Read Mizo_Old_version Ezekiela 42 Bible Online

Ezekiela 42 - Mizo_Old_version bible

Ezekiela 42

¹Tin, hung chhûngnung zâwk hmâr lampangah chuan mi hruai chhuak a; hmun âwl zâwn hmâr lam kulh ban eptu pindanah chuan mi hruai lût a.

²Tin, hmâr lampanga pindante chu tawng zaa sei, tawng sawmngaa zau a ni a.

³Hung chhûngnung zâwk hmun âwl tawng sawmhnih lam hawi leh, hung pâwnta zâwk lungrem lam epin chhawrvêl chhâwng thum a awm ve ve a.

⁴Pindante inkârah chuan tawng sâwma zau, tawng zaa sei kal tlangna a awm a, a kawngkhârte chuan hmâr lam a hawi a.

⁵Pindan chungnungte chu a zîm zâwk a, in chhâwng hnuai zâwk leh a laitate ai chuan a chhawrvêlte chuan a la hek zâwk si a.

⁶Chhâwng thumin sak a ni a, hung chhûng bante ang chuan ban a nei si lo va; tichuan, a laita ai chuan a chungnung ber chu a chêp a, a laita pawh chu a hnuaihnung ber ai chuan a chêp bawk a.

⁷Tin, pindan sîr pâwn lamah chuan, hung chhûng pâwnta zâwk lam epah bang tawng sawmngaa sei a awm a.

⁸Hung chhûng pâwnta zâwka pindante chu tawng sawmngaa sei a ni si a; tin, in pui hrûla mi chu tawng zaa sei a ni.

⁹Tin, chûng pindan hnuaiahte chuan chhak lampangah, hung chhûng pâwnta zâwk aṭanga luhna a awm a, pâwn lam bang inṭannaah chuan.

¹⁰Chhim lamah pawh chuan hmun âwl zâwna kulh bang epah chuan pindante a awm leh a,

¹¹a hmaa kalna pawh chu hmâr lam pindante kalna ang bawk a ni, a dung leh a vângte pawh, a chhuahna te, a rem vêl dân te, a kawngkhârten chhim lam a hawi tih chauh lo chu thuhmun vek a ni.

¹²Chûng pindante luh nân chuan kal tlangna tâwp chhak lam bang bulah chuan kawngkhâr a awm a.

¹³Tin, ani chuan ka hnênah, “Chhim lam leh hmâr lam pindan, hmun âwl rawn chhawngtute hi pindan serh an ni a, LALPA rawn hnaihtu puithiamhoten thil serh berte an eia, thil serh berte an dah khâwma, ei tûr hlanna te, sual vânga inthawina te, thiam loh vânga inthawina te an hlanna tûr a ni; a hmun chu hmun serh a ni si a.

¹⁴Chuta puithiamte an luh phawt chuan, hmun serh aṭangin hung chhûng pâwnta zâwkah chuan an chhuak tûr a ni lo; chutah chuan an rawngbâwlna silhfênte chu an dah zâwk ang, silhfên serh a ni si a; silhfên dang inbel chauhvin vântlâng zîngah an che thei ang,” a ti a.

¹⁵In pui chhûngnung zâwk a teh zawh chuan, chhak lam hawi kawngkaah chuan mi hruai chhuak a, a vêlin a teh ta a.

¹⁶Tehna tiang chuan chhak lampang chu a teh a, tawng zanga a ni a; a tehna tianga tehin.

¹⁷Hmâr lampang a rawn teh leh thung a, tawng zanga a ni a, a tehna tianga tehin.

¹⁸Chhim lampang a teh leh a, tehna tianga tehin tawng zanga bawk a ni.

¹⁹Tin, thlang lam a rawn teh leh a, a tehna tianga tehin tawng zanga bawk a ni.

²⁰A sîr li chuan a teh a; a dung lam tawng zanga, a vâng lam tawng zanga a ni a, a vêlin kulh bang nei a ni a, chu chu hmun serh leh serh loh daidanna tûra siam a ni.