Read Mizo_Old_version Ezekiela 47 Bible Online

Ezekiela 47 - Mizo_Old_version bible

Ezekiela 47

¹Tichuan, in pui kawngkhârah chuan mi hruai lêt a; tin, ngai teh, in pui kawngka bul hnuai aṭang chuan chhak lam hawiin tui a lo luang chhuak a, in pui chu chhak lam hawi a ni si a; tin, tui chu maichâm chhim lam in pui sîr ding lam hnuai aṭangin a lo luang thla a.

²Tin, hmâr lam hawi kawngka inah chuan mi hruai chhuak a, pâwnah chuan chhak lam hawi kawngka in pâwnta zâwk thlengin mi hruai a; tin, ngai teh, ding lampangah chuan tui a lo luang chhuak a.

³Chu mi chuan tehna hrui kenga chhak lam hawia kalin tawng sângkhat a teh a; tin, tui chu mi dai kaitîr a, kheimit thleng a ni a.

⁴Tawng sângkhat a teh leh a, tui chu mi dai kaitîr leh a, tui chu khûp thleng a ni a. Tawng sângkhat a teh leh a, mi dai kaitîr leh a, tui chu kâwng thleng a ni a.

⁵Tawng sângkhat a teh leh a; tin, ka dai kai rual loh, luipui a lo ni ta a; tui chu a lo sâng zêl a, a daia dai kai rual loh, a hleuhva hleuh tham luipui a lo ni ta a.

⁶Tin, ka hnênah, “Mihring fapa, hei hi i hmu em?” a ti a. Tin, luikam hrût tûrin mi hruai kîr leh ta a.

⁷Tin, ka han kîr leh chuan, ngai teh, vaukam tluan chuan vaukam tawnin thing tam tak a lo awm a.

⁸Tin, ani chuan ka hnênah, “He tui khawchhak ram lama luang hi Araba ramah a luang lût ang a, tuipui tui al chu tui thianghlimah a chantîr ang.

⁹Tin, heti hi a lo ni ang a, luite chu an luanna apiangah rannung tinrêngin an dam phah ang a, sanghate an awm huai huai ang; tuipui tui a thianghlimna tûr leh a luanna apiangah rannungten an nun phahna tûrin hêng lui hi a lo luang a ni si a.

¹⁰Tin, heti hi a ni ang a, a kamah chuan sangha mantute an ding ang; En-gedi aṭanga En-eglaim thlengin lên denna hmun a ni ang. A sangha chu an chi ang zêlin, tuipui lian sangha ang maiin an tam êm êm ang.

¹¹Chirhdûp leh dûmte erawh chu an thianghlim ve lo vang a, chi khur atân hnutchhiah a ni ang.

¹²“A lui kamah chuan a kam tuakin theikûng tinrêng a ṭo vang a, chûngte chu a hnah a vuai ngai lovin a rah lo ngai hek lo vang; hmun thianghlim aṭanga lui lo luang chhuak châwm a nih avângin thla kipin a rah ang. A rah chu ei atân a ni ang a, a hnah chu tihdam nân a ni ang.”

¹³Lalpa PATHIAN chuan heti hian a ti a ni: “Hei hi Israel hnam sâwm leh hnam hnih zînga ram inṭhen dân tûr chu a ni e. Josefan chan hnih a chang ang.

¹⁴Inang rengin in chang tûr a ni; in thlahtute hnêna pêk tûra chhia ka chham tawh kha, he ram hi in ram chanah a tlu dâwn a ni.

¹⁵Hei hi a ram pum ri tûr a ni: hmâr lamah chuan Tuipui lian aṭangin Hethlon kaltlangin Hamath luhna ruamah Zedad a thleng a;

¹⁶Berotha te, Damaska leh Hamath inrina laia awm Sibraim te, Hauran ramri bula awm Hazer-hattikon thlengin.

¹⁷Chutichuan, ramri chu Tuipui lian aṭangin Damaska ramri bula Hazar-enan thlengin a ni ang a, hmâr lamah chuan Hamath ramriin a ri ang. Hei hi hmâr lam ramri chu a ni.

¹⁸Tin, chhak lamah chuan Hauran leh Damaska inkârah Gilead leh Israel ram inkâra Jordan lui dung a zawh ang; hmâr lam ramri aṭangin khawchhak tuipuiah Tamar a thleng ang. Hei hi chhak lam ramri a ni tûr a ni.

¹⁹Chhim lamah chuan Tamar aṭangin Meriba-kadesh tuite thlengin Aigupta lui zawhin Tuipui lian a thleng ang. Hei hi chhim lam ramri tûr a ni.

²⁰Thlang lamah chuan Tuipui lianin a ri ang a, chhim lam ramri aṭangin Hamath luhna ruam zâwn thlengin. Heti hi thlang lam ramri a ni tûr a ni.

²¹Chutichuan, he ram hi Israel hnam athuin in zîngah in sem ang.

²²Tin, heti hi a ni ang a, in ram chan tûr leh in zînga hnam dang chêng, nupui fanau nei tawhte ram chan tûr chu in sem tûr a ni. Anni chu Israel faa piang rêng ang an ni tûr a ni a, Israel hnamte zîngah nangmahni angin chan an nei tûr a ni.

²³Tin, heti hi a ni ang a, tu hnam zîngah pawh hnam dang lo khawsa sela, chutah chuan a ram chan tûr in ruatsak tûr a ni,” tih hi LALPA Pathian thuchhuak a ni.