Read Mizo_Old_version Ezekiela 45 Bible Online

Ezekiela 45 - Mizo_Old_version bible

Ezekiela 45

¹“Chu lovah chuan ro chan tûra ram in sem hunah chuan ram bung serh, LALPA hnênah ram zuat in hlân tûr a ni; a dung lam chu tawng sînghnih leh sângnga, a vâng lam chu tawng sînghnih, a pumin ram serh a ni tûr a ni.

²Hemiah hian hmun serh atân a dung leh a vâng tawng zanga ve ve, inbial a ni ang a; tin, a vêlin tawng zangaa zau hmun âwl a awm tûr a ni.

³Tin, hemi teh sa aṭang hian a dung tawng sînghnih leh sângnga leh a vâng tawng sîngkhat i teh chhuak ang a, chumiah chuan hmun thianghlim serh ber chu a awm tûr a ni.

⁴Ram bung serh chu puithiam, hmun thianghlima rawngbâwltu, a rawngbâwl tûra LALPA hnaih ṭhîntute tân a ni ang a, an in hmun atân leh hmun thianghlim atâna ram serh a ni tûr a ni.

⁵Hmun dang, a dung tawng sînghnih leh sângnga, a vâng tawng sîngkhat, Levia chi in puia rawngbâwltute pualah, an chênna khawpui atân a awm tûr a ni.

⁶Ram bung serh hlan tawh hrûlah chuan khawpui chan, a vâng tawng zanga leh a dung tawng sînghnih leh sângnga in ruat tûr a ni a, chu chu Israel chhûngkaw pum pui tân a ni ang.

⁷“Lal chan chu ram serh hlan tawh leh khawpui chan sîr tuak ve ve, ram serh hlan tawh hma lam leh khawpui chan hma lamah, thlang lama mi thlang lam hawiin, chhak lama mi chhak lam hawiin a awm tûr a ni; a dung chu thlang lam ramri aṭanga chhak lam ramri thlengin, ram bung dang chen bawk a ni.

⁸Chu chu Israel rama ama chanpual a ni tûr a ni; tin, ka lalte chuan ka mite an hnehchhiah tawh lo vang a, Israel chhûngte chu an hnam hran zia ang zêlin ram an pe zâwk ang.”

⁹“Lalpa PATHIAN chuan heti hian a ti: ‘Aw, Israel lalte u, tâwk tawh rawh se! Pâwngnêkna leh inramna chu bânsan daih ula, fel taka rêl leh dik taka tih chîng tawh ula, ka mite hnawh chhuah ṭhin chu bânsan tawh rawh u,’ tih hi Lalpa PATHIAN thuchhuak a ni.

¹⁰Bûkna leh bûk lung dik tak hman ṭheuh tûr a ni. Epha pawh, bath pawh a dik tûr a ni.

¹¹Epha leh bath hi a intluk chiah tûr a ni. Homer aṭanga teh tûr, hetiangin: epha sâwmin bath sâwm a tluk a, chu chu homer khat a ni.

¹²In bûk lung chu hetiang tûr hi a ni: gera sawmhnih leh sekel khat a intluk ang a, sekel sawmruk chu mina khat a ni ang.

¹³“Hei hi thilhlan in hlan tûr a ni ang; buh homer khat zêlah epha hmun ruka ṭhena hmun khat leh, barli homer khat zêlah epha hmun ruka ṭhena hmun khat in pe tûr a ni.

¹⁴Hriak hlan dân tûr chu kor khat zêlah bath hmun sâwma ṭhena hmun khat; kor chu bath sâwm a ni, homer tluk bawk a ni; homer khat chu bath sâwm a ni si a.

¹⁵Israel ran tlatna hmun ṭha ata berâm rual zînga mi zahnih zêlah a no pakhat, ei tûr hlan atân te, hâlral inthawina atân te, remna thilhlan atân te, anmahni then faina siamna tûrin an hlân tûr a ni,” tih hi Lalpa PATHIAN thuchhuak a ni.

¹⁶“Rama mi zawng zawngte chuan Israel lal hnênah he thilhlan hi an pe ang.

¹⁷Tin, kûtah te, thla tharah te, Chawlhniah te, Israel kûtni vângthla zawng zawngah hâlral inthawina te, ei tûr hlan te, in tûr hlan te lal chuan a ngaihtuah ang a; sual vânga inthawina te, ei tûr hlan te, hâlral inthawina te, remna thilhlante chu Israel chhûngte inthen fai nân anin a tumsak tûr a ni.”

¹⁸Lalpa PATHIAN chuan heti hian a ti a ni: “Thla khatna, chumi thla ni khat niah chuan bâwngpatuai hmêlhem lo i hmang ang a, hmun thianghlim chu i thian fai tûr a ni.

¹⁹Tin, puithiam chuan sual vânga inthawina thisen chu a la ang a, in pui kawngkabiangah te leh maichâm chhawrdawh kil liahte leh, hung chhûngnung zâwk kawngka in bangpêngahte a tât ang.

²⁰Tin, chumi thla ni sarih niah chuan tihpalh emaw, hriat lohna avâng emawa thil tisualtute tân pawh chutiang bawk chuan i ti ang a, chutiang chuan in pui thenna i siam tûr a ni.

²¹Thla khatna, chumi thla ni sâwm leh ni li niah chuan kalhlên kût in serh ang; tin, ni sarih chhûng chu chhang dawidim telh loh in ei ang.

²²Chumi niah chuan lalin amah leh a rama mi zawng zawng tân, sual vânga inthawi nân bâwngpatuai a tum ang.

²³Kûtni ni sarih chhûng zawng chuan, bâwngpatuai hmêlhem lo pasarih leh berâmpa pasarih zêl LALPA tân hâlral inthawina tûrin a tum ang, sual vânga inthawina tûrin ni tin kêlpa pakhat nên.

²⁴Tin, chhang hlan atân bâwngpa pakhat zêlah epha khat, berâmpa pakhat zêlah epha khat, leh epha khat zêlah hriak hin khat a tum tûr a ni.

²⁵Thla sarihna, chumi thla ni sâwm leh ni nga nia kûtah chuan ni sarih chhûng chu chutiang bawk chuan a ti ang a, sual vânga inthawina te, hâlral inthawina te, chhang hlan te leh hriakte tum vekin,” a ti a.