Read Mizo_Old_version Ezekiela 44 Bible Online

Ezekiela 44 - Mizo_Old_version bible

Ezekiela 44

¹Tin, hmun thianghlim kawngka pâwnta zâwk, khawchhak lam hawi lamah chuan mi hruai lêt a, khâr a lo ni a.

²Tin, LALPA chuan ka hnênah, “He kawngka hi a inkhâr reng ang; a inhawng lo vang a, tu mah an lût hek lo vang! LALPA, Israel Pathian chu a lo luh tawh avângin a inkhâr reng dâwn a ni.

³Lal erawh zawng LALPA hmaa chaw ei tûrin chutah chuan a ṭhu chauh vang; sumhmun kawngkaah a lût ang a, chumiah vêk chuan a chhuak leh ang,” a ti a.

⁴Tin, hmâr lam hawi kawngkaah chuan in pui kawtah mi hruai a; tin, ka han en a, ngai teh, LALPA in chu LALPA ropuinain a khat vek mai a; tin, bawkkhupin ka tlu ta a.

⁵Tin, LALPA chuan ka hnênah, “Mihring fapa, LALPA in hman dân leh a dân zawng zawng i hnêna ka sawi chungchângah chuan i beng chhi la, i mit lên la, i rilruah chhinchhiah ṭha tê rawh khai! A in pui luh dân te, a hmun thianghlim ata chhuah dân te chu i rilruah chhinchhiah ngun ang che.

⁶Tin, hel hmang, Israel chhûngte ngei hnênah chuan heti hian i sawi tûr a ni: Lalpa PATHIAN chuan heti hian a ti a ni: Aw, nangni Israel chhûngte u, in tenawmna zawng zawng belhchhah tûra awze mi, thinlung leh tîsa serh tan loh - ka chhang te, thau te, thisen te in hlan laia ka hmun thianghlim, ka in ngei tibawrhbâng tûra in hruai luha, ka thuthlung in bawhchhiatah khân in tenawmna zawng zawng chu lo tâwp tawh rawh se.

⁸Tin, ka thil serhte nangnin in vawng lo va, hêng awze mite hi ka hmun thianghlimah in aia vawngtuah in ruat ta zâwk a.

⁹Lalpa PATHIAN chuan heti hian a ti a ni: Awze mi tu mah, thinlung leh tîsa serh tan loh chu, Israel fate zînga chêng pawh ni se, ka hmun thianghlimah an lût tûr a ni lo.

¹⁰“Levia chi, Israel-te milim ûma an vah bo laia ka laka hla taka kal tawhte erawh chuan an khawlohna an phur ang.

¹¹Ka hmun thianghlimah chuan rawngbâwltuah an ṭang ang a, in pui kawngkhârte an vêng ang a, in pui chhûngah chuan rawng an bâwl ang; hâlral inthawinate leh mipui tâna inthawinate an talh ang a, mipui rawngbâwlsak tûrin an hmaah an ding ang.

¹²An milimte hmaah an rawng an bâwlsak a, Israel chhûngte tân khawlohnaa tlûkna an nih ṭhin avângin an chungah ka kut ka lek a, an khawlohna chu an phur ngei ang, tih hi Lalpa PATHIAN thuchhuak a ni.

¹³Tichuan, ka hnênah puithiam hna thawk tûrin min rawn hnaih ngai lo vang a, ka thil serhte, thil serh berte an rawn hnaih ngai hek lo vang; an mualphona leh an thil tenawm tih tâkte chu an phur zâwk ang.

¹⁴A in pui enkawltuahte ka siam ang a, rawngbâwlna zawng zawng leh tih tûr awm apiangte ti tûrin.

¹⁵“Puithiam Levia chi, Zadoka fa, ka laka Israel fate an vah bo laia ka hmun thianghlim vawngtute erawh chuan ka rawngbâwl tûrin min rawn hnaih chauh vang; thau leh thisen hlân tûrin ka hmaah an ding ang, tih hi Lalpa PATHIAN thuchhuak a ni.

¹⁶Ka hmun thianghlimah chuan an lût ang a, rawng mi bâwlsak tûrin ka dawhkân an rawn hnaih ang a, mi enkawltuah an ṭang ang.

¹⁷Tin, hung chhûngnung zâwk kawngkaahte an luhin kawrfual zai sînin an inthuam ang a; hung chhûngnung zâwk leh in chhûng lama rawng an bâwl chhûngin sahmul puan an inbel tûr a ni lo.

¹⁸“Diar zai sîn an khim ang a, puan zai sîn kekawr an ha ang a, thlan tisa thei rêng rêng chu an inbel tûr a ni lo.

¹⁹Tin, hung chhûng pâwnta zâwk, vântlâng hnêna an lo chhuah chuan an rawngbâwlna silhfênte chu an hlîp ang a, pindan serhah chuan an dah ang a, silhfên dang an inbel ang; mipuite chu an silhfênin mi serhah a siam ve loh nân.

²⁰An lute an ziat kawlh tûr a ni lo va, an sam an zuah sei tûr a ni hek lo, an mêt chauh tûr a ni.

²¹Puithiam chuan hung chhûngnung zâwk an luh chuan uain an in tûr a ni lo.

²²Hmeithai emaw, mâk hnu emaw nupuiah an nei tûr a ni hek lo; Israel chhûngte chi, nula thianghlim emaw, puithiam thihsan hmeithai emaw an nei zâwk tûr a ni.

²³Ka mite chu thil serh leh serh loh danglamzia an zirtîr tûr a ni a, thil thiang leh thiang lo an thliar hrantîr tûr a ni.

²⁴Thubuaite pawh an rêl tûr a ni a, ka rêl dân ang zêlin an rêl ang. Ka kûtni vângthla zawng zawngah chuan ka dânte leh ka dân siamte an zâwm tûr a ni a; ka Chawlhnite pawh an serh tûr a ni.

²⁵Mahni intibawrhbâng tûrin mi ruang an hnaih tûr a ni lo; amaherawhchu, nu emaw, pa emaw, fanu emaw, fapa emaw, unaupa emaw, farnu pasal nei lo emaw tân chuan an intibawrhbâng thei ang.

²⁶Tin, a inthen fai hnuah a tân ni sarih chhiarsak leh tûr a ni.

²⁷Hung chhûngnung zâwka hmun thianghlima rawngbâwl tûra hmun thianghlima a luh niah chuan, sual vânga inthawina ama tân a hlân tûr a ni, tih hi Lalpa PATHIAN thuchhuak a ni.

²⁸“Ro chan eng mah a nei lo vang; a ro chan chu keimah ka ni ang. Israel-ah chan eng mah in pe tûr a ni lo, an chan chu keimah hi ka ni.

²⁹Ei tûr hlan te, sual vânga thil hlan te, thiam loh vânga thil hlan te an ei ang a, Israel zînga thil serh apiang chu an ta tûr a ni.

³⁰Rah hmasate zînga a ṭha ber apiang te, in thil hlan tinrênga a ṭha ber, in thil hlan zawng zawnga mi chu puithiamte ta tûr a ni; in ina malsâwmna a châm hlen theihna tûrin, chhangphut hmeh hlâwm ṭha ber chu puithiam hnênah in pe tûr a ni.

³¹Puithiam chuan sa tlaw rêng rêng - sava emaw, ramsa emaw, kut tuar emaw, amaha thi emaw an ei tûr a ni lo.