Read Mizo_Old_version Ezekiela 41 Bible Online

Ezekiela 41 - Mizo_Old_version bible

Ezekiela 41

¹Tin, biak inah chuan mi hruai lût a, a bangpêngte chu a teh a, a sîr tuakah tawng ruka chhah ve ve a awm a, chu chu biakbûk vâng lam chen a ni.

²Tin, a luhna chu tawng sâwma zau a ni a, a sîr tuakah bangpêngte chu tawng nga ve ve a ni a; tin, a chhûng chu a dung tawng sawmli, a vâng tawng sawmhnih a ni a.

³Tin, pindan chhûngnungah chuan a lût a, a luhna bangpêngte chu tawng hniha chhah ve ve a ni a, a luhna chu tawng ruka zau a ni a, a luhna bangpêngte chu tawng sarih ve ve a ni a.

⁴Tin, pindan chhûngnung chu a teh a, a chhûngpui bâkah a dung lam chu tawng sawmhnih a ni a, a vâng lam pawh tawng sawmhnih a ni; tin, ka hnênah, “Hei hi hmun serh ber chu a ni,” a ti a.

⁵Tin, a in pui bang chu a teh a, tawng ruka chhah a ni a; tin, a sîr tinah chuan pindan tawng lia zau ṭheuh a awm a.

⁶A vêla a sîr pindante tâna bang an siam chu rinchhanin, a in pui chu rinchhan lovin, in pui bang nghêng lovin chu lam chu a nghêng zâwk a.

⁷Tin, a sîr pindante chu a lo sâng deuh deuhvin a zau deuh deuh zêl a; a bangte chu a zuih chhoh zêl avângin, a in vêlin a chhûngpui kha a hnaih deuh deuh zêl a ni. Tichuan, pindan hnuai ber aṭanga a chung ber thlenga kal tûrin a laita chu kal tlang tûr a ni.

⁸Tin, in pui vêlah chuan lungrem pâwng awmin ka hmu a, sîr pindan lungphûm chu tehna tiang, tawng ruk zet chena sâng a ni.

⁹Sir pindan pâwn bang chu tawng ngaa chhah a ni; sîr pindan pâwn bang bâkah chuan tawng nga a la âwl a.

¹⁰In pui lungrem pâwng leh hung chhûng pindante inkâr chu a vêlin tawng sawmhniha zau a ni a.

¹¹Sîr pindan kawngkhârte chu hmun âwl lama hawn a ni a, pakhat chu hmâr lam hawi a ni a, pakhat chu chhim lam hawi a ni; a vêla hmun âwl chu tawng ngaa zau a ni.

¹²Tin, thlang lama in pui kawmchâr hmun âwl piaha in chu tawng sawmsariha zau a ni; chu in bang chu a vêlin tawng ngaa chhah vek a ni a, a dung chu tawng sawmkua a ni.

¹³Tin, in pui chu a tehin tawng zaa sei a ni; in pui kawmchâr hmun âwl leh chumi in bang chhah lam chhiar telin tawng za a ni bawk;

¹⁴a in pui kawt hmun âwl chu tawng zaa zau a ni.

¹⁵Tin, in pui kawmchâr hmun âwl piaha in dung lam chu a teh a, a sîr tawna bangte huamin tawng za a ni.

¹⁶Tin, a chhûngpui te, hmun serh ber te, pâwn lam sumhmun te chu thingphelin an thuah a, a pathum chuan a vêlin hawn theih loh tukverh leh chhawrvêl a nei a, a in pui chu luhna kawngka thlengin a chhuat aṭanga tukverh thlenga a puma thingphela thuah a ni a (tukverh pawh chu thuah a ni bawk).

¹⁷Kawngka lu chung te, pindan serh ber te leh a pâwn lam nên, bang zawng zawng chu a chhûng lam leh a pâwn lam teh vekin.

¹⁸Chûng chu cherub lemte leh tûm thing lemtea chei a ni a, cherub leh cherub inkârah tûm thing a awm zêl a; tin, cherub chuan hmai pahnih an nei ṭheuh va:

¹⁹mihring hmêl ang chuan lehlama tûm thing lam chu a hawi a, sakeibakneituai hmêl ang chuan lehlama tûm thing lam chu a hawi bawk a. Hêng hi in pum pui vêlah chuan an ziak a ni.

²⁰A chhuat aṭangin kawngka chung thlengin cherub leh tûm thing lema chei vek a ni; in pui bang chu chuti vek chu a ni.

²¹Chhûngpui kawngkabiangte chu a inbial a ni a, Hmun Thianghlim Ber hmaa mi nên a inang a.

²²Chutah chuan thinga siam maichâm a awm a, tawng thuma sâng, tawng hniha sei, tawng hniha zau a ni. A kil te, a mawng te leh a pang te chu thinga siam vek a ni; tin, ani chuan ka hnênah, “Hei hi LALPA hmaa dawhkân chu a nih hi,” a ti a.

²³A chhûngpui leh Hmun Thianghlim Ber chuan kawngkhâr pahnih ve ve a nei a.

²⁴Kawngkhâr chuan phel hnih a nei ve ve a, a phel khat chu a thlep thei ṭheuh a ni; kawngkhâr pakhatah phel hnih, a dangah phel hnih bawk.

²⁵Banga an ziak ang bawk khân chhûngpui kawngkhârahte chuan cherub leh tûm thing lem an ziak ṭheuh bawk a; sumhmun pâwnah chuan thingphel chhah tak tak an zâr a.

²⁶Tin, sumhmun bang tuakahte leh thingphel zârahte chuan, tukverh hawn theih loh leh tûm thing lem chu a awm bawk a, a in pui sîr pindan leh thingphel zâr chu chutiang bawk chu a ni.