Read Mizo_Old_version Ezekiela 43 Bible Online

Ezekiela 43 - Mizo_Old_version bible

Ezekiela 43

¹Tichuan, kawngkaah mi hruai a, chhak lam kawngkaah chuan.

²Tin, ngai teh, Israel Pathian ropuina chu chhak lam aṭangin a lo thleng a. A thâwm chu tui tam tak ri ang a ni a, lei chu a ropuinain a ên vek a.

³Inlârna ka hmuha a lan dân chu, khawpui tichhe tûra a lo kal leh Kebar lui kama inlârna ka hmuh ang bawk a ni a; tin, bawkkhupin ka tlu ta a.

⁴Tin, khawchhak lam hawi kawngkaah chuan a in pui chhûngah LALPA ropuina a lo lût a;

⁵tin, Thlarau chuan mi chawi kâng a, hung chhûngnung zâwkah chuan mi hruai lût a; tin, ngai teh, LALPA ropuina chuan a in chu a tikhat ta vek a.

⁶Tin, mi pakhat ka kianga a din laiin mi tuin emaw mi biain ka hria a.

⁷Ka hnênah, “Mihring fapa, hei hi ka lalṭhutthlêng awmna hmun, ka kephah nghahna, Israel fate zînga kumkhuaa ka chênna tûr hmun a nih hi. Ka hming thianghlim chu Israela chhûngten anmahniin emaw, an lalten emaw, an hurna leh an lalte ruang phûm nân hmangin an tibawrhbâng tawh lo vang.

⁸An kawngka chu ka kawngka bul taka siamin, an kawngkabiang chu ka kawngkabiang hrûla dahin, anmahni leh keima inkârah bang chauh awmtîrin an thiltih tenawmte chuan ka hming thianghlim chu an tibawrhbâng a; chuvângin, ka thinurnain anmahni chu ka tiboral ta a ni.

⁹Tûn aṭang hian an hurnate, an lal ruangte chu ka lak aṭanga hla takah dah bo sela; tin, an zîngah kumkhuain ka chêng ang.

¹⁰“Tin, nang mihring fapa, a in pui lem chu Israel chhûngte hnênah entîr rawh, an thil tihsual chu an zahpui theih nân, a ruahman dân pawh lo teh rawh se.

¹¹Tin, an thiltih zawng zawngte an zahpui chuan a in pui awm dân te, a chhuahna te, a luhna te, a rîruang te, a hman dân te, a vawn dân te entîr la, an mit hmuh ngeiah ziak rawh; a dân pum pui leh a hman dân zawng zawng an vawna, an zawm theih nân.

¹²Hei hi a in pui tâna dân tûr chu a ni: tlâng chhîp chung zâwl vêl zawng zawng chu hmun serh theihtâwp tûr a ni; ngai teh, hei hi in pui tâna dân chu a ni e.

¹³“Tin, tawnga tehin hei hi maichâm len lam chu a ni (tawng khat tih chu tawng khat leh kutphah bêng a ni), a nghahchhan chu tawng khata sâng, tawng khata hlai, a tlâng chu a vêla khâp khata pâwng zêl a ni a.

¹⁴Tin, maichâm sân lam chu hetiang hi a ni: leia a nghahchhan aṭanga a chhawrdawh hnuaihnung zâwk chu tawng hnih a ni a, a zau lam tawng khat; a chhawrdawh tê zâwk aṭanga a chhawrdawh lian zâwk chu tawng li a ni a, tawng khata zau a ni.

¹⁵A maichâm chung zâwl chu tawng lia sâng a ni leh a, maichâm chung zâwl aṭang chuan ki pali a ding a.

¹⁶Maichâm chung zâwl chu a dung leh a vâng tawng sâwm leh tawng hnih ve ve a ni a, a inbial a ni.

¹⁷A chhawrdawh chu a dung leh a vâng tawng sawm leh tawng li ve ve a ni a, a inbial a, a tlâng chu tawng chanve a ni; a nghahchhan chu a vêlin tawng khat a ni; a kailâwn chuan khawchhak a hawi a ni,” a ti a.

¹⁸Tin, ka hnênah, “Mihring fapa, Lalpa PATHIAN chuan heti hian a ti a ni: ‘An siam zawh huna maichâm hman dân tûr chu hetiang hi a ni: hâlral inthawina tûr te, thisen thehna tûr te a ni.

¹⁹Levia chi puithiam Zadoka thlaha mi, rawng mi bâwl tûra mi rawn hnaih ṭhîntu hnênah chuan, sual vânga inthawina atân bâwngpatuai i pe tûr a ni,’ tih hi Lalpa PATHIAN thuchhuak a ni.

²⁰‘A thisen chu i la ang a, maichâm kî palite leh a chhawrdawh kil lite a tlâng vêlin i luan ang a; chutiang chuan maichâm chu i tlêngin i thian dâwn nia.

²¹Sual vânga inthawina bâwngpatuai chu i la ang a, hmun thianghlim pâwn lama, chumi atâna in ruatah chuan hâl tûr a ni.

²²Tin, a ni hnihnaah chuan kêlchal, hmêlhem lo, sual vânga inthawina atân hlan tûr a ni; tichuan, maichâm chu bâwngpatuaia an then ang bawk khân then tûr a ni.

²³Maichâm then chu in tih zawh hunah bâwngpatuai hmêlhem lo leh, berâmchal hmêlhem lo, a rual zînga mi i hlân dâwn nia.

²⁴LALPA hmaah i hlân ang a, puithiam chuan chi a phul ang a, LALPA hnênah hâl ral atân a hlân ang.

²⁵Ni sarih chhûng chu ni tin sual vânga inthawina atân kêlchal i hmang tûr a ni; bâwngpatuai leh berâmchal, a rual zînga mi, hmêlhem lo an hmang bawk tûr a ni.

²⁶Maichâm then leh tlen faina chuan ni sarih a awh ang a; tichuan, maichâm chu serh a ni tawh ang.

²⁷Tin, chûng nite an tlingtlâk zawh chuan, a ni riat ni aṭangin puithiamten in hâlral inthawinate leh remna inthawinate an maichâmah an hlân ang a; tin, ka lo pawm ang che u,’ tih hi Lalpa PATHIAN thuchhuak a ni,” a ti a.