpêngte leh a sumhmun chu a teh a.

²⁵Chutah chuan a dangte ang bawkin a vêlin tukverhte a awm a, a sumhmunah pawh; a dung chu tawng sawmnga a ni a, a vâng lam chu tawng sawmhnih a ni.

²⁶Tin, rahka pasarih a awm chho va, sumhmun chu a chhûng lamah a awm a; tin, lehlam lehlamah bangpêngahte chuan tûm thing lem a awm zêl a.

²⁷Tin, chhim lamah chuan hung chhûngnung luhna tûr kawngka in a awm a, chhim lam kawngka inte inkâr chu a teh a, tawng za a ni.

²⁸Tin, chhim lam kawngka ina hung chhûngnung zâwkah chuan mi hruai lût a, tehna pângngaiin chhim lam kawngka in chu a teh a;

²⁹vênna pindante, a bangpêngte, sumhmunte chu tehna ngai vekin; chutah chuan tukverhte a awm a, a sumhmunah pawh a vêlin; a dung lam tawng sawmnga a ni a, a vâng lam tawng sawmhnih leh tawng nga.

³⁰Tin, a vêlah chuan sumhmunte a awm a, a dung lam tawng sawmhnih leh tawng nga, a vâng lam tawng nga a ni.

³¹A sumhmunte chuan hung chhûng pâwnta zâwk lam a hawi a; a bangpêngahte chuan tûm thing lem a awm a; a chhohna chuan rahka pariat a nei a.

³²Tin, chhak lamah chuan hung chhûngnung zâwkah mi hruai a, a tehna pângngaiin kawngka in chu a teh a;

³³a vênna pindante, a bangpêngte, a sumhmunte tehna ngai vekin; chutah chuan tukverhte a awm a, sumhmunah pawh a vêlin; a dung lam chu tawng sawmnga a ni a, a vâng lam chu tawng sawmhnih leh tawng nga.

³⁴A sumhmunte chuan hung chhûng pâwnta zâwk lam a hawi a, a bangpêngahte chuan lehlam lehlamah tûm thing lem a awm a; a chhohna chuan rahka pariat a nei a.

³⁵Tin, hmâr lam kawngka inah chuan mi hruai leh a, a tehna pângngaiin a teh a:

³⁶a vênna pindante, a bangpêngte, a sumhmunte. Chutah chuan a vêlin tukverhte a awm a; a dung lam tawng sawmnga a ni a, a vang lam tawng sawmhnih leh tawng nga.

³⁷A bangpêngte chu hung chhûng pâwnta zâwk lamah a awm a; a bangpêngahte chuan tûm kûng lem a inziak a, a chhohna chuan rahka pariat a nei a.

³⁸Kawngka in sumhmun aṭanga luh theihin pindan a awm a, chutah chuan hâlral inthawina tûr an sil ṭhîn a.

³⁹Kawngka in sumhmun lehlam lehlamah chuan dawhkân pahnih ve ve a awm a; hâlral inthawina te, sual vânga inthawina te, thiam loh vânga thil hlante talhna tûrin.

⁴⁰Hmâr lam kawngka in luh chhohna pâwn lam sîr khatah chuan dawhkân pahnih a awm a; tin, kawngka in sumhmun lehlamah pawh chuan dawhkân pahnih a awm bawk a.

⁴¹Tichuan, kawngka in sîr lehlampangah chuan dawhkân pali a awm a, a lehlampangah dawhkân pali a awm bawk a; inthawina talhna ṭhin chu dawhkân pariat a ni a.

⁴²Tin, hâlral inthawina atân dawhkân pali, lung chhera siam, a dung lam tawng khat leh a chanve, a vâng lam tawng khat leh a chanve, a sân lam tawng khat a awm a; chutah chuan hâlral inthawina leh thil hlan talhna tûr hriamhreite an dah ṭhîn a.

⁴³Tin, a chhûng lamah chuan a vêlin thil kawm, kutphah bênga sei an vuah a, dawhkân chungahte chuan thil hlante sa a awm a.

⁴⁴Tin, hung chhûngnung zâwkah chuan mi hruai lût a; tin, ngai teh, hung chhûngnung zâwkah chuan pindan pahnih a la awm a, pakhat chu hmâr lam kawngka in bulah, chhim lam hawiin a awm a, pakhat chu chhim lam kawngka in bulah hmâr lam hawiin a awm a.

⁴⁵Tin, ani chuan ka hnênah, “He pindan chhim lam hawi hi, a in vawngtu puithiamte awmna a ni a;

⁴⁶pindan hmâr lam hawi chu maichâm vawngtu puithiamte awmna a ni; hêngte hi Zadoka fate, Levia fate zînga a rawngbâwl tûra LALPA rawn hnaih ṭhîntute chu an ni,” a ti a.

⁴⁷Tin, hung chhûng chu a teh a, a dung lam tawng za, a vâng lam tawng za, inbial vêl a ni; tin, maichâm chu kawtlai takah chuan a awm a.

⁴⁸Tin, a in pui sumhmunah chuan mi hruai ta a, sumhmun bangpêngte chu a teh ṭheuh va, a lehlam lehlamah tawng ngaa chhah ve ve a awm a, a luhna chu tawng sâwm leh tawng lia zau a ni, a sîr tuaka kawngka bangpêngte chu tawng thum ve ve a ni.

⁴⁹A sumhmun chu a dung lam tawng sawmhnih, a vâng lam tawng sâwm leh tawng hnih a ni a, luh chhohnaah chuan rahka sâwm a awm a, bangpêng bulah a lehlam lehlamah chuan ban lian a awm a.